24 майста Технопаркть НТС-ц заседанияс сась региональнай экономическяй интеграциянь кизефкснень коряс Россиянь Президентть советникоц Сергей Глазьев, а стане жа содаф российскяй ученайхне, РАН-нь академикне.
Рабочай программать рамкаса Мордовиянь Оцюнять нюрьхкяня пингс тевонзон тиендисна Владимир Волков азондсь участникненди 2018 кизонь футболть коряс Миронь чемпионатти Саранскяйть анокламанц колга. Инжихне ванозь строяви стадионть маласта эрямань од комплексть. Сембе объекттнень эса тяниень пингть мольфтевихть активнай строительнай работат. «Чемпионатта меле тяса кармай эряма 35 тежянь ломань. Идень фкя садть минь строяськ ни, строятама нинге фкя, ушедоськ строительнай оцю центрать, поликлиникать строямаснон. Башка гордость марятама «Тавла» образованиянь центрать инкса, коса кармай тонафнема 1,5 тежятть шаба. Кода и Асу шабанди лицейса, тясовок тевс кармайхть сувафневома инь од технологиятне и методикатне, - отмечазе Владимир Волков. – Целайнек 2018 кизонь миронь чемпионатти анокламась мольфтеви графикс коре. Сембе объекттне сувафтовихть тевс тяддень кизоть аделавомс».
Президентть советникоц кизефнесь, кода республикати удалси ванфнемс эряма васттнень строямаснон коряс сявф темпнень. Мордовиянь лидерсь азозе, што афкукс 2016 кизоня объемтне аф аньцек ашесть кирьфтав, меколанкт, синь касфтфт. Сатомс тянь ламода лездсь республикаса эряфс етафневи антикризиснай программась – вете процент алу льготнай ипотекась.
Сергей Глазьев отмечазень пяшкотьф ни оцю тефнень и азсь надияма, што Саранскяйсь достойнайста примасыне чемпионатонь матчнень.
Мордовия Республикань Оцюнять Пресс-службац