8 майста Атяшевскяй райононь Дюрки велеса Мордовиянь Оцюнять тевонзон тиендисна В.Д.Волков панжезе «Шавф воиттненди» одкстоптф монументть. Тя шиня велеть кучкаса пуромкшнесть сембе велеряйхне. Стане жа тя оцю событияти сашендсть маластонь велетнень эзда и райцентраста ломатть.
Владимир Волков поздравляндазень пуромфнень Победань илать и од монументть панжеманц мархта.
- Победань шись странасонк инь главнай илась, и тя великай шить карша минь панчсаськ монументть тинь земляконтень, Великай Отечественнай войнань участникнень лятфнеманкса. Минь мяляфтьсаськ сембонь, кие максозе эряфонц воляшиньконь инкса, сянкса, штоба эряль странаньке, эряляме минь и иденьке. Дюркань пцтай 400 эряйсь ашесть мрда фронтста, етксост ламоль ломаньда, конат отмечафтольхть боевой казнеса, кит вернайста служасть Отечествати. Минь фалу должеттама мяляфтомс ломаттнень колга, конат макссть тейнек эряф. Тейнек азонкшнема колгаст иденьконди, штоба синь улельхть анокт стане жа кода атясна араламс эсь Родинаснон, - отмечазе Владимир Волков.
Дюркинскяй школань тонафнихне ащесть алянь атяснон, конат участвондасть Великай Отечественнай войнаса, фотографияснон мархта. Ужяленди, велеса ашезь ляда фкявок ветеран. Монументть эса печатлафт войнань 426 участникть лемсна, синь лемозост палы Вечнай толсь.
Тяка вастса 1986 кизоня панчфоль «Шавф воиттненди»васенце монументсь, кона ульсь Дюрки велети инь оцю достопримечательностекс. Но 30 кизоста памятниксь арась аварийнайкс, и меля сонь вастсонза ушетфоль од монументть строямац.
Атяшевскяй райононь оцюнясь В.Г.Прокин отмечазе, што од памятникть строямац ульсь Дюрки велень эряйхнень наказснон еткста фкякс. Стане жа велеряйхне эняльдсть тиемс ремонт Оцю Сарка ляйть туркс сети и фельдшерско-акушерскяй пунктти.
- Сембе наказонте пяшкотьфт республикань руководствать и лична В.Д.Волковонь ширень кирдемаснон вельде, - китькстазе Виктор Григорьевич.
Трудонь ветеранць М.Н.Гутрина сембе велеряйхнень лемста азсь благодарностень валхт Владимир Волковонди велень ломаттнень прябаласнон лангс мялень шарфнеманкса.
Дюрки велеса шачф-касф воиттне лятфтафтольхть минута кашт аф молезь ащезь. Инжихне, конатнень етксольхть РФ-нь Государственнай Думань депутатсь А.В.Воробьев, региональнай министерствань вятихне, Ардатовскяй и Атяшевскяй епископсь Вениамин, и и школьникне путсть монументти панчфт и венокт.
Стане жа Владимир Волков ванозе капитальнайста ремонтировандаф фельдшерско-акушерскяй пунктть. ФАП-ть кабинетонза козякофтфт тяниень пингонь оборудованияса. Тя пингть пациенткась Н.НУчеваткина видеосвязть коряс получась консультация Медицинскяй катастрофань службань специалисттнень эзда, конат кошардозь сонь етамс обследования Саранскяйса Республиканскяй клиническяй больницяса.
«Известия Мордовии»
Р.S. Великай Отечественнай войнань кизотнень Дюрки велеста фронту тусь пцтай 600 эряй. 400 ламось шавовсть тюремань паксятнень лангса, куду мрдась 155 ломанць. Героизманкса и мужестванкса Дюрки велеса ламоц шачфне-касфне казьфт орденца и медальса. Велеряйхнень, конат туфтольхть войнас, спискасна тячивок коль пяшкотькшни солдаттнень фамилияснон мархта, конат лувондовсть куляфтома юмафокс, а стане жа кит шавфтольхть мирнай пингста.
1986 кизоня велеряйхнень колга лятфнеманкса Дюркаса путфоль эсь лацонь мраморнай памятник ( М.И.Калининонь лемса колхозть председателенц М.В.Слушкинонь мяленц коряс). Монументть марстонь площадец 435 квадратнай метра, инголе – Вечнай толть мархта площадкась, кучкаса – 18 метрань сереса мраморнай стелась, конань фтала ащи шавфнень лемснон мархта лятфнемань стенась. Путозь памятникть синць велеряйхне, колмоксть колхознай средстватнень вельде петнезь монументть.
Но, ужяленди, 90-це кизотнень ушетксста вестевок апак тиколь ремонт, сяс тячи памятниксь ащи аварийнай положенияса.
Великай Пообедать 70 кизонь юбилеенц карша Дюркаса пуроптфоль велеряень инициативнай группа, конань вятьсы пенсионерсь Иван Павлович Пшеничников. Велеряйхне ушедсть памятникть петеманкса средствань кочкама. Синь мяльснон кирдезь районнай и республиканскяй власттне.