Шуваланяста, 2019 кизонь 30 майста, Мордовия Республикань Оцюнясь Владимир Волков примась участия Саранскяйса Ярославскяй ульцяса «Победань» паркть торжественнайста панжемасонза, ушеткссь конанди путфоль 2015 кизоня 1941-1945 кизонь Великай Отечественнай войнаса Сяськомать 70 кизонь топодеманцты. Эста тяса эвондасть шуфтоня и кусторкскя мархта васенце аллеятне.
Тя васенце парксь, кона строяф Химмашса «Формирование современной городской среды в городском округе Саранск в 2018-2020 годах» программать коряс, сон арьсеф Россиянь Президентть Владимир Путинонь мархта. Символическяй ключть Владимир Волков максозе Октябрьскяй райононь од эряйхненди.
МР-нь Оцюнять валонзон коряс, ошеряйхне ламоксть эняльткшнесть ваймосемань од вастонь панжемать колга, сядонга пяк оцюволь вешфкссна тянь эса Химмашень эряйхнень.
Парксь панчфоль Идень араламань шить карша, кона отмечсеви 1 июньцта. «Минь заботендатама ошеряеньконь благополучияснон колга, башка оттнень, сяс мес шабатне – тя минь сай пингоньке, - отмечазе Владимир Волков. – Минь сяда тов поладсаськ Саранскяйть благоустроендаманц и тисаськ семботь, штоба эряйхненди улель кода парста ваймосемс и етафнемс етка пингснон. Арьсемасонк – строямс парк Татьяна Бибинать ульцяса, нинге фкя – Ремзаводть маласта од микрорайнца. Стане жа одкстоптови Браттнень Веденяпиттнень бульварсна ошть Северо-западнай пялькссонза».
Ваномок паркть площадканзон, Мордовиянь Оцюнясь корхнесь ошеряйхнень мархта, конат азондсть спасибамань валхт республикань руководствати и эстеенза Владимир Волковонди мялень шарфнеманкса и заботендаманкса.
Паркть площадец 24 457,7 квадратнай метра. Тяса строяфт площадкат, коса ули мезьса зянямс пря кода шабатненди, стане и оцюфненди. Ули площадка емла мобильность мархта ломаттненди, стритболса, шра лангонь теннисса налхксеманкса зонат, 6 кизода оцю шабанди и сяда емланятненди налхксемань комплекст, ульцянь тренажер мархта площадка. Стане жа тяса ладяф музыкальнай оборудования мархта сценическяй комплекс.
Озафтфт лама касыкс. Синь алост максф 17440 квадратнай метра. Тяса касыхть пяшет, кальхть, пизелхт, топольхть, ушторхт, шукшторуфт, виндерькст и лия касыкст.
Паркти афкуксонь мазоптомбялькс арась подсвтка мархта фонтанць. Сонь келец 9 метра, ведец кепси 7 метрань серес.