15-це июньцта национальнай иласа ульсть Мордовия Республикань Оцюнясь Артём Здунов и Раис Татарстанста Раиссь Рустам Минниханов. Региононь оцюнятне ванозь аноклаф площадкатнень и корхнесть «Валда Шинясь» праздникть участниконзон мархта.
Мокшэрзянь культурать аф юкстави илань кожфоц тяса маряви перьфпяльге! Оцю сцена лангса «Песнь сквозь века: Защитники земли мордовской» няфтьф прологсь азондсь ваныти геройть колга – фкя семьяса шачф ломанть колга, коса ванфтовихть сире пингста саф питнетне, историясь и койхне.
Шумбракстомок илань участникнень, Мордовия Республикань Оцюнясь Артём Здунов азсь ляпе валхт Татарстан Республикань руководствати мялень путоманкса мокшэрзянь койхнень-обуцятнень ванфтомаса, кяльть кирдемаса, мокшэрзянь культурать вииямаса: «Теенк тя пяк питни и мала! Тя эряви и минь цёраньконди, конат тячи фронтсот, - минь консолидацияньке, ялгаксшиньке, синь шарьхкодьсазь, што тяса сетьме, врагсь аф ётай. И минь синь аф кадсаськ стака пингть. Чёпафттама тячи культурати, мокшэрзянь народть эряфозонза, сире пингонь койхнень мяляфтомаснонды. Минь карматама тянь содама и ванфтсаськ тянь семботь уноконь уноконьконди».
«Минь лад мялезонк васьфтемс тячиень инжиеньконь, райоттнень, региоттнень, конат састь тячи Тетюшевав, - мярьгсь Татарстанонь Раиссь Рустам Минниханов. – Тяса тячи инь оцю мокшэрзясь, Артём Алексеевич – оцю сюкпря, што тинь тячи мархтонк. Мастороньке козя лама нациянь ломаньца, минь республиканьке тожа. Ёфси аф кунара Мордовияса ётафтоме мяляфтови «Сабантуй» праздникть. Тячи минь марса ётафттама тя цебярь мокшэрзянь илать «Валда Шинясь» Татарстанца. И тя сембось тисамазь минь малакс».
«Валда Шинясь» праздникть мархта и Татарстан Республикать Тетюшскяй райононь эряйхненди пара мяльса пшкядсь муниципальнай образованиянь главась Рамис Сафиуллов.
«Валда Шинясь» илати сафне варжазь ламоц национальнай кухнять, примасть участия спортивнай соревнованияса тиемс содавиксокс мокшэрзянь народть семьянь койнзон мархта. Илама ульсь лама мезе мялень салай: тя и интерактивнай площадкат, коень кирди налхкомат и народнай промыслань ярмаркась.
Башка площадка занясь СВО-ти лемтьф экспозициясь, кона лемтьфоль Отечествань аралайхненди.
Содаф машты кядень умелецнень ульсть няфтьфт декоративно-прикладной искусствань предметтне «Тюштянскяй ярмаркаса»: сувенирхт, шуфтста керсефт, наряжамбяльхть и ламоц лия. Инжихне пара мяльса сувсесть мокжэрзянь подворьяв – ванозь сире пингонь кудть и калонь кундай дворть, конатнень азоравасна виде мяльхть азондсть мокшэрзятнень калонь башка кундамань асушиснон колга.
Илать мяляфтови атрибутоц – национальнай тюремась, мокшэрзянь шабань налхксематне, спортивнай соревнованиятне вийнь и отькорьшинь няфтемать коряс.
Виде, эрь инжить мяленц коряс, можналь щамс-варжамс мокшэрзянь сире пингонь костюмть, шамс пильгозонза карьхть и варжамс молемс коромысла мархта веденкса и лийхтемс пятнакудста цяраня каша или лям мархта.
Мордовияста саф артисттне ускстсь «Валда Шинясь» илань инжихненди пяк мяляфтови концертнай программа, а тяфта жа сцена лангса примасть участия творческяй коллектифне Татарстанцта, Чувашияста и Ульяновскяй областьста.
Мордовия Республикань Оцюнять Пресс-службац