Региононь руководительсь китькстазе «Учитель года» пялькстомать эрявиксшинц, кона ётафневи колмогемоньцеда. Тя аф аньцек пялькстома тонафтыхнень ёткса, тя васта, коса няфневихть педагокнень од мяльсна-арьсемасна, ётафневи од методикатнень мархта полафтомась.
«Юмафтыхть тяса аш, - азозе Артём Здунов. – Сяс мес мушендовихть од технологият, пялькстомась максы возможность ваномс, кода покодихть лиятне – тяни аф мярьгондеви сёлгондовомс и ащемс вастса. Эряви, щтоба тонафтыхне ванольхть сяда виихнень мельге».
Мордовиянь Оцюнясь тяшкстазе, што регионца тиеви тяниень пингонь образовательнай инфраструктура. Тядде панжеви колма школат, сембе оцюфт. «Но сембось тя кев и кирпиць, мезе кармай ломаньфтома? Максомс зданияти вайме – тя оцю тев, - азозе сон. – Эрявикс задачаньке, штоба эрь шабась, республикань эрь кодама вастса получаль цебярь образования».
Пялькстомать республиканскяй этапсонза примась участия 21 тонафты районцта и Саранск ошень округста – муниципальнай этапонь сяськихне. Пялькстоматнень пингста ульсть кочкафт вете суперфиналистт, конат поладозь пялькстомать сяда тов Мордовия Республикань инь цебярь тонафты лемть инкса. Тяфтамкс арасть: 1. Юлия Ермакова, 9 № Рузаевскяй школань рузонь кялень и литературань тонафтысь; 2. Елена Журавлева, 27 № Саранск ошень округонь биологиянь тонафтысь; 3. Любовь Конышева, 1 № Инсарскяй школань начальнай классонь тонафтысь; 4. Михаил Ошкин, Сире Шайгавонь школань физкультурань тонафтысь; 5. Людмила Темаева, Чамзинскяй райононь 2 № Комсомольскяй школань рузонь кялень и литературань тонафтысь.
Мордовиянь Оцюнясь макссь суперфиналисттненди диплопт и ярмаконь получамс сертификатт. «Учитель года» пялькстомаса сяськикс арась Юлия Ермакова 9 № Рузаевка ошень школань рузонь кялень и литературань тонафтысь. Сон няфтьсы Мордовия Республикать «Учитель года России – 2024» пялькстомань финалса тяддень октябрьста.
Пялькстомань сембе участникнень поздравляндазень Саранскяень и Мокшэрзянь митрополитсь Зиновий и пялькстомань жюринь председательсь, народнай образованиянь и наукань Мокшэрзянь работниконь Профсоюзть республиканскяй организациянц председателец Юрий Базов.
Мордовия Республикань Оцюнять пресс-службац