Вержиста, 27 мартста, Мордовиянь Оцюнясь Владимир Волков примась участия торжественнай пуромксса, кона лемтьфоль Театрань Международнай шити. Мероприятиясь етась Мокшэрзянь государственнай национальнай театраса.
Владимир Волков, театральнай общественность ила мархта поздравляндамста, рахсезь мярьгсь, што сонь аф ламода аф пара мялезонза ащемс сценать лангса, и занцемс актерхнень рабочай вастснон. «Сяс месс нинге сембонди содаф Константин Сергеевич Станиславскяй мярьгондсь, што «сценань фкя и тяка царьсь и владыкась – тя асу артистсь»!
Седи ваксста поздравляндатядязь тинь – режисерхт, актерхт, сценань работникт и ветератт – Театрань Международнай шить мархта!» - мярьгсь сон.
Мордовиянь Оцюнять валонзон коряс, Россиянь Президентть В.В.Путинонь решениянц мархта 2019 кизось азф Театрань кизокс. «Тяп як важнай события театральнай общественности, минь культураньконди и странаньконди целайнек. Сяс месс театрась ульсь, и фалу кармай Россиять гордостекс. А Театрань кизоть етафтомац – тя тага фкя туфтал театральнай искусствать виияфнеманкса, тетрань коллектифнень ширеснон кирнеманкса, уликс прябалатнень решандаманкса, - мярьгсь сон. – Тядде кармай тиф капитальнай ремонт Някань Государственнай театрати. Мезенкса федеральнай бюджетста нолдаф ни 40 миллион цалковай. Тяда башка, «Театратне – иттненди»
федеральнай проектть рамкаса някань театрась получай гострольнай од автобус. Стане жа ярмаконь средстват нолдавихть «Крошка» театрать материально-техническяй базанц кемокснеманкса. Тяда башка, тяддесь юбилейнай тячиень илань азорхненди. Мокшэрзянь национальнай драматическяй театрати топоди 85 киза. Эрьда марса поздравляндасаськ творческяй коллективть тя событиять мархта!»
Кода китькстазе В.Д.Волков, Театрань кизось – тя нинге ваныхнень кизосна. «Сяс мес театрась – тя искусства, конац васендакиге тонафни улемс ломанькс. Театратне лезнихть ломаттненди касфнемс культураснон, - поладозе сон. – Республиканьконди духовнай оцю козяшикс ащихть 5 профессиональнай театратне. Пара азомс, што тяза сашенды коль сяда лама од ломань, конат лац няфнесазь пряснон кода актерскяй тевса,стане и режиссураса».
Владимир Волков шарфтсь мяль, што Мордовияса виияфневи проектнай работась, тяконь лувксса инклюзивнай проекттне. Тяфта, национальнай театрась и «Крошка» театрась етафнихть эряфс проект ограниченнай возможность мархта ваныхненди. Драмтеатрась арси площадкакс ушеткшни режиссерхненди и од актерхненди, Музыкальнайсь – аноклакшни-етафни школьникненди васедемат театральнай профессиянь ломаттнень мархта.
«Эсь работаснон мархта кеняртьфнесазь ваныть и кемотть народнай театра, сядот самодеятельнай творческяй объединения, коса занцихть пря кода оцюфне, стане и емлатне. Башка мялезе отмечамс «МХАТик» любительскяй театрать, кона кафта кизот мельцек сявондьсы президентскяй грантть, - азозе МР-нь Оцюнясь. – Аньцек меля минь театразонк сашендсь 224 тежянь ломань (сайхнень лувкссна кассь 5 процентта). Няфтьфоль 1600 спектакль. 1,5-крда кассь и гастрольнай деятельностсь (минь артистоньке ульсть странань 10 регионца). Сатомс тянь удалась «Оцю гастрольхть» федеральнай программать, а стане жа грантовай лезксть вельде».
Владимир Волков азозе, што 2018 кизоста сявомок тетратненди творческяй проектснон ширеснон кирнеманкса макссевихть 1 миллион цалковаень лувксса Мордовия Республикань Оцюнять грантонза. «Минь сяда товга карматамтя фалу оцю возможность а макссемонза тя лезксть, сяс месс сон няфтезе эсь эффективностенц, - китькстазе сон. – Васенцесь, театратнень эвондась возможностьсна путомс мялень салай постановкат, тяконь лувксса шабатненди. Омбоцесь, гастрольхне – тя фалу цебярь возможность опытса полафтоманкса».
МР-нь Оцюнять валонзон коряс, Мордовияса эрь театральнай сезонць васьфневи од спектакльса. Меля няфтьфоль 22 премьернай показ, конатнень пингста залса марьти ашель коза прамс.
«Важна, што минь театраньконь коллективсна аф пелезь кярьмотькшнихть кода классическяй, стане и тяниень пингонь произведениянь путомати, - отмечазе Владимир Волков. – Театрань кизоня республикаса етафтови лама оцю мероприятия и премьернай постановка. Башка вастса ащи «Соотечественники» международнай фестивальсь, кона ушеды вандыда меле ни. Эсонза примайхть участия Испаниянь, Венгриянь, Латвиянь, Казахстанонь, Абхазиянь и Россиянь региононь творческяй коллектифне. Кеман, инжиеньке казихть ваныхненди аф юкстави театральнай праздник».
- Театраньконди эрявихть вешендемс од китт-ятт ваныхнень мархта работаманкса, шарфнемс башка мяль образовательнай, воспитательнай ширети. Россиянь Президентсь Владимир Владимирович Путин китькснезе, што театратненди «эряви башка мяль шарфнемс од ломаттнень лангс, касфнемс ваныень од поколения, конат маштыхть шарьхкодемонза театральнай, драматическяй, музыкальнай искусствать». Тиендема тя емластокиге», - мярьгсь сон.
Стане жа азфоль, што Театрань кизоть рамкаса Мордовияса аноклаф культурно-просветительскяй проектонь программа, конат водендафт школьникнень еткса культурать колга содамошитнень пачфнеманкса.
«Тя, кепотьксонди, «МастерОК» идень театральнай студиять панжемац, актерскяй импровизациятнень коряс театральнай чемпионатть етафтомац, «Театральная гостиная», «Семейный клуб», «Театр против наркотиков» и ламоц лия проекттне. Кода мярьгондсь сяка жа Станиславскяйсь: «Шабатненди эряви налхкомс стане, кода оцюфненди, аньцек сяда лац», - мярьгсь Владимир Волков. – Тячи лама корхтави театрать работас од технологиятнень тевс сувафнемаснон колга. Тя, конешна, тяфта. Но уленди, што тя технологиятне тиендьсазь искусствать аф стама мялень салайкс. Можна анокламс фильма и телепередача, цебярьгофтомс актерть вайгяленц, тяниень пингонь техникать вельде можна тиемс семботь. Аньцек аф теждя васькафтомс театраса ваныть. Синь аф полафтовихть мезьсовок. Театратненди инь оцю козяшикс ульсть и лядондыхть оцю профессионализма мархта коллектифне, ломатттне, конат седишкада кельгсазь эсь тевснон».
Выступлениянц шумордамста МР-нь Оцюнясь В.Д.Волков максозень государственнай оцю казнетнень. Тяфта, театральнай искусстваса оцю заслуганкса »Мордовия Республикань Заслуженнай артист»
максф Екатерина Сергеевна Исайчевати – Мокшэрзянь национальнай драмтеатрань драмань артисткати, кона спасибась Владимир Волковонди и республикань руководствати сембе ширдень лезксонь макссеманкса, а стане жа казсь теенза национальнай казне.
Стане жа «Мордовия Республикань Заслуженнай артист» почетнай лемсь максф Каролина Зурабовна Качмазовати – Рузонь Государственнай драматическяй театрань артисткати, Александр Васильевич Лобуревонди – И.М.Яушевонь лемса Государственнай музыкальнай театрань артистти-вокалистти, Алексей Владимирович Чумаковонди – И.М.Яушевонь лемса Государственнай музыкальнай театрань балетонь артистти и лиятненди.
Стане жа Владимир Волков макссь диплопт и ярмаконь премият театральнай искусстваса Мордовия Республикань Оцюнять премиянц сяськинзонды. Стане жа 1 миллион цалковаень лувксса Мордовия Республикань Оцюнять грантонза максфт И.М.Яушевонь лемса Государственнай музыкальнай театрати Джузеппе Вердинь «Травиата» операнц путоманкса, Мокшэрзянь государственнай национальнай театрати «Серебрянное озеро» музыкальнай ефксть путоманкса, Рузонь государственнай драматическяй театрати «Русская классика в русской драме» проектть рамкаса «Васса Железнова» Максим Горькаень пьесанц коряс спектакльть путоманкса.