Мордовиянь Оцюнять Артём Здуновонь лемонц эзда илань участникненди и инжихненди пшкядсь Мордовиянь Государственнай собраниянь Председательсь Владимир Чибиркин. Сон китькстазе, што «Сабантуйть» кунардонь историяц и сонь юронза тушендыхть кунардонь пинкненди. И минь задаченеке ванфтомс инь цебярь койхнень и тиемс сяда лама сянь эзда, мезьса тяни вии минь Россиянеке.
«Васенда тя илась ульсь лемтьф сокамань илакс. И тячи минь сюконятама ломаттненди тя покодемать инкса, конац лезды сатнемс оцю сатфкст республикаса. Стройсемс промышленнай предприятият, виензафнемс велень хозяйствать, ванондомс социальнай кизефкснень, стройсемс социальнай объектт. А тячи минь странанеконь инь прявкс задачац - тя специальнай военнай операцияса сяськомась. И минь уже няеськ, кода сембе минь ломаньнеке лездыхть, штоба сяськомась саль сяда курок», - мярьгсь Владимир Чибиркин.
«Сабантуень» инжихнень Татарстанонь Оцюнять Рустам Миннихановонь лемста шумбракстозень Татарстан Республикань экологиянь и пельфпялень ресурсонь министрсь Александр Шадриков: «Тячи тя кунардонь пингонь илати пяк лац сувафтфт тяниень пингонь тюссне. Сон кизоста кизос арси арь кодама кизонь, эрь кодама национальностень и вероисповедания мархта ломанень васьфтема вастокс, лезды сяда лац фкя фкянь ёткса шарьхкодеманди, культурнай и духовнай пяшкодемати, народтнень ёткса сетьмешинь и согласия ванфтыкс. Традиционна тят шитнень сашендыхть мала ломаттне сянь мельге, штоба тага марямс седиень лямботь, корхнемс тядянь-алянь кяльса. Семьять, народть, странать единстваснон - вага мезе канды «Сабантуйсь». Сянкса семьянь кизоста Российскяй Федерацияса тя илась сявонди особай актуальность и интерес».
Илать васенце минутаста кожфса марявсь кенярдемань атмосферась. Валда нарядтне, кштимань мелодиятне, национальнай ярхцамбялень шиненятне и седи ваксста пеедематне – тя сембось кочксезе аф тиеви одукс «Сабантуень» атмосферать, илать, конац марстопнесыне эрь кодама национальностень и поколениянь ломаттнень.
Илать торжественнай панжемац ушедсь театрализованнай представленияста, конац лемтьфоль шачема ширети и семьянень койхненди кельгомати. Сяда меле лямбе сюконяма валхт ульсть азфт велень труженикненди , СВО-нь участникненди и синь семьяснонды, трудовой династиятненди - сембонди, кие Отечествати эсь покодеманц, мужестванц и кельгоманц мархта тиендьсы Мордовиять нинге сяда мазыкс и виикс.
«Мы вместе!» Культурно-выставочнай проектсь сувафтозень инжихнень Мордовиянь культурань и историянь мялень салай мирс, азондсь народтнень козя койснон и обуцяснон колга, конат эряйхть республикаса. Кажнай тематическяй павильонс - «СемьЯ», «Вместе Мы - Сила!», «Жить и творить во благо страны!», «Живая связь времен», «Пилоты будущего», «Готовы помочь!» - лац няфнезь поколениянь кеме соткснень и Россиянь и Мордовиянь народттнень традиционнай питнишиснон – шачема масторти, семьяти и Отечествати кельгомать. Народнай ремеслатнень коряс мастер-классне салазь мяльснон и идтнень и оцюфнень, конат арьсесть токафтомс народнай культурать истоконзонды, ванфтомс и максомс сонь сай поколениятненди.
«Нас объединил «Сабантуй» Музыкальнай программась арась афкуксонь казнекс моронь кельгихненди. Седи ваксста морот «Нейтральная полоса» моронь клубть эзда, «Казачья вольница» ансамбльть эзда кштимань ритмат, мялень салай номерхт Мордовиянь и Татарстанонь артисттнень эзда, ваймонь токай композицият «Стихия авторская» фестивальнай движениять участниконзон эзда - эрь выступлениясь мушендсь лямбе каршек вал ваныхнень седиса, корхтамок моронь и кштимань кяльса прявксть колга - кельгомать, единствать и патриотизмать.
Спортонь площадкатнень лангса ульсь азартонь и спортивнай духонь атмосфера. Инь цебярь атлеттне васьфтьсть пялькстомаса чемпиононь званиянкса «Көрәш» национальнай борьбаса и матчевай васедемаса греко-римскяй борьбать коряс, синь няфтезь вийснон, маштомаснон и сяскомати валяснон. Инь ёмла инжихне оцю мяль вельде ётафнезь пингснон башка тиф идень зонаса, коса синь учезь народнай налхкоматне, мялень салай мастер-классне, аквагримсь и весяла аттракциотне.
«Сабантуйсь» Аксёноваса тага весть няфтезе, што койхне эряйхть фалу, марстопнесазь поколениятнень и пяшкотькшнесазь эряфть валда тюсса. Тя илась арась афкуксонь гимнакс межнациональнай ялгаксшити, гражданскяй единствати и шачема масторти кельгомати – сят питнишитненди, конат фалу кармайхть актуальнайхть и эрявикст Мордовиянь и сембе Россиянь эряйхненди.