Культурань Республиканскяй дворецса етась «Единая Россия» партиять эзда региононь высшай должностной лицать должностьс лихтеви кандидатуратнень коряс пингта инголень вайгялень максомань участникнень «Единая Россия» партиянь первичнай и местнай отделениянь Секретарьхнень мархта васедемасна. Пингта инголень вайгялень максомать эса участвондаманкса кандидаттне лихтьфтольхть 12 майста Региональнай политическяй советть заседаниясонза. Нят: Мордовиянь Оцюнять нюрьхкяня пингс тевонзон тиендисна Владимир Волков, Мордовия Республикань Правительствать председателенц заместителец Владимир Мазов и республикань Чамзинскяй райононь оцюнясь Вячеслав Цыбаков.
Республикань вятись Владимир Волков отмечазень ся цельхнень, конатнень сатнемост Мордовиясь кармай маластонь 5 кизотнень. «Мордовиянь Оцюнять постса маластонь вете кизотнень тейне главнай задачакс арайхть: инновационнай экономикать пуроптомац, промышленнай и сельскохозяйственнай производстватнень и народнай хозяйствань лия отраслятнень виияфнемасна.
- Васенце вастсот – зарплататнень касфнемасна, од рабочай васттнень панчсемасна, здравоохранениять и образованиять, культурать виияфнемасна, граждаттнень социальнай гарантияснон обеспечендамасна.
- Минь поладсаськ доступнай эряма васттнень и качественнай китнень строямаснон. Башка виеньконь водендасаськ жилищно-коммунальнай хозяйствать работанц цебярьгофнеманкса.
- Инь васенце задачась – коррупциять, государственнай средстватнень аф эффективнайста тевс нолнемаснон каршес тюремась. Тя ширеса минь поладсаськ правоохранительнай оргаттнень, законодательхнень, общественнай институттнень и СМИ-тнень мархта марстонь работать.
- Минь целеньке – кемокстамс Мордовиять цебярь имидженц странаса и международнай уровеньца. Оцю возможность панчси 2018 кизонь футболть коряс Миронь чемпионатть етафтомац. Мордовияти нолдамат синь тевс педа-пес. Тяконь лувксса ламода касфтома тяза сашенды туристтнень и омба масторонь инвестициятнень лувксснон», - отмечазе Владимир Волков.
Сонь валонзон коряс, фкя инь эрявикс задачась – избирательхнень наказснон пяшкотькшнемасна. Тя работась кирдеви сонцень Владимир Волковонь контроленц ала.
«Ламоцне накаснень эзда пяшкотьфт ни: панчф велень несколька од автобуснай маршрут, максфт дополнительнай школьнай автобуст и скорай помощень автомобильхть, максф срочнай материальнай лезкс ашуфненди», - мярьгсь Мордовиянь вятись.
Эняльдематне, конат сотфт ошнень, райоттнень, велетнень сяда товолдонь виияфнемаснон мархта, мусть васта республикань Оцюнять Посланияса. Пяшкодеманксост тяниень пингть водендакшневихть федеральнай бюджетонь средстватне.
«Дополнительнай лезкс получайхть моногороттне и поселениятне: Рузаевкась, Атяшевась, Комсомольскяйсь, Уметсь, Кадошкинась, Тургеневась и ламотне лиятне.
Маластонь пингть Саранскяйса и Рузаевкаса панжевихть корпуснай и мягкай мебельть производстванц коряс фабрикат. Од предприятиятненди кармай инвестировандаф пцтай миллиард цалковай, панжеви сядот рабочай васта.
Минь работатама сянь лангса, штоба туристтне шарфнельхть оцю мяль Темниковскяй районть лангс. Большеигнатовскяй районца курок ушедови 17 гектарон площадьса перень серонь касфнема теплицать строямац.
Мольфтеви подготовительнай оцю работа Рузаевкаса и Краснослободскяйса од школатнень строямаснон коряс. Тя райоттнень эряйсна кунара ни эняльтькшнесть тейнек тянь колга.
Благоустройствать коряс оцю работа сави пяшкодемс Саранскяйса, тяконь лувксса китнень цебярьгофнемаснон коряс. Тяда башка, сентябрь ковти аделави Саранскяйть маласта велетнень эса водопроводнай сеттнень строямасна. Минь стане жа кярьмодеме Чамзинкаса водопроводть строяманцты. Лама киза тя ульсь оцю прябалакс тостонь эряйхненди.
Аф ваномок стака пинкнень лангс, минь фалу путнетяма инголенк оцю задачат, лама работатама и сатнетяма результат. Тя стратегиясь лезни сяськондемс тейнек любой сталмотнень. Сяс тячи тейнек ули Мезень мархта молемс ломаттненди, минь кочкаеньконди.
Республикась сатсь няевикс результат инновационнай экономикать строямаса. 5 кизоста Мордовиять вииякшнеманцты нолдаф 260 миллиартт цалковай.
Пяк оцю лезкс тейнек макси странань руководствась и лична Владимир Владимирович Путин.
Мордовиясь – Президентть «майскяй» указонзон пяшкотькшнемаснон коряс странаса васенцетнень еткса. 5 кизоста миньцонк панчф пцтай 15 тежянь од рабочай васта.
Республикати удалась тумс зарплатать коряс Россиянь региоттнень еткста мекольце васттнень эзда. 5 кизоста сонь касомац пачкодсь 75 процентс, реальнай зарплатась кассь – 21 процентта. Ламода кассь учительхнень, врачнень, культурань и социальнай защитань работникнень зарплатасна. Кеняртьфти, што тя профессиятненди кармась сашендома сяда лама од ломань.
Маластонь пятилеткати минь путнетяма задача – эрь кизоня зарплатать касомац должен улемс 1,5-крда сяда оцю средняйста странать эзга показательхнень , и кафтонь-крда сяда оцю инфляциять коряс. 10 процентт номинальнай и 5 процентт реальнай зарплатать касосмац – тя инь емлась сянь эзда, мезсь тейнек сатома.
Тяфта, 2022 кизоти средняй зарплатась Мордовияса должен улемс пцтай 39 тежянь цалковай. Мордовиясь сувси ся региоттнень еткс, коса инь уцес «продуктовай корзинась» и инь емла инфляциясь. Кирнемс питнетнень касомаснон лезни велень хозяйстваньконь виияфнемац и продовольственнай ярмаркатне. Синь пяк вешевихть ломаттнень мархта. Минь сяда товга карматама виияфнемонза тя ширеть.
Политиканьконь кучкаса – гражданонь социальнай ширде лафча категориятне. Минь задачаньке – шабатнень колга заботендамась, од семьятнень ширеснон кирнемац, пенсионерхненди цебярь эряфонь тиендемась, инвалиттненди эрявикс условиянь анокламась. Минь пцтай аш шумоньке зарплатать коряс, ломаттненди фалу панневи пенсия, аф фкя лацонь социальнай пандомат.
Башка контроль ала эряфкшуфнень колга заботендамась. Мордовиясь педа-пес пяшкодезе ветераттнень эрямань условияснон цебярьгофнемаснон коряс задачать, конань путозе странань Президентсь. Виияфневихть лама идень семьятнень ширеснон кирнеманкса мератне.
Социальнай программатнень финансированиясна ащи экономикать состояниянц эзда. Кармай вииякшнема промышленностсь, велень хозяйствась – миньцонк эвондай возможность сядонга оцю лезксонь макссеманкса.
Сяс фкя инь васенце задачась – предприятиятнень апак лотксек работамасна. 5 кизоста промышленнай производствань объемтне Мордовияса кассть 22 процентта.
2015 кизоня Саранскяйса панжевсь оптическяй волокнать производстванц коряс Россияса васенце заводсь, пуроптф «Волоконная оптика и оптоэлектроника» кластерсь. Тядде шумордави волоконнай оптикань Инжиниринговай центрать строямац. Можна мярьгомс, Мордовияса минь пуропттама промышленностень од отрасля – оптоволоконнай приборостроения.
Минь ушедома сатнема сатфкст ся отраслятнень эса, конат виихтельхть миньцонк лама кизода инголе. Васендакиге, тя светотехникась. Тинь содасасть, што Саранскяйсь ульсь Советскяй Союзонь «светонь столица».
Тячи эрь колмоце лампочкась нолневи минь «Лисма» заводсонк. Тяни работатама сянь лангса, штоба лисемс эрь омбоцеть лангс. Минь путоме лама вийда, штоба эреклафтомс тя эсь лацонь предприятиять.
Тяса нолневихть од линият, панчсевихть од рабочай вастт, ломаттне получсихть аф кальдяв зарплата.
Вииякшни «Биохимик» заводсь. Нинге иссяк минь цють ашеськ юмафта предприятиять. Саранскяйса ушедсь работама антибиотиконь импортонь полафни производствась, арьсекшневи ушедомс эсь субстанциянь нолнемать. «Биохимиксь» и Мордовскяй госуниверситетсь панжихть-аноклайхть Россияти эсь лацонь научно-производственнай центра, коса кармайхть аноклакшневома лекарствань од Витт.
Мон специальна азонь конкретнай примерхт, штоба няфтемс, кодама работа пяшкотьфоль, штоба ванфтомс промышленностеньконь.
Тяниень пингть лац работайхть ламоц оцю предприятиятне – «Мордовцементсь», «Рузхиммашсь», «Сарансккабельсь», «ВКМ-Стальсь», «Саранскяй телевизионнай заводсь», «Резинотехникась» и лиятне. Эвондакшни коль сяда лама завод, конатнень эса средняй зарплатась пачкотькшни 30-50 тежянь цалковайс.
Тядде строявихть колма од завотт: од поколениянь кабельхнень, медицинскяй препараттнень и световой приборхнень производстваснон коряс. Кажнайсь эздост кармай нолнема 3 миллиартт цалковайда ламонь питнеса продукция.
Лац работатама импортть полафнеманц коряс. Предприятияньке участвондайхть оцю корпорациятнень виияфнемань программатнень эса, етафневи эряфс «Газпромть», РЖД-ть и лия компаниятнень мархта «дорожнай картась».
Минь активнайста работатама наукоемкай экономикать анокламанц лангса. Штоба технологиятненди улель вешфкс, эряви, штоба предприятиятнень улель интерессна нолнемс высокотехнологичнай продукция.
Производствать марстонь объемсонза инновационнай продукциять пяльксоц тяниень пингть пачкотькшни 28 процентс. Мордовиясь тя показательть коряс странаса инь васенцесь. Инновационнай продукциять производствац виияфнесыне экономикань сембе сфератнень.
Тя ламода лезни касфнемс шири мишендеви продукцияньконь лувксонц касфнемаса. 3 кизоста экспортонь объемтне кассть 2,5-крда. Маластонь пятилеткати путневи задача касфтомс экспортть колмонь-крда.
Оцю задачат путневихть республикань агропромышленнай комплексть инголе. 5 кизоста велеть виияфнеманкса нолдаф 40 миллиард цалковай. Мордовиясь сувси странань вете региоттнень еткс, коса нолневи инь лама сивольда, алда и лофцта. Минь кунара ни педа-пес обеспечендакшнесаськ эсь пряньконь продукцияса. Нолдаф продукциять 60 процентоц мишендеви республикать эзда ширеса – 68 российскяй регионца и омба масторса.
Тейнек пяк важна ванфтомс касомать велень хозяйстваса. Тядде арьсекшневи нолдамс 300 тежянь тонна жуватань и нармонень сиволь, 415 тежянь тоннада лама лофца. 2022 кизоти фкя траксста потфть лувксонц арьсекшнетяма пачфтемс 7 тежятть килограммас.
Оцю задачат ащихть и растениеводствать инголе. Тядде эряви кочкамс 1 миллион 330 тежянь тонна сера, а тяда мельдень кафта кизотнень получамс 1,5 миллион тонна.
Меля велетнень эса эряфс етафтфоль пцтай кемонь инвестиционнай проект. Тя работась поладови сяда товга. Путф задачатнень решандаманкса минь арьсекшнетяма строямс 6,5 тежятть пря траксонди животноводческяй комплекс Дубенскяй районца, 120 тежянь тувонди свиноводческяй комплекс Ковылкинскяй и Торбеевскяй райоттнень эса, 1200 пря траксонди кафта комплекст «Дружба» и «Молоко» обществатнень эса, а стане жа строямс панчфонь касфнемань теплицат Кадошкинаса и Рузаевкаса.
Виияфневи велень хозяйствань продукциять переработкац. Перерабатывающай предприятияньке объемтнень коряс занязь оцю промышленностть. Меля шамтфоль 67 миллиартт цалковаень питнеса продукция, мезсь 16 процентта сяда лама 2015 кизоть коряс.
Тя сатовсь производствать модернизациянц вельде. Ламоц предприятиятне работайхть тяниень пингонь оборудованиять лангса, инь цебярь мировой технологиятнень тевс сувафнезь.
Тячи эрь кемонце российскяй розась касфтф Мордовияса. Арьсекшневи занямс панчфонь рынкать 20 процентонц.
Улема фкявок региононди аш кода шнафтомс пря эряфс етафневи тняра проектть мархта.
Минь участвондатам сембе федеральнай программатнень эса, петнесаськ аграрийхнень эряфснон. Мордовиясь пцтай педа-пес козякофтф газса, стройсеви лама эряма васта и социальнай объект, водендакшневихть од специалистт. Но сембода главнайсь, мезе тейнек удалась тиемс – лоткафтомс велеста ошу ломаттнень тушендомаснон, кирьфтамс велеса безработицать.
Райоттненди инвесторонь вишендемась, велетнень и райцентратнень эса од рабочай вастонь панчсемась – сембось тя ащи васенце вастса республиканскяй и муниципальнай власттнень инголе.
Оцю задачат ащихть строительнай отраслять инголе. Миньцонк эряфс етафневи эряма вастонь строямань эсь лацонь программась. Вете кизоста тевс сувафтфт эряма васттнень объемсна касфтфт нилень-крда, строяф 1,5 миллион квадратнай метра. Тядде строяви нинге 335 тежянь квадратнай метра эряма васта, 60 процентоц конань эконом-классонь.
Нинге мзярдовок ашеме етафне тняра ломань аварийнай эряма вастста. Срафтфт-калафтфт ламоц баракне, сире двухэтажкатне. Тя программатне пяк эрявикст тейнек. Марса строяви 117 тежянь квадратнай метрада лама эряма васта. Пцтай 8 тежятть ломанть цебярьгофтфт эрямань условиясна. Тя программать минь поладсаськ 2020 кизоть самс.
Омбоце кизось республикаса работай 5 процент алу льготнай ипотекань программась. Сон кемокстазе эсь эффективностенц. Аньцек меля ипотечнай кредиттнень лувкссна кассь 60 процентта.
Минь сяда товга арьсекшнетяма виияфнемс льготнай ипотекать, касфнемс эряма вастонь строямать. 2022 кизоть самс арьсекшневи строямс 1 миллион 800 тежянь квадратнай метра эряма васта.
Фкя инь васенце задачаньке – китнень строямасна. Вете кизоста тевс сувафтфоль 450 вайгяльбень кувалмоса кит. Тядде минь строятама и титяма ремонт нинге 130 вайгяльбень кувалмоса китненди. Тянкса нолдави пцтай 5 миллиартт цалковай. Велень китнень строяманкса тядде карьхцяви кафтонь-крда сяда лама средства мелянь кизоть коряс. Оцю работа мольфтеви социальнай сфераса. Главнайсь, ломаттне шарьхкотькшнесазь полафткснень. Кемонь кизоста 20 процентта кассь од шачихнень лувкссна.
Лама средствада нолневи образованияти. Решандаф идень саттненди очередть мархта сотф прябалась. Вете кизоста строяф и ремонтировандаф 52 идень сад. Строяф 5 од школат.
Путневи задача, штоба колма кизода меле школьниконьке тонафнельхть фкя сменаса, а 2025 кизоти сембе школьнай зданиятне кармайхть отвечама тяниень пингонь вешфксненди. Тядде Саранскяйса панжеви од школа «Юбилейный» микрорайонца. Шумордави Солнечная ульцяса школать реконструкцияц. Кода ни азыне строявихть од школат Краснослободскяйса и Рузаевкаса.
Мордовиясь занцесыне васенце васттнень странаса асу шабатнень ширеснон кирнеманц коряс. Минь ученттама эффективнай работа тонафнемань од инновационнай центрать – Идень технопаркть эзда. Тяда башка, тядде Саранскяень колма лицейхнень эса панжевихть пилотнай инженернай класст.
Тянь мархта ряцок аноклави педагогическяй кадрань анокламань Стратегиясь. Минь ванфтоськ олимпиадань призеронь аноклай од учительхненди и педагокненди зарплатаснонды надбавкатнень. Стаки мольфтеви грантовай ширень кирдемась. Азфт специальнай премият идень садонь воспитательхненди.
Китькстаса, што тейнек эрявикс и ошень престижнай гимназиясь, и велень простой школась. Минь главнай целеньке – тяниень пингонь и качественнай образованиянь системать анокламац.
Фкя инь важнай темась – высшай школать виияфнемац. Меля минь отмечаськ Мордовскяй государственнай университетть панжемста 85 кизонь топодемать. Цебярь казнекс тя шити арась главнай корпусть панжемац. Вете кизоста панчф мировой уровенень 80 лаборатория, строяфт од корпуст и общежитият.
Тяни минь задачаньке – анокламс тонафнемань система, конань пингста любой специалистти, кона получась образования Мордовиянь вуснень эса, ули вешфкс тяса, республикаса. Башка эрявикс кизефкссь – вуснень научно-педагогическяй потенциалснон ванфнемац.
Фкя инь таколфты кизефксокс республикань эряйхненди лядонды здравоохранениянь кизефкссь. Мекольдень вете кизотнень Мордовияса етафтф оцю работа тяниень медицинскяй центратнень панчсемаснон, синь материально-техническяй базаснон кемокснеманц коряс. Шумордавсь колма уровененоь системать пуроптомац. Строяф здравоохранениянь 55 объект, ФАП-нь 43 здания, римонт тиф сядода лама пчкафнемань корпусти. Кафтонь-крда кассь республикань эряйхнень лувкссна, конат получасть высокотехнологичнай медицинскяй лезкс.
Тядде поладови Республиканскяй онкологическяй диспансерть, Саранскяйса идень кафта поликлиникатнень строямасна. Сяда тов касфтови ФАП-нь лувкссна.
Тевс сувафтовихть телемедицинскяй технологиятне. Международнай вешфксненди отвечайкс тиемат васенце и омбоце уровенень травмоцентратне. Шумордама скорай помощень диспетчерскяй службать тиемац.
Здравоохраненияньконь улихть и аф емла сатфксонза. Васендакиге, кирсь кулсихнень лувкссна, кувалгодсь эряфсь.
Социальнай урматнень инь цебярь профилактикасна – физкультурась и спортсь. Мордовиясь сидеста азонкшневи странань инь спортивнай регионкс. Спортса прянь занцихнень лувкссна пачкодсь 36 процентс. Моньцень мялезе тяфтама – республикать спортивнай резервац пуропнема минцень воспитанниконьконь лангса, путнемс вийхть и средстват эсь иденьконди, синь виияфнемазост.
Маластонь пингть шумордасаськ Саранскяйса вельхкс ала футбольно-легкоатлетическяй манежть, Лямбирьса стадионть строямаснон, поладови Атюрьеваса и Ковылкинаса вельхкс ала катокнень строямасна. «Детский спорт» проектть рамкаса, конань эряфс етафнесы «Единая Россия» партиясь, тиеви ремонт республикань 15 райононь школатнень спортивнай залснонды.
Тядде ушеткс сявихть партийнай колма од проекттне, конат сотфт территориятнень благоустройстваснон мархта.
Тяфта, Мордовиясь получай 200 миллион цалковайда лама «Городская среда» проектть коряс сядот куд пирьфонь территориятнень благоустройстванкса. «Парки малых городов» проектть рамкаса благоустроендави Рузаевкаса Культурань и ваймосемань парксь. А «Местный дом культуры» проектть коряс од оборудования получайхть Ковылкинскяй, Ардатовскяй, Атяшевскяй, Зубово-Полянскяй, Темниковскяй и Теньгушевксяй райононь культурань учреждениятне.
Минь шарфнетяма башка мяль классическяй искусствать и народнай творчествать виияфнемаснонды, од таланттнень ширеснон кирнеманцты, культурань учреждениятнень стройсемаснонды.
Тядде оцю событиякс арай Саранскяйса Музейно-архивнай комплексть панжемац. Тяда башка, шумордави Кочкуровань и Ардатовань культурань строямасна.
Мордовиясь – финно-угорскяй нароттнень консолидирующай центратнень эзда фкясь. Минь марятама гордость, мес республиканьке арси нароттнень еткса ялгаксшинь цебярь примеркс.
Русне, мокшэрзятне, татархне марса решандакшнесазь социално-экономическяй вииякшнемань задачатнень, марса кеняртькшнихть и ризносихть, марса отмечсесазь эсь национальнай иласнон. И минь обязательна поладсаськ республикасонк эряй нароттнень культураснон, кяльснон, койснон-обуцяснон ванфнемаснон коряс программать.
Тячи Мордовиясь активнайста аноклай 2018 кизонь футболть коряс Миронь чемпионатти. Тядде ни тейнек сувафтомат тевс чемпионатонь пцтай сембе объекттне.
А чемпионатть наследияц – од китне и гостиницатне, эрямань куттне и студенческяй общежитиятне, мазы скверхне и ляй трватне – кармайхть служама республикань эряйхненди лама и лама киза.
Мекольдень кизотне ульсть оцю трудендамань пингокс. Тифти оценка ломаттне макссть мелянь сентябрь ковста, мзярда «Единая Россия» кирдсь кеме сяськома Мордовияса.
Нинге фкя кемокстамакс сянди, што минь кирттяма виде курсс, должетт арамс тяддень сентябрьста кочкаматне – и сембода главнайсь! – 2018 кизонь 18 мартста, мзярда Мордовиясь марса сембе странать мархта кочкасы Россиянь Президентть», - азозе Владимир Волков.
Васедемань омбоце участниксь – Мордовия Республикань Правительствать Председателенц заместителец, экономикань министрсь Владимир Мазов азсь благодарностень валхт довериянкса участвондамс Мордовиянь Оцюнять постс внутрипартийнай кочкаматнень эса. Сон отмечазе, што работамок Волковонь руководстванц ала и сонь командасонза, участвондай республикать социално-экономическяй виияфнеманц единай государственнай политикать эряфс етафнемаса, кона водендаф экономикать кемоста работаманксонза, конкуренциять каршес кирнеманксонза.
«Республикаса инновационнай экономикать кемокснеманкса тейнек эряви маластонь вете кизотнень касфтомс экономикать 1,3-крда, водендамс 330 миллирд цалковаень лувксса инвестицият. Инвестиционнай проекттнень эряфс етафнемста эрь кизоня панчсеви 1,8 – 2 тежянь од рабочай васта.
Мордовия Республикань Оцюнять мархта путневихть оцю задачат, мон кирнеса синь ширеснон и путсайне сембе вийнень республикать инголе путф социально-экономическяй задачатнень пяшкотькшнеманкса», - мярьгсь Владимир Мазов.
Васедемань нинге фкя участниксь Вячеслав Цыбаков эсь корхтамасонза лоткась Чамзинскяй районть социално-экономическяй виияфнеманц мархта сотф кизефкснень лангс, ся сатфкснень, конатнень удалась сатомс Мордовиянь Оцюнять Владимир Волковонь и республикань Правительствать ширень кирнемаснон вельде.
«Чамзинскяй районць – лама отраслянь производствань район. Занцемок республикать территориянц 4 процентонзон, райононьке 2016 кизоня нолдазе промышленнай объемть 19 процентонц, велень хозяйствать валовай продукциянц 15,8 процентонц», - азозе Вячеслав Цыбаков.
Васедемань участникне отвечасть пуромфнень кизефксснон лангс. Отвечамок кадратнень одкстоптомаснон колга кизефксть лангс, Владимир Волков мярьгсь, што республикаса вешендевихть од, асу ломатть. Но и оттнендивок няфнема сяда оцю активность общественно-политическяй тефнень эса. Кадрань ротациясь поладови сяда тов. Государственнай аппаратть одкстопнемафтома аф кармай касома-вииякшнема. Но Владимир Владимировичень позицияц сотнеф кочкаф социално-экономическяй курсть ванфнеманц мархта, кона арьсеф 25-30 кизонди инголи. Государственнай аппаратть пуроптомста эряви путнемс марс од ломаттнень эрьгаснон и эряфкуфнень опытснон.
Мордовиянь вятити максфоль кизефкс налоговай политикать и «серай» заняфшить колга. Владимир Волков отмечазе, што налокнень вельде получси финансирования странаньсоциальнай сферась, обороноспособностсь и правопорядкань оргаттне. Сонь мяленц коряс, тевса заняф эрь ломанти эряви паннемс налогт.
Лия кизефкснень лангс отвечамста Владимир Волков отмечазе тястоконь товаропроизводительхнень ширеснон кирнеманц и федеральнай торговай сеттнень мархта кафцьке ширетненди выгоднай сотрудничествать. Стане жа сон мярьгсь, што Интернетть мельге ваномась кемокстави федеральнай уровеньца и надияфтсь шумордамс Саранскяйса очистной сооружениятнень строямаснон тяддень кизоть песта.