Мордовиянь Оцюнясь Владимир Волков 5 июньцта етафтсь рабочай васедема «КуйбышевАзот» ПАО-ть генеральнай директоронц Александр Герасименконь мархта. Корхтамась мольфтевсь республикав минеральнай удобрениятнень пачфнемаснон колга.
Владимир Волков отмечазе Мордовиянь агропромышленнай комплексть касондоманц-вииякшнеманц. Велень хозяйствань продукциять нолнеманц коряс республикась фалу занцесыне васенце васттнень Приволжскяй федеральнай округонь и Российскяй Федерациянь региоттнень еткса.
«Грамотнай агротехническяй работать, тяконь лувксса удобрениятнень сувафнемаснон вельде, нльне кальдяв погодастовок мекольдень колма кизотнень фалу кочксетяма 1 миллион тоннада лама сера. Мелянь аф теждя кизоня тейнек удалась получамс 1 миллион 144 тежянь тонна. Урожайностсь – 28 центнерда лама гектарста – тя инь цебярь урожайностсь ПФО-са», - лятфтазе республикань Оцюнясь.
Владимир Волков спасибась Александр Герасименконди тундань сокамань-видемань тефнень мольфтемста республикать ширенц кирдеманкса – 50 тежянь тонна минеральнай удобрениянь пачфтеманкса. Тяка пингть Мордовиянь Оцюнясь отмечазе, што тядде путневи задача кочкамс 1,5 миллион тонна сера – тя максы возможность пяшкодемс животноводствать касонды вешфксонзон. Тянкса рабочай васедемать пингста сатфоль договоренность республикав пачфневи удобрениятнень лувксснон касфтоманц коряс.
Ня кизефкснень ваномаса примась участия МР-нь Правительствать Председателенц васенце заместителец – велень хозяйствань и продовольствиянь министрсь Владимир Сидоров.
Мордовия Республикань Оцюнять пресс-службац