2017 кизонь 10 февральста Россиянь Национальнай Дельфийскяй советсь ушедозе Дельфийскяй налхкоматнень эса участвондаманди Российскяй Федерациянь региоттнень эзда заявкань примамать. Синь обработкасна кармай вятевома «Апполон» информационнай системаса (reg.delphic.world).Кода и сембе странаса, Мордовия Республикань сборнайть пуроптомац должен аделавомс тяддень 28 февральть самс, а 13 мартти делегациятненди кучевихть Налхкоматнень эса участвондаманди подтвержденият.
2017 кизонь 18-23 апрельста Свердловскяй областьса етайхть Кемготувоце од ломанень Дельфийскяй налхкоматне. 2017 кизонь Налхкоматне сувсихть официальнай федеральнай мероприятиятнень лувксс, конат кемокстафт Российскяй Федерациянь Правительствать Постановлениянц мархта.
Важна отмечамс, што состязаниятнень эса участвондамста од дельфиецне тюрихть аф аньцек индивидуальнай зачетса вастонкса, синь аралакшнесазь емла родинаснон честенц – пялькстоматнень итокснон коряс етафневи Российскяй Федерациянь субъекттнень еткса официальнай команднай первенствась, конань показателенза путовихть 2017 кизонь региоттнень Дельфийскяй рейтингснон основас.
Соревнованиятнень программас сувай 29 номинация, конат содафт ни участникнень и зрительхнень еткса: народнай, академическяй, сольнай и ансамблевай морамась; театрась; тяниень пингонь народнай и классическяй кштимась; цирковой, кулинарнай и парикмахерскяй искусствась; щамонь дизайнць; тележурналистикась; фотографиясь и лиятне.
Состязанияса участия примайхть кштимань и театральнай коллективт, хорхт, вузонь, училищань тонафнихть, сольнай исполнительхть, конатнень выступлениясна отвечайхть программнай вешфксненди (www.deiphic.world/games/russian/sixteenth/programm/)
Дельфийскяй налхкоматне эрь-мезня лувондовихть кизоньберьфонь оцю событиякс, пуропнихть лама ванны и макссихть возможность од асу ломаттненди афкукс лисемс»оцю сцена лангс». Тяфта, исследованиянь даннайхнень мяльс сявозь, конань етафтозе социальнай процессонь мониторингонь Центрась, нинге 2016 кизонь Налхкоматнень ушедомда инголе Тюменень эряйхнень 37 процентсна содасть малаткшни мероприятиять колга.
Налхкомань мероприятиятнень квалма кармайхть пачфнема ведущай федеральнай телевизионнай каналхне, газетатне и журналхне. Дельфийскяй налхкомань Интернет-телевидениясь ДЕЛЬФИК.ТВ (www.delphic.tv) няфтьсыне сембе номинациятнень прямой эфирса. «ЛайфУрал» компаниянь даннайхнень коряс, 2016 кизоня Налхкоматнень мельге вантсть Россиянь 189 ошень эряйхне, а стане 18 странань ломаттне – Австралиянь, Великобританиянь, Германиянь, Грузиянь, Израилень, Испаниянь, Казахстанонь, Кыргызстанонь, Латвиянь, Молдовань, Россиянь, Сербиянь, Словакиянь, США-нь, Турциянь, Украинань, Чехиянь.
Налхкомань лауреаттне традицияс коре получайхть золотань, сиянь и бронзань медальхть, Сяськихнень и призерхнень кочкасыне общероссийскяй жюрись, конань составс сувайхть искусствань мастерхт, продюсерхт, искусствоведениянь профессорхт и докторхт.
Справка:
Налхкоматнень шачемань и етафтомань вастокс лувондови минь эрадонк инголе 582 кизось, Грециясь. Кода и Олимпийскяй, стане и Дельфийскяй налхкоматнень етафнемасна лоткафтфоль 1600 кизода тяда инголе и эреклафтфоль XX векть ушетксста: 1927 кизоста сявомок 1930 кизоти молемс Грецияса етафневсь Дельфийскяй фестиваль, но Омбоце мировой войнась лоткафтозе искусствань инь оцю форумть етафнеманц.
Дельфийскяй налхкоматнень од эряфсна ушетфоль аньцек 2000 кизоня, мзярда етафтфтольхть тяниень пингонь васенце всемирнай Дельфийскяй налхкоматне. 18 номинацияса участия примасть 938 ломанць, а жюрить составс сувасть 13 странань представительхть. Тячиень шити Международнай Дельфийскяй налхкоматнень эса уаствондай 65 страна.
2014 кизоня нолдафоль Дельфийскяй налхкоматнень од форматсна – Европейскяй Дельфийскяй налхкоматне. Васенце состязаниякс арасть Васенце панжада од ломанень Европейскяй Дельфийскяй налхкоматне (Волгоградсь, Российскяй Федерациясь), конатнень эса участия примась 26 страна.
Национальнай уровеньца етнихть башка государствань Налхкомат, конат арсихть отборочнай состязаниякс, вельдост пуропневихть международнай дельфийскяй соревнованиятненди сборнайхне. Тяфта, Российскяй Федерацияса етафтфоль кеветие од ломанень дельфийскяй налхкома.