Мордовиянь лидерсь Владимир Волков 8 августста ульсь 5№ больницять поликлиникаса. Сон содафтсь медицинскяй учреждениять работанц мархта, корхнесь медицинскяй персоналть и пациенттнень мархта и примась участия круглай шраса, кона лемтьфоль республикаса здравоохранениять виияфнеманцты.
Мордовиянь Оцюнять аф оцю пингс тевонзон тиендисна эсь визитонц ушедозе регистратурать, коллцентрать, доврачебнай приемонь и диспанзаризациянь кабинетть работаснон мархта содафтомаста. 5№ больницянь главнай врачсь Анатолий Пинямаскин азозе, што тя медицинскяй учреждениясь работай «Ужяльди поликлиника» принципть коряс. Проектть работанц мархта 5 августста Кировса содафтсь Россиянь Президентсь Владимир Путин и макссь оцю оценка сонь эряфс етафнеманцты. Государствань вятись китькстазе здравоохраненияса фкя инь эрявикс задачать – кирьфтамс врачнень лангста кагодонь сталмоть и кувалгофтомс тянь мархта сярядихнень мархта работамань пингснон. «Ужяльди поликлиника» проектсь лезни кирьфтамс врачти учсемань пингть. «Электронный регистратор» и «Электронная очередь» систематнень работаснон вельде медицинскяй персоналть работасна пяшкотькшневи комплекснай информационнай системать тевс нолнезь, коса мольфтеви медицинскяй документациясь и тяшневи врачненди приемс. Тяда башка, касфневи макссеви медицинскяй лезксть эффективностец.
«Од подхотть целец – теждялгофтомс регистратурать, медработникнень и лабораториятнень работаснон и машфтомс « пациенттнень кабинеттнень эзга якамаснон», - отмечазе Владимир Волков. Сай кизоть арьсекшневи нолдамс тевс тя проектть 2№ поликлиникаса и 4№ идень поликлиникаса, а меле Мордовиянь сембе поликлиникатнень эса.
Поликлиникать ваномста республикань вятити пшкядсь фкя сярядись. Сон азсь спасибамань валхт медицинскяй работникненди мялень шарфнеманкса, цебярь работаснон инкса, а эстеенза Владимир Волковонди – ся мяльть инкса, конань сон шарфнесы здравоохранениянь ширети.
Меле Мордовиянь Оцюнять аф оцю пингс тевонзон тиендисна примась участия круглай шраса, кона лемтьфоль Мордовияса медицинскяй лезксонь системать виияфнеманцты. Владимир Волков мярьгсь, што, макссемок
оценка любой проектть эффективностенцты, башка здравоохранениянь ширеса, эрявихть сявомс мяльс медицинскяй работникнень и пациенттнень мяльсна-арьсемасна. «Сембе, кинь мархта минь корхнеме, отмечсесазь, што «ужяльди поликлиникань» принципсь пяк цебярь. А кда эвондайхть аф сатыкст, синь эрявихть эстокиге петнемс», - мярьгсь Владимир Волков.
Республикаса шумордаф медицинскяй лезксонь максомань колма уровенень системать анокламац. Сон касфтозе макссеви медицинскяй лезксть качестванц и кемокстазе сонь эффективностенц. Мордовияса эряфть кувалмоц сяда оцю средняйста российскяй уровенть коряс и пачкодсь 72 кизос. И тя показательть коряс Мордовиясь ащи 18 вастса.
Вете кизоста строяф здравоохранениянь 55 объект, 44 ФАП, тиф ремонт 100-да лама пчксемань корпусти. Рамаф 1600 единица тяниень пингонь оборудования, конань марстонь питнец пцтай 900 миллион цалковай. Одкстоптф экстреннай медицинскяй службань автопарксь, рамаф 230 од автомобиль. Тядде арьсекшневи рамамс нинге скорай помощень 21 автомобиль. Тядде поладови Саранскяйса Республиканскяй онкологическяй диспансерть, идень и оцювонь поликлиникатнень строямасна.
«Минь здравоохраненияньке аськоляй инголи. Главнай результатсь – кулсематнень кирьфтамасна, республикаса эряфть кувалгофтомац. Вете кизоста республикань эряйхнень лувкссна, конат получасть высокотехнологичнай медицинскяй лезкс, кассь кафтонь-крда. Сяда тов кармайхть стройсевома фельдшерско-акушерскяй пункттне – строяви нинге 53 ФАП и сядоть эса тиеви ремонт. Вете кизоста веронь якамань системань урматнень и туберкулезть сюнеда кулсематнень лувкссна кирсь 40 процентта. Тяниень пингть миньцонк инь кржа кулсида ПФО-са сердечно-сосудистай урматнень сюнеда», - китькстазе Владимир Волков.
Республикань лидерсь отмечазе, што медицинскяй лезксть качестванц касфнеманц эзда ламода ащи демографиясь. Одс шачихнень лувкссна республикаса кассь 13 процентта.
« Кафтонь-крда кирсь аборттнень лувкссна, арась сяда кржа атнайнятнень эзда атказакшнемада. Кизоста кизос тиендеви коль сяда лама ЭКО, касонды процедурать эффективностец. Тя процедурать вельде 2007 кизоста сявомок белай свету эвондась 625 шумбра-таза шаба. Примаф решения тиендемс ЭКО-нь процедурада сяда лама (аф 350 авада кржа кизоти). Тядде етафтфоль 395 процедура, сай кизоть арьсекшневи етафтомс 807 процедура. Тядде республиканскяй бюджетста нолдаф 10 миллиотт цалковай Перинатальнай
центрати специальнай оборудованиянь рамаманкса», - азозе Владимир Волков.
Башка республикань вятись лоткась Мордовиянь здравоохранениять эса уликс прябалатнень лангс. «Лама кизефкста, башка райоттнень эса, эвондась сетть реструктуризациядонза меле. Ломаттне пеняцякшнихть врачнень аф сатнемаснон лангс, башка емла веленятнень эса», - китькстазе Владимир Волков.
Круглай шрань участникне – медицинскяй общественностень представительхне - азозь эсь мяльснон-арьсемаснон тя прябалатнень решандамаснон коряс. Корхтафоль врачнень анокламаснон, медицинскяй техникать тевс нолнеманц, медицинскяй лезксонь системать цебярьгофнеманц колга.