Шуваланяста, 10 августста, Мордовиянь Оцюнять аф оцю пингс тевонзон тиендисна Владимир Волков васетькшнесь Приволжскяй федеральнай округса Россиянь МВД-нь транспортть лангса Управлениять начальниконц полициянь полковникть Александр Бережноень мархта, кона путфоль тя должностти тяддень 18 июльста РФ-нь Президентть Указонц мархта. Корхтафоль региононь транспортнай инфраструктурать безопасностенц касфнеманц, а стане жа 2018 кизоня футболть коряс Миронь чемпионатти анокламать и етафтоманц рамкаса марстонь работать колга.
Азфоль, што Мордовиянь транспортнай комплекссь козя аф фкя лацонь перевозкаса, тяконь лувксса машина кинь транспортть тевс нолнезь, конань обслуживандакшнесы транспортть лангса Росииянь МВД-нь Рузаевскяй линейнай отделсь. 2017 кизоня Конфедерациянь Кубкать етафтоманц коряс опытсь няфтезе, што оцю культурно-массовай и спортивнай мероприятиятнень етафтомста сталмось транспортнай комплексть лангс ламода касонды. Тянкса эряви виияфтомс транспортнай полициянь подразделениять работанц, тяконь лувксса од технологиятнень тевс нолнезь. Сядовок оржакс тя кизефксне арсихть малаткшни чемпионатти анокламатнень и етафтоманц пингста.
Владимир Волков китькстазе, што марстонь вийхне должетт виияфтомс транспортнай комплексть безопасностенц, а стане жа обеспечендамс республикань эряйхнень и инжихнень преступникнень эзда араламаснон.
Александр Бережной азсь кемама сянди, што республикань лидерть мархта васедемась виияфтсы правоохранительнай ширеса марстонь работать, а сонь итогонзон коряс сатф договоренносттне вятихть преступностть мархта тюремаса од сатфксненди.
Мордовия Республикань Оцюнять Пресс-службац