Максим Тевс шарфтсь мяль сянь лангс, што ётай кизоть компаниясь шумордазе цебярь лувксса. Удалась касфтомс и производствать лувксоц, и вагононь, и литейнай продукциятнень. Эрязста моли инвестициятнень серьгядемасна промышленностень вииямаса Фондть лезксонц вельдя. «ВКМ-Сталь-са» путф точнай валомань цех, коса тяни вятеви оборудованиянь отладкась. Сонь лисемац проектнай виень пяшксес максы эрьгя нолдамс кара-каршек ащи продукция, конань эса веши тячиень рынкась.
Ульсь азф, што «РМ Рейл» поладсы касфтомс продуктовай линейкать келептеманц подвижной составть вельдя, кона вельф лезды железнодорожнай усксематнень виияфтомаса. Инь перспективнай ваготтне ётафтовихть инновационнай ходовой частьс 27 тс вий мархта. Тя кизонь апрель ковста сертификат максф полувагонти, конань ашет аналогонза универсальнай люковай полуваготтнень ёткса, изотермическяй вагон-термос. Аноклави сертификатонь сявома нефтепродуктанди цистернати – инь цебярьсь четырехоснай вагононь-цистернатнень сегментса. Цебярь мзярда ули эсь инжиниринговай центраньке «РМ Рейл Инжиниринг», кона лезды эрязста арьсемс и нолдамс производствань тевс инь цебярь характеристика мархта наукоемкай, техническяй стакалготф модельхнень. Тяфта жа эрязста мольфтеви вертикальнай стальной резервуархнень сегментсна.
«Компаниясь эрязста аськоляй бизнеса диверсификацияти и «РМ Рейл-ть» позициянзон кемокстамаснон инь эрявикс, курокста вийнь кочкай рынкать сегментованза, аф ваномок сянь лангс мезе тя - ваготт, контейнерхт, нефтехимическяй продукция или шудема. Минь тянкса ули сембе эрявиксшиньке: профессиональнай инжинирингоньке, пяк лац ладяф производстваньке и сембе ширде нарде команданьке», - мярьгсь «РМ Рейл-ть» гендиректороц.
Мордовияса компаниять площадкаванза тяни покоди 7 тёжяньда лама сотрудник. Башка мяль компаниять покодемаса шарфтови сотрудникненди производственнай социальнай программатнень коряс сатфкснень виияфтомаса. Нолдаф тевс и келептеви эрямань программась – ётай кизоть 30 специалист получасть эрямань кудонь рамама субсидият, тя кизоть максфт уже 32 заявка. Сидеста ётафневи покодема коряс цалковайхнень получамаснон коряс индексация (2024-це кизоть коряс средняй зарплатась компанияса кассь 20%, а 2025-це кизонь 1-це февральти – 5%, и марнек лиси 100 тёжяньда лама цалковай) и улихть пси ярхцамбяленди дотацият. Нинге фкя одс шире тя кизоть ульсь нолдаф компанияса – тя сотрудникненди компенсациянь пандомась идень садонкса. Тя тевсь пяк тусь сотрудникнень мяльс.
Артём Здунов пара мяльса кенярдсь тяшка тевонь тифти. «РМ Рейл» компаниясь – республикать цебярь партнероц. Тевонь содазь касыхть производственнай тифне холдингть предприятиява, региональнай бюджету налоговай канфне. Тя сембось лезды цебярьгофтомс республиканьконь, касфтомс эряйхнень мяльснон республикаса эрямс. Пяк цебярь, што оцю мяль шарфттада сотрудникненди корпоративнай программань виияфтомаса, а сяда пяк шаба мархта семьятненди», - мярьгсь Артём Здунов.
Тяфта жа васедемста шарфтфоль мяль сотрудникнень пшкядемаснон лангс - ваномс оду ряд автобусонь маршрутть и фатямс Саранск ошень площадкатнень «Рузхиммаш» и «ВКМ-Сталь», и петемс кить Александровскяй шоссеть лангса.
Мордовия Республикань Оцюнять Пресс-службац