Шавшиста, 2018 кизонь 2 октябрьста, Мордовиянь Оцюнясь примась участия Кадошкина поселкаса розатнень касфнемаснон коряс од теплицать торжественнайста тевс нолдамасонза.
Владимир Волков поздравляндазе коллективть од производствать тевс нолдаманц мархта, а стане жа макссь оцю казнет инь цебярь работникненди.
«Тячи оцю события кода предприятиянь работникненди, стане и Кадошкинскяй райононь сембе эряйхненди, - мярьгсь МР-нь Оцюнясь. – «Мир цветовсь» республикань фкя инь вии предприятиясь. Сембоц 11 кизоста теплицатнень строямаснонды и реконструкцияснонды инвестировандаф 2,5 миллиард цалковай. Панчф республикаса велень хозяйствань од отрасля – цветоводства, кона отвечай тяниень пингонь вешфксненди и кона арси лидеркс Россияса панчфонь касфни лия предприятиятнень еткса. Республикань руководствась сяда товга кармай кирнема тя отраслять ширенц. Тяда башка, минь башка мяль шарфнетяма райоттнень эса од предприятиянь стройсемати, штоба панчсевольхть рабочай од вастт. Тяфта, «Мир цветовсь» касфни панчфт Кадошкинскяй и Темниковскяй райоттнень эса.
Предприятиясь тядде касфты 34 миллион роза. Мзярда производствась лиси проектнай марнек виенц лангс, минь аратама Россияса розань инь оцю производителькс».
В.Д.Волков азсь благодарностень валхт «Мир цветов» предприятиянь сотрудникненди, а стане жа сембонди, кие примась участия сонь виияфнемасонза, тяконь лувксса тостонь банкненди, омба масторонь партнерхненди.
Мордовиянь Оцюнясь ванозе тепличнай комплексть и керозе предприятияса касфтф 220-це розать.
Лятфтасаськ, што предприятиясь ушедсь виияфневома 2007 кизоня. Тяниень пингть тяса строяфт 5 теплицат, коса касфневи розань 40 сорт. Од комплексть тевс сувафтомста проектнай урожайностсь арай 40 миллион роза кизоти, кона сатови 2019 кизоня. Тя комплекссь кармай Россияса розатнень касфнемаснон коряс инь оцю и инь производительнай проектокс.
Проектть виияфнемац удалась Мордовиянь Правительствать и «КС БАНК» АККСБ-ть, «АКТИВ Банк» АКБ-ть, «Возрождение» банкть Саранскяй филиалонц, Россиянь Сбербанкть Мордовскяй отделениянц лезксснон вельде.
Оборудованиянь фкя инь васенце поставщикокс ащи Dalsem B.V. голландскяй фирмась. Учендови, што предприятиясь сай кизоть, лисемок проектнай сембе виенцты, занясы странасонк касфтф аньцек керф розань рынкать 15 процентонц.
Азсаськ, што 2016 и 2017 кизотнень тифоль реконструкция уликс комплексненди, полафтфт эсост касыксне, мезсь лездсь касфтомс урожайностть и цебярьгофтомс розатнень качестваснон. Сембоц предприятиять работамста керф 220 миллион роза. Эрь шиня тяса керсеви 100 тежянь роза.
Инвестициятнень объемсна 650 миллион цалковай. Тяса панчф 55 рабочай васта. Сембоц колма предприятиятнень эса – «Мир цветов», «Мир цветов РМ», «Мир цветов ТК», работай 255 ломань.
Предприятиять продукцияц пачфневи Федерациянь эрь омбоцекс субъектти, а стане жа Беларусь Республикав.