Старошайговскяй райононь Новотроицкое велеса тя нинге и престольнай праздник. Тройцяста тяса фалу шарфтыхть мяль Велень шить шнаманцты. Божественнай литургиять аделамда меле сембе велеряйхне и инжихне храмста састь стадиону, коса ульсь ётафтф од семьятнень и лац трудяй ломаттнень шнамасна.
Тя кизоть Новтроицкяи праздникть ётафтовоманц лангс ванома сась Мордовия Республикань Оцюнясь Артём Здунов. Илась ушедсь сетьме минутань кирдемаса велеряйхнень лемснон лятфтазь, конат, ужяленди, ашесть мрда куду воинскяй долгонь максомста. «Воинская Слава» траурнай гирляндать ВО войнаса шавф воиттненди памятникть видес ульсь максф Новотроицкяй средняй школань тонафнихненди. Праздниксь кочказе сембе велеть, народта сась лама! Концерт мархта састь Саранскяйста артистт. Перьфпяльге кайгсть фкя пяк лац содаф мороста мялень пети валхне: «И на радость друзьям дочку замуж сосватаем, Чтоб родилась семья для России моей…»
А Новотроицкяйса, пожалуй, республикать коряс сембода лац содасазь , кода кочкамат семьятне, тевонь кельгозь трудяма и касфтомс шабат. Республикань Оцюнясь сембонди азсь мяль-валхт Святой Тройцянь шить мархта, а нинге мярьгсь, што прянь шназь азонды велеса покодихнень колга. «Тяфта покодезь, кода Новотроицкяйса, минь тисаськ эрь тевть», - мярьгсь Артём Здунов.
Новотроицкяйсь - тяниень пингонь российскяй велеть эталоноц. Тяса ули стабильнай производства – покоди «Новотроицкая» агрофирмась, кона сувафты лама путфкс велень инфраструктурать виияфтоманцты. Идень садиксь, школась, стадионць, кеме сельхозпроизводствась и оцю мялень путовомась од ломаттненди – велеть тя визитнай карточкац. Тя сембось нолдаф тевс бизнесть и республиканскяй власттнень марстонь покодемаснон ёткса соткснень кирдемасна. «Тяса эряйхть афкуксонь труженикт, - мярьгсь Мордовиянь Оцюнясь. – Минь сяськтяма. Катк сотовихть семьят, катк бизнессь моли инголи. Дай Бог, штоба минь сяда курок сатолеськ сяськомать, пейса сусколеськ сонь фашисттнень кядьста».
Новотроицкяйса ули цебярь обуця: од специалисттненди, конат сайхть вели работама и эряма , максови эряма васта . 20 кизоньберьф строяф 70 лама од куд! Тя инициативась «Новотроицкий» агрохолдингть генеральнай директоронц Владимира Руженковонь. Кафта од семьят получасть панжемат эряма вастонди тя кизоть! Сергей и Юлия Пономаренко састь Новотроицкяи Моску ошста. Семьянь оцюсь шачемас коре Воронежскяй областьста, а сонь рьвац - Сире Шайгав велеста. Семьяса касы цёроксшна Владислав. «Сюкпря сембонди од эряма вастонкса. Короттама, мес ашеме са сей тяда инголе. Карматама эряма-ащема и шабат раштама», - мярьгсть миртть-рьват.
Нинге фкя семья, конанди максфт панжемат, - Ярослав и Ольга Глухич. Синь од тонафтыхть, Ольга киза ни кода покоди школаса начальнай класса тонафтыкс, в од тонафнема кизоть мирдец тяфта жа сувай школань кенкшка. И сияк – од и валда куд! Республикань Оцюнясь арьсесь од семьяти павазу эряф и семьяса пяшкодевома.
Ули Новотроицкяйса и нинге фкя цебярь кой: эрь кизоня шарфтови мяль инь ёмла шачфнень и синь шачфтыснон лангс. Коляскань парадть васьфтезь цяпазь! Сембе тядятне-алятне и шабатне получасть казнят.
Тячи сембе мастороньке кемокставсь марс тя кяжи войнать инголе. Мокшэрзянь масторть цёранза аф пелезь и виде прят макссазь эсь воинскяй долгснон специальнай военнай операциянь фронтса. Ужяль, куду мрдайхть аф сембе, синь ётксост и Новотроицкяйса шачфне. Но синь семьясна апакт юкстакт. Сюконяма сёрма Мордовия Республикань Оцюнять эзда имяляфтови тяштьксть максфт Шувалов Александр Николаевиченди и Светлана Григорьевнанди – СВО-нь участникть шачфтыензонды, Мужествань кавалеронь орден и «За отвагу» медальхть Евгения Шуваловати, Рахматуллаева Нина Сергеевнанди – СВО-нь участникть урьванцты, Мужествань кавалеронь ордетт Евгения Рахматуллаевати, Ирина Исаевати – СВО-нь участникть Рихорд Исаевонь урьванцты.
«Новотроицкий» агрохолдингть генеральнай директороц Владимир Руженков азсь пара мяльхть Мордовия Республикань Оцюняти Артем Здуновонди велеть лангс шарфтома мяленц, сяда тов моли од вешфкснень колга.
«Ётай кизоть Артём Алексеевичень лезксонц вельде минь лац петеськ школать, тя кизоть Тройцяти ацаськ од кить Советскяй ульцять кувалмова, тиф ушеткс од специалистонди посёлкать 15 кудста строявоманцты. Ёратама цебярьгофтомс ведень нолдавомать, карматама строяма од кит, велеть сяда тов цебярьгофтсаськ, приматама участия федеральнай программава. Но сембода оцю кенярдеманьке – тя шабань шачемась. Ломаттне лядыхть, сяс мест яса ули покодема тев и ярмакт, цебярь и козя инфраструктура, путфт сембе вешфксне эрямань коряс», - мярьгсь сон.
Мордовия Республикань Оцюнять Пресс-службац