Лятфтасаськ, цифровой трансформациясь – Россиять касфтомаса виияфтомаса 2030 кизоти вете национальнай цельхнень ёткса. Пространственнай даннаень Национальнай системать тиемац (НСПД-ть) канды фкя цифровой платформаса модать и недвижимость колга информациянь марстоптома. Проектсь шарфтф модань ресурснень эряз тевс нолдамаснон кеподеманц лангс и сембе странаса недвижимость лангс праватненди гарантиянь пяшкодемать. Платформась лезды сяда лац ваномс и анокламс эрь кодама территориятнень виензамань перспективаснон. Кепотьксоньди, сонь лезксонц вельде заявителельхненди ули кода видеста пшкадемс услуганкса, штоба ушедомс участкаса покодематнень, ётамс согласованиянь процедурать нюрьхкяня пингста, мумс афрегистрировандаф недвижимостень объекттнень.
Ётай кизоть, мартста Мордовиясь арась пилотнай региоттнень эзда фкакс тя проектть эряфс ётафтоманц коряс. Тя пингста республикась тись оцю аськолкс ЕГРН-ть пяшкодемаса виде сведенияса. Тяни реестрса уже кафксть сяда лама сведенияда Мордовиянь модань участкань границатнень колга, 10 сяда лама - территориальнай зонатнень. Тяниень пингть, кода китькстазе Артем Здунов, ЕГРН-у сувафтфт сведениятне сембе республикань муниципальнай образованиятнень границаснон колга. Сувафтф региональнай границань пялькссь, конанц ащи Чувашскяй Республикать, Ульяновскяй и Пензенскяй областтнень маласа. Кизоть пенцты ЕГРН-ти кармайхть сувафтфт сведениятне Рязанскяй область мархта границать колга. Мольфтеви сяда тов покодемась Нижегородскяй областть мархта границать тяштеманц и сувафтоманц колга. 2024 кизоть пенцты ащи планца сувафтомс ЕГРН-ти регионтть сембе населеннай пунктонзон границаснон.
Эрявикс направлениясь - капитальнай строительствань объекттнень инвенторизациясна, сон ётафневи тястоконь самоуправлениянь оргаттнень мархта 2022 кизонь васенце январьста. Тя пингста правафтома объекттнень лувкссна республикаса кърьсь 40%.
Шумордавсь покодемась «Инвестиционная карта Республики Мордовия» и «ГЕО АПК» региональнай систематнень мархта НСПД-нь информационнай протоколонь тяшкстамать и тиемать коряс.
Олег Скуфинский китькстазе республикать цебярь покодеманц пространственнай даннаень Национальнай системать сувафтоманц коряс и сюконясь Мордовиянь Оцюняти эряз марспокодеманкса. «Тяниень пингть Росреестрсь государствань Оцюнять поручениянц коряс ётафни эряфс проект СНГ-нь странань госпорталть тиеманц коряс. Арьсеви, што 2025 кизоня сон кармай сувафтф промышленнай эксплуатацияс. И тоста регионтть сембе инвестиционнай возможностенза кармайхть видеста няфневома СНГ-са», - мярьгсь сон.
Олег Скуфинский и Артём Здунов тяшкстасть важнай документ – Росреестрть и Мордовия Республикать ёткса сотрудничествань колга соглашения. Сон шарфтф бизнесонь вятемаса процедурань теждялгофтомать, государственнай услугань максомать эса эффективностень касфтомать лангс.
Мордовия Республикань Оцюнять пресс-службац