3 майста Владимир Волков ванондозень социально-экономическяй вииякшнемань кизефкснень Темниковскяй муниципальнай райононь вятить Сергей Кизимонь мархта.
Сергей Кизим азондсь районть од специалисттненди, уросненди, а стане жа сире и аварийнай фондста етайхненди эряма вастонь строямань, Темников ошса и Андреевка велеса лама квартираса эрямань куттненди капитальнай ремонтонь тиемань, Сире Ковыляй велеса од водопроводонь строямань программаттнень эса участвондаманц колга, избирательхнень наказснон пяшкотькшнемаснон квалма.
Арьсеви инвесторхненди районца пуроптовихть участкат тевс аф нолневи модатнень эзда. Маластонь пингть синь лувкссна пачфтеви ведьгемонти. Велень тефнень вятеманкса наделда башка, инвесторхненди максовихть модат эряма вастонь строяманкса, конат обеспечендафт коммунальнай инфраструктураса. Корхтамась мольфтевсь районца производственнай сферать, перерабатывающай предприятиятнень виияфнемаснон колга, а стане жа ламповай производствать эреклафтоманц квалма.
Башка мяль шарфтфоль районть туристическяй козяшинц, кинь инфраструктуранц виияфнемаснонды.
Кода пачфтьфоль, 2017 кизоня арьсекшневи тиемс капитальнай ремонт Саров-Жегалово-Темников кинь участкати – темниковецненди пяк эрявикс транспортнай артерияти. Сай кизоть ушедови од Кондровскяй седть строямац, конань тевс сувафтомац ламода кирьфтасы Темниковаста сявомок Саранскяи молемс кить кувалмонц. Тядде, Сергей Кизимонь валонзон коряс, муниципальнай казнаста поселениятнень дорожнай сфераснонды арьсекшневи нолдамс 6 миллиотт цалковай. Мордовия Республикань дорожнай фондть субсидиянзон вельде – аделамс Темниковань центральнай курхнень еткста фкять капитальнай ремонтонц. Планца – райцентрань лия ульцятнень ремонтсна, Красное поселкав од кить строямац.
Владимир Волков оцю мяль шарфтсь районть туристическяй сферанц виияфнеманцты. Сергей Кизим азондсь Российскяй флотонь адмиралть Федор Ушаковонь шачемста 200 кизонь топодемати лемтьф аноклави мероприятиятнень колга, великай флотоводецть лемонц мархта сотф васттнень реконструкцияснон и благоустройстваснон квалма. Арьсекшневи пуроптомс мемориальнай комплекс, коза сувайхть Ушаковонь усадьбац, кона строяви-кеподеви ванфтф эскиснень коряс, флотоводецти памятниксь, Славань Аллеясь, Ушаковонь музеец, конань экспозициянзон арьсекшневи келептемс и етафтомс од зданияс. Сембе комплекссь благоустроендави, строяви од ки, кона сотнесыне сембе объекттнень. Владимир Волков макссь поручения кярьмодемс Темниковаса Ушаковонь мемориальнай комплексонц строяманкса проектно-сметнай документациять анокламанцты, отмечамок Мордовияти сонь оцю эрявиксшинц. Стане жа региононь вятись кирдезе Темниковскяй «Золотой кольцоть» панжеманц коряс мяльть ширенц. Туристическяй тя маршрутти сувайхть православнай храпне, монастырьхне и святынятне, конат улихть Темниковскяй районть территорияса. Маршрутть транспортнай обслуживаниянкса тядде ни рамави комфортабельнай автобус, кона козякофтф туристскяй группатнень обслуживаниянкса сембе эрявиксть мархта. Владимир Волков надияфтсь кирдемс проектть ширенц: «Темниковскяй «Золотой кольцось» правас коре должен арамс маршруттнень еткста фкакс, конатнень эзда пуропневи Мордовиять культурнай имиджец, сонь туристическяй ширде эсь лангозонза мялень шарфнемац. Важна, штоба маршрутсь улель вешевикс аф аньцек тястоконь, но и российскяй турфирматнень мархта. Тя – и дополнительнай рабочай вастт Темниковань эряйхненди, и бизнесть инфраструктурнай вииякшнемац, и Темниковскяй районть касоманкса-вииякшнеманкса од вий», - китькстазе Владимир Волков.
Мордовия Республикань Оцюнять Пресс-службац