Гирянь коряс соревнованиятнень ётафтовомаснон лангс оду ряд варжакстсь Мордовия Республикань Оцюнять Артём Здуновонь эняльдеманцты. Синь лемтьфт Россиянь Геойть лемонц лятфтама, Ардатовскяй райононь Баева велеса шачфти Григорий Слугинонди. Сон профессиональнайста шарфтсь мяль гирянь спортть лангс и пяк оцю ульсь мялец мрдафтомс тя спортть коряс республикав Чемпионатть. Григорий Слугин – афкуксонь пример, афкуксонь патриот, кона виде мяльхть служась Шачема ширети. Шумордамок Рязанскяй воздушно-десантнай команднай училищать, Григорий васенце шиста сявомок СВО-са якась передовои боевой вешфкснень эса вятема. Запорожскяй областень Вербовое велеть араламста военнослужащайсь тись афкуксонь героическяй подвиг – кирдемок тона ширде наступлениянь атакать сон сявозе эсь лангозонза артиллериянь толть , мезсь лездсь тапамс врагть. Минь земляконьке шавовсь, врагонь пулясь сязезе эряфонь кинц. Григорий казьф «За отвагу» медальса и кафтонь крда Мужествань орденца. Афкуксонь Герой! Баева шачема велесонза теенза путф памятник, сонь лемонц каннесы велеса школась и фкя ульцясь.
Григорий Слугинонь мялец арась афкуксонь тевкс – 30-це майста Ардатоваса ётась Мордовиянь Чемпионатсь гирянь спортть коряс. Сон кочкась 60 спортсмен Ардатовскяй, Краснослободскяй, Рузаевскяй, Торбеевскяй, Чамзинскяй райоттнень эзда и Саранск ошста.
Пшкядемок пара валхт состязаниянь участникненди Мордовия Республикань Оцюнясь Артём Здунов шарфтсь мяль тя мероприятить эрявикс шинц лангс. «Минь мархтонтт тячи кочкавоме тяса сянкса, штоба Отечествань Аралайти лемтьф кизоста, конань лемдезе Президентоньке, кирдемс максф валоньконь - кирдемс седиса и мяляфтомс воиноньконь лемсна и Григорий Александрович Слугинонь лемоц ащи тяса нфтема вастокс. Сон – минь Героеньке, кона максозе эряфонц Россиянь и Мордовияса эряй народть инкса, - мярьгсь региононь руководительсь. – Гирянь спортсь – афкуксонь рузонь. Содаса, тя чемпионатсь кармай виияма, арай эрь кизоннекс и лиси республикань райононзон тона шири. Сюкпря сембонди сама кис, Шкайть пилес пачкодест валне, штоба тяфтама чемпионатта, конат кемокстасазь мялямсонк геройхнень лемснон ётафтоволь сяда лама!» Шавф воиттнень лемсна лятфтафтольхть сетьме минутаса.
Чемпионатть панжемаса ульсть тертьфт Григорийнь мала ломаненза – тядяц Татьяна Васильевна, аляц Александр Григорьевич, рьвац и ялганза.
Боецть удавац Алёна Слугина мярьгсь: «Минь семьяньке виде мяльхть азы сюкпря Республикань Оцюняти Артём Алексеевиченди сянкса, мес шарфты оцю мяль геройхнень лемснон ванфтомаса, мес Гришань колга мялямсь кирдеви седиса, што семьясь кирди оцю честь од цёрашабатнень инкса, конат маштозь няфтьсазь эсь пряснон спортса, результатснон касфтомаса. Мирдезе шабакс пингста кельгозе спортть, сатсь оцю сатфкст гиревой спортса – сон пара мяльса няфтезе эсь асушинц Москуса Краснай Площадьса. Тячи минь воиноньке аралайхть мастороньконь,, ванфтсазь мани менельть вельхкссонк. Минь долгоньке – улемс видемяльхть и кирдемс седиса ся ломаттнень, конат максозь эряфснон Отечествать араламанц инкса».
СВО-нь участниксь, штабонь начальникть полафтыец - 345 десантно-штурмовой подразделениянь комплектованиянь начальниксь Наталья Арсентьева арьсесь спортсметтненди сатомс стама жа оцю текшт, кода и сонь одноклассникоц Григорий Слугин.
Соревнованиятненди макссь питне кемонь крда миронь чемпионсь, кафксонь крда Европань чемпионсь, сисемксть араф Россиянь чемпионсь гирянь спортть коряс ветераттнень ёткса, Гиннесонь Книгав суваф рекордсменсь, сембе россиянь гирянь спортть коряс спортивнай судьясь Валерий Притуленко. Сон азондозе, кода тонафтсь Баева велень од цёратнень эса, конатнень ёткса ульсь и Григорий Слугинга:
«Кирдян оцю мяль эсь тонафниенень инкса! Григорий ялганзон мархта (ламоцне тяни максыхть эсь воинскяй долгснон эса) ульсть дисциплинань кирдихть, ёрасть няфтемс пряснон спортса».
Чемпионатсь сувафты эсезонза кафта спортивнай дисциплинат: двоеборье – алятнень ёткса (толчок, рывок) и гирянь кяподема 8, 12, 16, 24 кг – аватнень ёткса. Сяськихне и призерхне вановихть кода личнай зачетса, станя и команднай первенстваса.
Геройхненди эряма! Вечнай слава и мяляфтома Отечествань ванфты Геройхненди!
Мордовия Республикань Оцюнять Пресс-службац