Мордовия Республикань Оцюнять аф оцю пингс тевонзон тиендисна Владимир Волков 29 июльста ульсь рабочай поездка мархта Кочкуровскяй районца. Региононь лидерсь содафтсь кафта предприятиятнень – семейнай фермать и мясоперерабатывающай комплексть работаснон мархта.
Сабаева велеса сиволень породань куд нумолхнень касфнемаснон коряс семейнай фермась ушедсь работама ефси аф кунара. Панжемс эсь тевонц индивидуальнай предпринимательти Сергей Карауловонди лездсь Минсельхозть ширде 6 миллиотт цалковаень лувксса грантсь. Тяниень пингть строяфт кафта производственнай корпуст куд нумолхнень касфнеманкса (2200 прянди), арьсекшневи строямс нинге кафта и пачфтемс производствать 300 тоннат сивольс кизоти.
Фермерсь азозе Владимир Волковонди, што шачемас коре сон Красноярскяйста, Мордовияв сась работама главнай инжинеркс республикань фкя инь оцю предприятияти. Кафта кизода инголе сась мяльс панжемс эсь бизнесонц, кочказе аграрнай ширеть и тяни мялец келепнемс сонь. Улихть цебярь лездыенза – церанза.
Владимир Волков ванозе куд нумолонь фермать, шназе азоронц и надияфтсь максомс эрявикс лезкс бизнесонц виияфнемаса. Республикань лидерсь азсь мяль предпринимательти арьсезевомс оцю промышленнай производствать колга.
«Минь Мордовияса фалу путнетяма инголенк оцю задачат любой отрасляса, улеза тя велень хозяйства или промышленность, - отмечазе Владимир Волков. – Старандатама улемс васенцекс сембоса, сяс ламоц ширетнень коряс занцесаськ васенце васттнень странаса. Эряви путомс инголет цель панжемс куд нумолонь сивольть производстванц коряс Россияса фкя инь оцю предприятиять».
Велень хозяйствань и продовольствиянь министрсь Владимир Сидоров надияфтсь лац-ряц арьсемс республикань лидерть мархта азф мяльть лангса.
Стане жа региононь вятись ванозе Красномайский поселкаса «Норовский» мясоперерабатывающай комплексть. Предприятиять продукциянц лац содасазь кода республикаса, стане и эздонза ширеса. Меля тяса панчфоль тяниень пингонь колбаснай цех и рамаф высокотехнологичнай оборудования консерватнень, колбасатнень и мясной делекатеснонь нолнеманкса.
Владимир Волков ванозень производственнай площадкатнень и корхнесь предприятиянь работникнень мархта. Региононь лидерсь азондсь
республикань аграрнай отраслять сяда товолдонь касоманц-вииякшнеманц, социальнай проекттнень эряфс етафнемаснон, од специалисттнень ширеснон кирнеманц колга. Владимир Волков азозе, што маластонь пингть агрохолдингсь кармай нолнема оцю качествань мороженай, растительнай жирхнень тевс апак нолнек.
Коллективонь од представительхне, аграрнай специальностень выпускникне, спасибасть республикань лидерти агропромышленнай комплексонь специалисттнень ширеснон кирнемань программать инкса. Тяни од аграрийхне получсихть государствать эзда аф емла прибавка зарплатаснонды, а стане жа 100 тежянь цалковаень питнеса «подъемнайхть» работамань васенце колма кизотнень.
Предприятиянь представительхне эняльдсть республикань вятити социальнай ширде эрявикс кизефкснень решандамаса. Тяфта, таколдозь корхтафоль Семилейскяй и Красномайскяй велень поселениятнень эса электроснабжениять лоткафнеманц колга. Лия пяк эрявикс кизефкссь – аш врач велень амбулаторияса. Владимир Волков надияфтсь мумс кит-ятт азф прябалатнень решандаманкса.
Васедемать шумордамста Семилеень эряйсь азсь благодарностень валхт республикань вятити велень территориятнень виияфнемаснон лангс мялень шарфнеманкса. Сянь вельде, што республикась активнайста работай велеть сембе ширде виияфнеманц программать коряс, велева эвондакшни тяниень пингонь инфраструктура: социальнай центрат, спортивнай комплекст, идень сатт. «Минь идень садсонк нльне бассейна ули, коза шабатне якайхть оцю мяльса. Спасиба теенть тянкса!» - мярьгсь од авась.
Мордовия Республикань Оцюнять Пресс-службац