29 апрельста Саранскяи сашендсь XVI Московскяй Очижинь фестивалень Очижинь поездсь. Валерий Гергиевонь управлениянц ала Мариинскяй театрань Симфоническяй оркестрась выступандась И.М.Яушевонь лемса Государственнай музыкальнай театрать сценанц лангса. Содаф коллективть выступлениянза етафтфтольхть республикань вятить Владимир Волковонь ширень кирдеманц мархта.
Лятфтасаськ, Валерий Гергиевонь Очижинь поездоц сашендсь Мордовияв омбоцеда ни. Меля Мариинкань Симфоническяй оркестрать вятиец надияфтсь Саранскяйста классическяй музыкань кельгихненди самс Мордовиять столицас нинге весть. Эсь валонц маэстрось кирдезе. Тя мезть сембе мирса содаф коллективсь макссь Саранскяйса кафта концертт.
Благотворительнай концертсь максфоль шитемба, тяза тертьфоль пяк лама шаба, васендакиге – республиканскяй музыкальнай школань воспитанникне. Выступлениясь етась аншлаг мархта. Аф сяда кржа ваны пуромкшнесь Симфоническяй оркестрать илядень концертозонза, коса ульсь и Мордовия Республикань Оцюнять тевонзон тиендисна Владимир Волков.
Кода отмечазе Валерий Гергиев, тядде Очижинь фестивальсь лемтьф рузонь композиторть Игорь Стравинскяень шачема шиста 135 кизонь топодемати. «Жар-птица» балетста сонь сюитадонза башка концертнай программать эса стане жа кайгсть Р.Штраусонь, Ж.М.Равелень, П.И.Чайковскяень, Р.К.Щедринонь произведениясна.
Концертть аделамда меле Владимир Волков азсь Валерий Гергиевонди спасибамань валхт цебярь иляденкса, эрек музыканкса. «Выступлениянте – республиканьконь кизоньберьфонь эряфсонза фкя инь мяляфтови событиясь. Минь содатядязь Тонь кода пяк цебярь музыкантонь, кона лама тись мировой культурать виияфнеманкса, кода пара вайме ломанень, кона фалу тоса, коса эряви лезкс. Тяфта ульсь Цхинвалиса, Бесланца, а Пальмираса тинь концертонтень няезе сембе мирсь. Минь надиятама, што мархтот минь сотрудничестваньке поладови сяда товга», - мярьгсь Мордовиянь лидерсь.
Валерий Гергиев эсь ширденза азсь спасибамань валхт Саранскяень ваныхненди лямбста васьфтеманкса и надияфтсь самс тяза од проект мархта.
XVI Московскяй Очижинь фестивальть рамкаса Мариинскяй театрань оркестрань музыканттне максыхть концертт Россиянь 20 регионца. Саранскяйста Очижинь поездсь тусь Нижняй Новгороду.
Мордовия Республикань Оцюнять Пресс-службац