Советсь койс коре ётафневи кизоть песта, штоба максомс оценка национальнай цельхнень сатомаснон коряс работати - эсонза примсихть участия властень сембе уроветтне, деловой и научнай ширетне, касомань-вииямань институттне, общественнай организациятне.
Национальнай проекттне ащихть васенце инструментокс национальнай цельхнень сатомаса. «Синь педа-пес нолдаманксост тифоль нормативнай база, муфтольхть финансировандамань источникт, тиф результатонь цифровой мониторинг ломаттнень, бизнесть, профессиональнай сообществатнень питнень максомаснон лангс нежедезь, социологическяй кизефнематнень мяльс сявозь, конат мольфтевихть фалу, эрь кварталста. 19 национальнай проектсь ушедовсь и целайнек лац», - азозе Владимир Путин.
Ориентирхнень оцюшка пялькссна тядденди сатфт. Тяконь лувксса пяшкотьфт граждаттнень аварийнай эряма вастста ётафтомаснон коряс платтне. Касы агропромышленнай производствась, касыхть креативнай индустриятнень лувкссна. Сатф прогресс уштомань-энергетикань тефнень эса, «мирнай атомонь» ширеса отечественнай технологиятнень виияфнемасост. Цебярьста вииякшни ляткснень мархта обращениянь индустриясь и замкнутай циклань экономикань тиемась. Кассть граждаттнень оценкасна тяфтама ширеса, кода китнень состояниясна, внутренняй туризманди условиятне, а стане жа средняй профессиональнай и высшай образованиять качествац, государственнай услугатнень электроннайста максомасна. Кассь и петемань-мазоптомань уровенень оценкась.
Аф тяшкава марявихть полафтксне жилищно-коммунальнай тефнень эса, перяфксфтома ширень тиемаса. Президентсь путсь Правительствать инголе задача марса региоттнень мархта эряскофтомс опорнай населённай пункттнень виияфтомаснон коряс комплекснай программать анокламанц и кемокстамс сонь нюрьхкяня пингста.
Оцю мяль шарфтфоль демографияти. Лятфтасаськ, Правительствась кемокстазе тя ширеть коряс лама пингонь Стратегиять, нолдась «Семья» од национальнай проект. Тя кизоста сявомок, шачиень показательсь сувафтф Федерациянь субъектонь оцюнятнень работаснонды питнень максомати.
«Арьсефт идь мархта семьятненди ширень кирдемань од мерат. Тяконь лувксса семейнай пандомась, конань 2026 кизоста сявомок ули кода получамс аф оцю доход мархта семьятненди, коса касы кафта и сяда лама идь, - мярьгсь государствань оцюнясь. - Тядде тевс сувафтфоль корпоративнай демографическяй стандартсь. Сон лезды виияфтомс бизнесть участиянц демографическяй цельхнень сатомаса. Тяфта, сай кизонь 1 январьста касы суммась, конань работань максыти ули кода пандомс сотрудникненди шабань шачемста и конань эзда аф пандовихть НДФЛ-сь и страховой взносне. Сон кармай фкя миллион цалковайти молемс. Тяда инголе тяфтама пандомань суммась ульсь 50 тёжянти молемс. Эняльдян компанияньконди активнайста нолямс тевс ня возможносттнень, кирдемс мяльса социальнай ответственностень принципнень».
Тяка пингть мзярс нинге демографическяй виияфтомань сфераса мератне аф сатомшкат. Ужяль, мялень колай тевсь ванфневи: шачихнень лувкссна коль кири.
«Шарьхкотьф, улихть объективнай туфталхт, мес сембось моли тяфта, сувафнемок марнек масторлангонь демографическяй тефнень, а стане жа негативнай демографическяй тевоньконь XX векть кучкаста и песта, конат тячи тага макссихть эсь колгаст содамс. Конешна, демографияти эсь путксснон тиендьсазь и внешняй вызофне, - мярьгсь Владимир Путин. - Тяконь мархта тага весть китькстаса: кунардонь пингонь историческяй задачаньке ащи народоньконь ванфтомаса и касфтомаса. И, аф ваномок тяниень обстановкать, объективнай стакатнень-сталмотнень лангс, тейнек эряви кирдемс тя ориентирть. Шачихнень лувксснон касомац, идь мархта семьятнень ширеснон кирдемац, граждаттнень шумбра эряфснон кувалмонц касфтомац – сембось тя ключевой направлениятне марстонь работасонк».
Штоба полафтомс шачфтомать киреманц коряс тевть марнек странаса, Президентсь путсь задача виияфтомс уликс мератнень сембе серьхнень эса. Федерациянь ламоц субъекттне няфнесазь, кода сатфкс мархта машфтомс тянь. Тяддень 1 ноябрьста сявомок ётай планировандаф значениятнень мяльс сявозь или сяда оцю серьс повсть Российскяй Федерациянь 18 региоттне, а колмоце и сяда мельдень иттнень шачемаснон коряс – 11 региоттне.
Тяка пингть Владимир Путин шарфтсь башка мяль, што целайнек странаса цебярьгодсь иттнень шачфтомаснонды анококс улемань социологическяй показательсь. Сембода пяк – Херсонскяй и Запорожскяй областтнень, Мордовия, Алтай, Кабардино-Балкария республикатнень эса.
«Арьсян эрявиксокс тиемс анализ ширень кирдемань демографическяй ся мератненди, конат вийсот региоттнень эса, кочкамс эздост инь цебярьхнень и, тевть апак кадонт, ламологофтомс синь и общенациональнай серьса. Тянь коряс эняльдян Правительствати и Федерациянь субъекттнень эса работас коре ялгатненди тиемс тячиень шиннекс шачфтомань касфтомань региональнай программатнень. Эняльдян Правительствати анокламс комплекснай решеният демографическяй мялень салай тенденциять полафтоманц инкса. Тя васенце системнай задачась, кона ащи Правительствать и региоттнень инголе 2026 кизонди национальнай проекттнень и марнек государственнай политикать эряфс ётафтомаснон пяльксса», - мярьгсь Президентсь.
Мордовия Республикань Оцюнять Пресс-службац
Фотось: Kremlin. ru