Мероприятиять эса, кона ётась Сяськомань площадтть лангса Аф мадонды толть ваксса, примасть участия государственнай властень органонь, од ломанень общественнай и патриотическяй пуромксонь представительхне, а тяфта жа Мордовиять столицанц эряенза и инжиенза.
22 июньсь минь странанеконь историяса – ризнамань и мяляфтомань шись. 83 кизода инголе ушедсь инь срафты-калафты и веронь валы сембе войнатнень коряс войнась, конац сявсь минь народнеконь эзда 27 миллион эряф. Войнась мольсь кувака 3 кизот и 10 ковт, илякс мярьгомс 1418 ши и ве. Аф ваномок сембе стака ширетнень и нужатнень лангс, минь атянеке и атянеконь атясна тылса и фронтса тиендезь семботь, штоба тя страшнай войнась шумордаволь Сяськомаса. И тя шиня минь ризнатама сембонь колга, кие эсь эряфонц питненц мархта пяшкодезе эсь шумонц. Мялямсь тя войнать колга ляды минь мялямсонок, кие ляц шиса, - идтнень, унокнень, унокнень унокснон…
Панчфт Мордовияса шачи воиттнень памятникснонды, шавфненди Великай Отечественнай войнань 1941-1945 кизотнень, ульсть путфт республикань Государственнай Собраниять, Мордовиянь Правительствать, ПФО-са РФ-нь Президентть Полномочнай представителень аппаратть, Оцюнять Администрациянц и республикань Правительствать, Мокшэрзянь Митрополиять, Саранск ошень округть оцюнянц эзда.
Тяфта жа панчфт памятникти ульсть путфт военнослужащайхнень, МР-нь правоохранительнай оргаттнень, Афганистанса боевой действиянь участникнень, Севернам Кавказса антитеррористическяй операциянь участникнень, СВО-нь, од ломанень общественнай, ветеранскяй, военно-патриотическяй организациянь, религиознай конфессиянь представительхнень эзда.
Кочкафне почитандазь Великай Отечественнай войнань кизотнень пингса шавфнень, юмайхнень, кулыхнень госпитпльса мялямснон. Сяльде колмоксть ульсть нолдафт оружейнай залпт.
Благодарнай потомкатне ванфтсазь эсь седитсост Отечествань аралайхнень колга мялямть, конат кадозь эряфснон тюремань паксятнень лангс. Вечнай мялям Великай Отечественнай войнань геройхненди, конат кирдезь куломань тюремаса минь Отчизнанеконь!
Мода вакс прянь нолдама ветераттненди!
Мордовиянь Кулятне