Мордовиянь Оцюнять аф оцю пингс тевонзон тиендисна Владимир Волков 7 августста етафтсь рабочай васедема Мордовиять и Пензенскяй областть эзга ветеринарнай и фитосанитарнай надзорть коряс Федеральнай службань Управлениять вятиенц Александр Федонинонь мархта. Корхтамась мольфтевсь велень хозяйствань продукциять безопасностенц мельге контрольть обеспечендаманц колга.
Мордовиясь сувси странань ся региоттнень лувксс, коса инь вии агропромышленнай комплекссь.Фкя эряйть лангс нолневи велень
хозяйствань продукциять лувксонц коряс республиканьке занцесыне васенце васттнень Приволжскяй федеральнай округонь и Российскяй Федерациянь субъекттнень еткста. Минь региононьке педа-пес обеспечендакшнесы эсь прянц фкя инь эрявикс ярхцамбяльхнень мархта, тяка пингть нолневи продукциять 60 процентоц мишендеви республикать эзда ширеса. Тяда башка, кода китькстазе васедемать пингста Владимир Волков, улихть ресурст продовольствиять экспортонкса. Сяс велень хозяйствань продукциять качестванц мельге кеме контрольть обеспечендамац пяк и пяк эрявикс.
Стане жа корхтафоль жувататненди пелькс урматнень профилактикаснон колга, тяконь лувксса тувонь африканскяй чумась. «Меля примаф профилактическяй мератне лездсть аф нолдамс юмафкснень, конат пяк оцюфтольхть странань ламоц региоттнень эса. Важна сяда товга кирдемс семботь контроль ала!», - киткстазе Владимир Волков.
Стане жа Мордовиянь лидерсь путсь Россельхознадзоронь территориальнай управлениять инголе задача виияфтомс работать тяда инголе тевс аф нолневи модатнень велень хозяйствань оборотс сувафтомаснон коряс.
Мордовия Республикань Оцюнять Пресс-службац