Василий Семёнович Учайкин шачсь 24 июньста 1934 кизоня Симкино велеса (тяни Мордовиянь Большеберезниковскяй районц) крестьянскяй семьяса. Мзярда теенза ульсь 7 кизот, ушедсь Великай Отечественнай войнась. Василий Семёновиченди савсь идькскиге покодемс оцюфнень мархта рядс. Ульяновскяй сельскохозяйственнай институтть аделамда меле Василий Учайкин мърдась шачема ширезонза. Сон ётась покодемань ки машинно-тракторнай станциянь ветеренарнай врачста министрнь васенце полафтыти. А 1978 - 1991 кизотнень ульсь прявксокс республиканскяй правительстваса.
Мемориальнай седяфть панжемста кочкафненди Мордовиянь Оцюнять Артём Здуновонь лемста пшкядсь республикань Правительствать Председателец Дмитрий Поздняков:
«Василий Семёнович сувафтсь питнефтома путфкс Мордовиять касомас-вииямас. Сон макссесь оцю ванф социальнай сферать сембе ширдень виияманц лангс. Сонь руководстванц ала ульсь тиф школань и идень садонь сеть, нолдаф газ ошень и велень населеннай пункттнень эса, строяф лама эряма васта и путфт автомобильнай китне. Няевиста полафтсть ошнень, райцентратнень и населеннай пункттнень «шамасна», синь арасть сяда мялень салайкс и мазыкс. Путф задачань лац тиемань маштоманц мархта сон сявсь авторитет республикаса и аф аньцек. Сонь ламакизонь и пяк цебярь покодемац китькстаф государственнай наградаса. Василий Семёновичень козя содамашинза, практическяй опытоц и мудростец ульсть эрявикст и сънярда, мзярда сон туссь заслуженнай ваймамас. Сон фалу лядондсь стройса, ульсь пяшксе вийда и мяльда служендамс родной Мордовияти. Макссесь ванф од ломанень патриотическяй касфтомати, ветеранскяй движениять виензаманцты. Лама киза сон ульсь Мордовия Республикань Оцюнять видеса Консультативнай Советонь председателень полафтыкс и Мордовия республикань Оцюнять Администрациянц видеса ветеранскяй организациянь и Мордовия Республикань Правительствань председателькс. Сон ашезень полафне эсь идеалонзон и честна покодсь странать пара эряфонц инкса. Минь мархтонт задачанеке ванфтомс и максомс уникальнай наследиять сай поколениятнень касфтомс. Арьсян сембонди сетьмеши, пара и од сатфкс минь Шачема Масторнеконь панжеманц лемс!».
Митингса ульсь Василий Учайкинонь семьяц, ялганза, соратниконза, ингольдень покоди ялганза. Синь мялямсост сон лядонды ломанькс, конанц седиец ульсь максф Отечествати, конац кельгозе эсь шачема масторонц и мокшэрзянь народть.
«Оцю сюкпря сембонди, кие сась алязень мялямонц колга лятфнемань мемориальнай седяфть панжемас. Тячи тяса кочкавсь пяк лама ломаньда, а сянкса, сембе, мезе сон тиендсь, сембонь мезе сон тись и тосьтяфнесь инголи, ульсь аф стак. Сон эсь покоди ялганзон мархта марс тиезе сембе тиевиксть, штоба минь Мордовиянеке виензакшнель, касондоль, мазомкшнель, арсель стамкс, кодамкс минь сонь тяни няйсаськ», - мярьгсь Василий Семеновичень стирец, Людмила Учайкина.