Владимир Волков етафтсь рабочай васедема Краснослободскяй райононь оцюнять Александр Масеевонь мархта. Корхтамась мольфтевсь территориять социально-экономическяй виияфнеманц колга.
Александр Масеев пачфтсь республикань руководствати тундань сокамань-видемань тефнень колга и тяддень велень хозяйствань сезонти платтнень квалма. Краснослободскяй районць республикаса ащи васенце вастса лофцть производстванц коряс. 2018 кизоня касомась арась 2 тежятть тонна, касомась ванфневи тяддевок. Республикань Оцюнясь китькстазе: районть аф емла козяшиц АПК-са, и эряви сяда товга старандамс касфнемс велень хозяйствань производствать.
Стане жа корхтамась мольфтевсь социальнай ширеть виияфнеманц колга. Райононь оцюнясь азондсь Владимир Волковонди Краснослободскяйса 450 вастонди од школать строяманц колга. Тяниень пингть строительхне кярьмодсть отделочнай работатненди. Лятфтасаськ, што од школась панжеви тяддень 1 сентябрти.
Стане жа ванфтольхть кизефксне, конат сотфт Старогоряшевскяй велень поселениянь Бобылевские Выселки велеса спортивнай комплексть строяманцты анокламатнень мархта. Объектсь строяви велень территориятнень устойчивай развитияснон программас коре и арай эсь лацоннекс республикати: эзонза сувайхть аф аньцек аф фкя лацонь спортивнай залхт, но и кафта бассейнат – оцювонь и емлань, а стане жа ледовай арена. Комплексть арьсекшневи тиемс межрайоннайкс.
Лама корхтафоль Краснослободск ошть благоустроендаманц колга, тяконь лувксса «Формирование комфортной городской среды» федеральнай проектть рамкаса. Кода отмечазе Александр Масеев, тядде ни арьсекшневи кярьмодемс ошть историческяй пяльксстонза общественно-деловой зонать благоустроендаманцты. Васенда петеви-тиеви пешеходнай бульварсь Коммунистическяй ульцять эзга и Советскяй площадьса, а сяда тов – Мокша ляйть набережнаец.
Мордовия Республикань Оцюнять пресс-службац