Россиянь Президентсь Владимир Путин Военно-морской флотонь шиня ульсь Кранштадса Никольскяй морской соборса , коса сюконясь адмиралть Феодор Ушаковонь мощанзонды. Синь пачфтьфтольхть Санкт-Петербургу спецбортса Мордовиянь Темниковскяй райононь Санаксарскяй монастырьста.
Республикась кирди цебярь соткст Россиянь сембе флоттнень командованияснон мархта. Нинге 2002 кизоня странань военно-морской вийхнень мархта руководствась лиссь мяль мархта максомс сембе флоттненди великай флотоводецть мощанзон. Тя событиять пяк крхка смузец, сонь оцю значенияц кода Россияти, стане и марнек православнай мирти.
Лама киза Мордовиясь максси лезкс «Адмирал Ушаков» Севернай флотонь эскадреннай миноносецти. Республикань несколька школатнень эса панчфт кадетскяй военно-педагогическяй класст, конат каннесазь адмиралть Ушаковонь лемонц. Эсост тонафни тежянть малава шаба.
Лятфтасаськ, великай флотоводецсь Ушаков етафтсь нильгемонь кампания, конатнень эса ашезь кирде фкявок поражения и ашезь юмафта фкявок карабль. Сон кемокстазе Россиять славанц кода великай морской державань и арась русскяй воинствань аф сяськови мощень символкс. 1806 кизоня адмиралсь макссь отставканц колга прошения и етась эряма Алексеевка вели, кона ащи аф ичкозе Мордовиянь Темниковскяй райононь Санаксарскяй монастырть эзда. Эряфонь мекольце кизонзон етафтозень столицать эзда ичкоздень вастса, занцемок пря благотоворительностть мархта. Сон ульсь оцю верондамань, мужествань и мала ломаттнень мархта пичедемань примеркс.
Феодор Ушаков канонизировандаф Русскяй Православнай церькавть мархта 2001 кизоня. Канонизациянь церемониять вятезе тячиень Москувонь и сембе Русень Патриархсь Кирилл. Аф сяськови адмиралть и праведнай христианинть лятфнеманкса Саранскяйть кучкаса строяф Кафедральнай собор. 2016 кизоня топодсь кемонь кизот ся пингста кода соборть святиндазе Патриархсь Алексий II. Эста жа, 2006 кизоня, Саранскяйса панчфоль содаф флотоводецти памятник. Церемониять вятезе Россиянь Президентсь В.В.Путин, кона отмечазе, што «Мордовиясь арась Россиянь духовнай
центратнень еткста фкякс, арась странань фкя инь курокста касонды-вииякшни регионкс».
«2017 кизось азф республикаса святой праведнай воинть Феодор Ушаковонь кизокс. Ня шитнень сембе минь участвондатам мероприятиятнень эса, конат лемтьфт Феодор Ушаковонь куломста 200 кизонь топодемати, - азозе Мордовиянь Оцюнять аф оцю пингс тевонзон тиендисна Владимир Волков.- Темниковскяй районца, коса пяк ламось сотф Ушаковонь мархта, пуроптф туристическяй кластер. Вятеви Санаксарскяй монастырть благоустройствац, ушетфт работатне флотоводецть усадьбанц «эреклафтоманц» коряс. Алексеевка велесь обязательна сувафтови аноклави туристическяй маршрутти, кона етай святой адмиралть мархта сотф васттнень эзга».
Фотось: Россиянь Президентть Официальнай сайтоц http://kremlin.ru/events/president/news/55203/photos#