Пшкядемок кочкафненди Мордовиянь Оцюнять Артем Здуновонь лемста, Мордовия Республикань Оцюнять Администрациянц и Мордовия Республикать Правительстванц Руководителец Булат Хайрутдинов китькстазе, што странать руководствац максси местнай самоуправленияти мекольце пингть оцю ванф.
«Президентть В.В. Путинонь мархта тяшкстафт «Заслуженный работник местного самоуправления Российской Федерации» почетнай званиясь, Сембероссийскяй муниципальнай премиясь «Служение». Тя кизонь январьста ламоцне кочкафнень эзда арасть оцю событиянь участнникокс – I-це Сембероссиянь муниципальнай форумть «Малая родина - сила России» эса, конац кочказень фкас минь аф ашкодеви Родинанеконь сембе уженянзон».
Заседаниять пингста корхтамась мольсь кафта законопроектс поладкснень колга, конат шарфтфт Президентть Владимир Путинонь поручениянзон эряфс ётафтомаснон лангс, конат максфтольхть странань Правительствать видеса Советть заседанияса местнай самоуправлениять касоманц-виияманц коряс.
Законопроекттнень эзда фкясь токсесы социальна ориентированнай афкоммерческяй организациятнень кирдемаснон, конатнень покодемасна сотфт гражданскяй обществань институттнень и общественнай самоуправлениять виензамаснон мархта. Лия законопроектть эса корхтави государственнай гражданскяй и муниципальнай службать республикань муниципальнай образованиянь Советть управлениянь органса покодемань кизотнень стажс сувафтомаснон колга.
Советонь участникнень ванфсна ульсь шарфтф муниципалитеттнень мархта эряйхнень ёткса сяда цебярь диалогонь строямать лангс, синь ётксост Госпабликонь системать пачк, въдь эсь прябаласнон пяшкодемаснон мельге ломаттне сяда сидеста пшкяткшнихть именна местнай самоуправлениянь оргаттненди. Ульсь китькстаф, што муниципалитетсь – ломаттненди инь мала публичнай властень уровенць, а муниципальнай служащяйхне и поселениянь оцюнятне - тя первичнай звенась властть и обществать ёткса. Эряви вишкста арьсемс и тиемс цебярь каршек соткс. Тяка пингть цифровизациясь аф полафтсы ломаттнень мархта личнай корхтамать. Башка ванф эряви максомс СВО-нь участникнень и синь семьяснон кирдемаснонды.
Тяфта жа заседанияса корхтамась мольсь инь таколфты кизефкснень пяшкодемаснон колга, конат ащихть муниципалитеттнень инголе актуальнай повесткаса: территориятнень эса сетьмешинь ванфтомать, синь ётксост пожар ширде аф сетьме и ведень объекттнень лангса, цебярь марспокодемань ладямась общественнай и ветеранскяй организациятнень мархта Великай Отечественнай войнаса Сяськомать 80-кизонц празднованиянц каршеса.
Шумордавсь заседаниясь муниципалитетонь представительхнень заслуженнай наградаса и благодарностьса каземасост.