Республикань руководительсь лятфтазе: Мордовияти 2024 кизось – аф аньцек семиянь Киза, но и трудовой династиянь Киза. Артём Здунов илафтозень сембонь Россиянь и ошень Шить мархта и сюконясь васедемань участникненди подемаснон инкса: сембе нят ломаттне – эсь профессиясост инь цебярьхне, синь содасазь и кельгсазь районца.
Амбаевнень покодемань династияснон оцюняц Александр Васильевич 11 киза макссь «Развитие» Клянцеконь компанияса покодемати. Сон специальнай военнай операциянь участник, боевой действиянь ветеран,эсь идензонды кепотькс.
Карнауховнень медицинскяй династиясост 14 медицинскяй работник, синь марстонь трудовой стажсна - 315 киза. 150 кизода лама - Недайборщ учительскяй династиять лувксса. Педагокне тонафтсазь касы поколениять улемс патриоткс, кенярдемс эсь республикацень и странацень инкса. Инь ёмла семияв сувайсь Егор Недайборщ азондсь Родинать колга валмора,конань сонць аф кунара тяштезе.
Бирюлевнень промышленнай династиясна марстоптозень Горбуновых, Логуновнень, Подъячевнень и Пустобаевнень семьяснон. Синь стажсна - 173 киза. Уже колма семиянь поколениятне покодихть «Рузхиммаш» предприятияса. Должносттне сембонь аф фкя лацот, но сембе кельгсазь родной заводть.
147 киза макссть «Рузхиммашти» Косаревнень покодемань династиясна. Кода азондозе Татьяна Косарева, сон нинге идькс пингста сашендсь заводу и содазе, што кармай тяса покодема.
Болеевнень династиясна – велень труженикт, скромнай, надежнай ломатть, конатненди шачем масторсь – сембе эряфсь. Марстонь покодемань стажсна – 259 киза. Династиять Оцюняц Валерий Болеев азондозе, што кенярьтьф эсь покодеманц, идензон и уноконзон мархта.
Рузаевскяй райононь инь музыкальнай покодемань династиясь – Канаевнень семиясна – ванфнесыне мокшэрзянь ламавайгялень койхнень. «Овнеке минь руз, но уже мархтонк морси мокшэрзянь морот», - азондозе Людмила Канаева, Левженскяй клубть заведущаец.
Воеводиттнень династиясна максозе кшнинь кити 255 кизотнень. Трудовой династиять кочкаец Александр Макарович геройкс аралакшнезе Родинанеконь Великай Отечественнай войнань пингть, сонь потомканза тусть атять кепотьксонц коряс - тожа железнодорожникт.
Мордовиянь Оцюнясь лямбоста и седи ваксста корхнесь тевонь кельги рузаевцнень мархта. «Мон пяк лац ётафтыне тя илятть мархтонтт. Обязательна саян нинге! Сюкпря теентть покодеманкса и республикань кельгоманса», - мярьгсь Артем Здунов.
Мордовия Республикань Оцюнять пресс-службац