Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Промышленнай передовойса ащихнень поздравляндамста В.Д.Волков лемдезе машиностроениять республикань экономикать седикс и моторкс, вдь сонь эздонза ламода ащи лия сфератнень работасна.
Максомок оценка отрсляти, Владимир Волков азсь кемама, што республиканскяй предприятиятнень ули сембе эрявикссь, штоба тиемс оцю аськолкс инголи регионть промышленнай и технологическяй виияфнемаса. Республикань вятись лятфтазе, што тяфтама задача путни инголенк «О национальных целях и стратегических задачах развития на период до 2024» Российскяй Федерациянь Президентть Указоц. Указть эса башка мяль шарфтф промышленностень сембе отраслятнень технологическяй виияфнемаснонды, цифровой экономикать пуропнеманцты.
«Маластонь кизотнень эряви касфтомс предприятиятнень лувкссна, коса пяшкотькшневихть технологическяй инновацият, 50 процентс синь марстонь
лувксснон эзда, тиемс даннаень курокста пачфнеманкса и ванфнеманкса эрявикс инфраструктура. Сембе вастова тевс сувафнемат цифровой технологиятне, тяконь лувксса «интеллектуальнай машиностроениянь» анокламанкса. Сяс заводонь директорхненди эряви лац арьсезевомс, кодама васта тя процесснень эса должен занцемс тинь предприятиянте, кодама путкс может путомс республикась арьсефть сатоманкса. Лиякс тейнек ули кода лядомс етай пингть эса», - мярьгсь Владимир Волков.
Азфоль, што тяддень кафкса ковста промышленнай производствань индекссь арась 111 процент. Производствань объемтнень касфнемаснон коряс васенце вастс лисендихть – «Рузхиммаш» предприятиясь 9233 процент), «НефтехГазМашсь» (217 процент), «Рефлекс-С» предприятиясь (174 процент), «Неонць» 9163 процент), «саранскяй механическяй заводсь» (130 процент), «ВКМ-Сталь» предприятиясь (125 процент).
Трудть производительностенц коряс инь цебярьхть показательхне – «Рузхиммаш», «Лидер-Компаунд», «НефтехГазМаш», «Медоборудование» завоттнень эса.
Заработнай платать касфнеманц коряс васенце вастсот «Электровыпрямительсь», Ардатовскяй светотехническяй заводсь», «Лидер-Компаунд» предприятиясь, «Медоборудованиясь».
Мордовиянь Оцюнясь отмечазе: колма кизоста республиканскяй предприятиятнень экспортонь объемсна кассть пцтай колмонь-крда. Тяддень кизоть ушедомста отмечаф касома нинге 21 процентта. Но тяка пингть, кода мярьгсь Владимир Волков, улихть резерват, штоба касфтомс и тя цифратнень. Маластонь вете кизотнень ащи задача касфтомс экспортонь объемтнень нинге колмон-крда.
Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Кемготува республиканскяй
предприятиятнень эса эряфс етафневихть производствать келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
В.Д.Волков отмечазе, што оцю сатфкст сатфт фармацевтикаса. Тяддень февраль ковста тевс нолдаф антибиотиконь пяшксе циклань Россияса васенце производствась. Виияфневи приборостроениясь, силовой электроникась и солнечнай энергетикась. Кластеронь пуропнемать вельде удалась эреклафтомс вагоностроениять. Федеральнай уровеньца Мордовиясь кемокснесы эсь мельганза волоконнай оптикать коряс специализациять. Пуроптф «Волоконная оптика и оптоэлектроника» кластер. Сай кизоть панжеви Волоконнай оптикань Инжиниринговай центрась.
Мордовиянь промышленнай предприятиятнень эса нолневи продукцияти оцю вешфкссь аф аньцек Россиянь региоттнень эса, но и омба масторса. Экспортть коряс Мордовиясь работай 80 странань мархта.
Машиностроительнай отраслянь инь цебярь работникненди тя шиня казьфтольхть государственнай и ведомственнай казнет. «Оптикэнерго» ГК-нь директоронь Советть председателенцты Э.А.Боксимеронди максфоль Почетонь орденць.
Стане жа торжественнай собранияса казьфтольхть «Обрабатывающее производство» экономическяй деятельностть коряс Мордовия Республикань инь оцю промышленнай предприятиятнень рейтингснон сяськиенза. Васенце вастть рейтингса занязе «Хелиос-Ресурс» ООО-сь, омбоцеть – «Рефлакс-С» ООО-сь, колмоцеть – «ЭМ-КАБЕЛЬ» ООО-сь.
Мордовия Республикань Оцюнять пресс-службац