8 февральста Республикань Кудса ётась торжественнай пуромкс, кона лемтьфоль Российскяй наукань шити. Мероприятияс тертьфтольхть ученайхне, высшай школань представительхне, наукань деятельхне, инновационнай предприятиянь работникне, а стане жа школьникне,конат заняфт эсь лацонь проектонь анокламаса, производствав тяниень пингонь технологиятнень сувафнемаса. Синь приветствондазень и поздравляндазень ила мархта Мордовия Республикань Оцюнясь В.Д.Волков.
Пуромфнень инголе корхтамста региононь вятись азозе, што ученайхнень, практикнень оцю трудснон вельде мекольдень кизотнень удалась ламода кемокстамс республикать инновационнай, технологическяй виенц.
—Мордовиясь странаса занцесы васенце вастть производствать марстонь объемсонза инновационнай продукциять талеканц коряс. Тя 29 процент,—азозе Владимир Волков.
МР-нь Оцюнясь шарфтсь мяль Мордовиянь Технопаркть работанц лангс, кона 2018 кизоня сувась странаса колма инь цебярь Технопаркнень лувксс. Стане жа отмечафоль научно-производственнай кластерхнень вииякшнемасна. Тяда башка, В.Д.Волков лоткась республикань фармакологическяй отраслять лангс. Валонзон коряс, лама пингста васенцеда «Биохимик» заводти удалась ладямс тяниень пингонь антибиотикнень производстваснон субстанцияста сявомок анок препаратти молемс.
Мордовиянь Оцюнясь отмечазе кабельнай кластерть виияфнеманц, кона обеспечендакшнесы производствань пяшксе циклать.Тячи сон инь оцюсь странаса.
Владимир Волков азондсь республикаса кабельщиконь всероссийскяй совещаниять етафтоманц колга. Валонзон коряс, форумть рамкаса Саранскяйти официальна кемокстасазь Россиянь кабельнай столицань статусть. Стане жа Мордовиянь Оцюнясь ашезе када мялень шарфтомафтома вагоностроениянь, светотехникань, оптическяй волокнань и лия кластерхнень виияфнемаснон.
Региононь вятись пачфтезе, што республикась примай участия «Наука» национальнай проектса, кона васенцеда ётафтови эряфс региоттнень эса РФ-нь Президентть В.В.Путинонь мяленц коряс. В.Д.Волковонь валонзон коряс, тя максы од возможностть инновациятнень виияфнеманкса.
Российскяй наукань шить мархта залу пуромфнень стане жа поздравляндазь Мордовия Республикань Государственнай Собраниять Председателец Владимир Чибиркин, МР-нь Правительствать Председателенц заместителец—промышленностень, наукань и од технологиянь министрсь Александр Седов.
Тя шиня научнай сообществань ламоц представительхне казьфтольхть государственнай казнеса.