Койхнень коряс илать ушедоманц инголе Покравонь храмса кона лемтьф Пресвятой Богородицати ётась праздничнай литургия. Конань ётафтомда меля эряйхне и велень инжихне праздникть ётафтомс аноклаф площадкав.
«Пяк цебярь, што Мордовияв тя праздникть васьфтема ардыхть сембе сят, кие тяса шачсь, мзярда бди работась, кие лувсы прянцы мокшэрзякс! Тя илась лама нациянь – тяса и руст, и мокшэрзят, и татархт. Мархтонк тячи СВО-нь участникт семьяснон мархта, - республикань Оцюнясь азсь мяль-вал фестивалю саф инжихненди. - Кунардонь пингста минь сиредонга сире атяньке васетькшнесть тя шиня, корхнезь шарфнесть мяль сталмотнень и пичетьфти прябалатнень лангс, арьсесть вандыень шить колга. Тя афкуксонь седиень пиксома васта! Эрьда ванфтсаськ тя койть! Сембе минь сотфтама нарде сюреса, сяс минь аф синдефтяма киндинге. Сяськомась ули мельганк, и каткт «Акша Келусь» виияй и панжезь панжи сяда тов».
Мордовия Республикань Оцюнясь казсь оцю наградат, синь ётксост культурань сфераса покодихненди, отличиянь тяштькст «За смелость и отвагу» СВО-нь участникненди, а тяфта жа Сюконяма сёрмат спецоперациянь участникнень мала ломаньцнонды.
Мордовия Республикань Госсобраниянь Председательсь Владимир Чибиркин мярьгсь, што праздниксь «Акша Келу» ванфтсыне и кемокстасыне мокшэрзянь народть коензон и обуцянзон, историянц: «Козядонга козя мокшэрзянь народть историяц, а ломаттне тяса мазыхть, виихть и тазат, тевонь кельгихть. Аньцек сембе марса, лездозь фкя-фкянди, минь пяшкодьсаськ сембе вешфкснень – сят, кие аралай мастороньконь эса передовойса, и сят, кие малафтсы сяськомать эсь тиф тевонц вельде. Минь мольхтяма аньцек инголи – республикать шнама и цебярьгофтома тевса и минь кельгома Россияньконьконь инкса».
Православнайхненди Святой Тройцять мархта пшкядсь Покравонь Пресвятой Богородицать лемса храмть настоятелец иерейсь Николай, сон макссь сембонди шкаень бславама.
«Вов ни кода кафта десятка киза тяса, зубово-полянскяй модать лангса, минь ётафнесаськ «Акша Келуть». Тяфтама национальнай илатне кандыхть эсь эсост инь оцю и эрявикс питнеть – шачема модати кельгомать и ялгаксшинь аф фкя лацонь нациятнень ёткса соткснень кемокстамаснон», - мярьгсь Зубово-Полянскяй райононь главась Владислав Поршин. Сон седиваксста азсь сюконяма валхт сембе артисттненди, конат примасть участия фестивальса, инжихненди, Мордовия Республикань Оцюнять – ялгаксшинь сотскснень кемокстамаса, обуцятнень шнамаса.
Официальнай частть шумордамда меля Артём Здунов корхнесь инжихнень мархта, ванозень «Этнодеревня» павильонть няфтьфксонзон - эрьсь эздост азонды сире койхнень и обуцятнень колга, конашкава мазыхть и мяляфтовихть мокшэрзянь национальнай щапне, няфтьф народть бытоц. Павильоттнень эса аноклафт выставкат декоративно-прикладной тевть няфтевомаса, мастер-класст, тиф изделиятнень мимань ярмаркась. Аф юкствикс арась гастрономическяй программать нфтевомац национальнай кухнясь.
Праздникса примасть участия кода искусствань мастерхт, станя и самодеятельностень артистт. «Акша Келуса» ульсь арьсеф гармониянь праздник – инжихне топафтозь седиснон «Играй, гармонь!»
Республиканскяй народнай творчествань фестиваль-конкурсста гала-концертть номеронзон кулхцондозь.
Ремесленнай куднясь панжезень кенкшензон инжихненди и няфтезень сире пингста ванфтф койхнень ремесленнай тевть коряс. Эсьотям ширекс «акша келуть праздникса» - арась кара каршек мокшень национальнай «Офтонь вий» («Медвежья сила») карксса тюремась.
Ня шитнень Мордовияса покоди Россиянь культурань министераствать мархта аноклаф фольклорно-этнографическяй экспедициясь Мордовияса эряй нароттнень этно-культурнай эсь лацонь сатфксснень тонафнемаснон коряс, кона тожа ульсь «Акша Келу» иласа.
Мордовия Республикань Оцюнять Пресс-службац