Мордовиянь Оцюнясь Владимир Волков 1 февральста етафтсь рабочай васедема Мордовиять эзда Государственнай Думань депутатть, транспортть коряс комитетть председателенц васенце заместителенц Виталий Ефимовонь мархта. Корхтамась мольфтевсь кочкайхнень наказснон пяшкотькшнемаснон и республикань ки ланогонь инфраструктурать виияфнеманц квалма.
Васендакиге корхтафоль кочкайхнень наказснон пяшкотькшнемаснон колга, конат максфтольхть райононь эряйхнень мархта кочкамада ингольдень васедематнень пингста. Мордовиянь Оцюнясь китькстазе, што тя работась кирдеви республиканскяй власттнень башка контрольснон ала: «Республикань эряйхнень сембе обращениясна, конат поступасть кочкамада ингольдень васедематнень пингста, вановихть пяк внимательнайста. Ломаттненди эрявикс кизефкснень еткста фкяське аф нолдама сельме ингольде – аф ваномок сянь лангс, личнай тя просьба или общественнай поручения. Граждаттнень кочкамада ингольдень сембе обращениясна пуроптфт фкя комплекснай планц, азфт пяшкодемаснон сроксна и тянкса ответственностень кирдихне».
Рабочай васедемать пингста ванфтольхть кизефксне, конат сотфт 2017 кизоня ки лангонь отраслять финансированиянц мархта. Российскяй Федерациянь Правительствать заседаниясонза 26 январьста Мордовиянь дорожнай хозяйствать коряс региональнай программать эряфс етафнеманкса федеральнай бюджетста нолдаф миллиард цалковай межбюджетнай трансферт. Ня средстватне туйхть региональнай, межмуниципальнай и местнай значениянь автомобильнай китнень виияфнеманкса.
Стане жа васедемаса корхтафоль велеса кинь строямань объемтнень касфнемаснон колга, мекольдень вете кизоста тя показательсь республикаса кассь сисем-крда. Тядде Мордовиянь велетнень эса кинь строяманкса федеральнай бюджетста арьсекшеви нолдамс 161 миллион цалковай. «Велень кинь строямать и ремонтть коряс программась пяшкодема качественнайста и педа-пес», - китькстазе Владимир Волков.
Мордовия Республикань Оцюнять Пресс-службац