Пяденцяста, 29 мартста, Мордовиянь Оцюнясь Владимир Волков примась участия «Адмирал Федор Ушаков: уроки истории и вызови современности» лем ала Всероссийскяй научно-общественнай конференциять работаса.
Стане жа мероприятияса участвондаманкса Саранскяи састь Россиянь Федерациянь Советонь членць, международнай тефнень коряс ФС-нь Комитетть председателенц васенце заместителец Сергей Кисляк и «ВИАМ» РФ-нь ГНЦ-ть генеральнай директороц, профессорсь Евгений Каблов. Н.П.Огаревонь лемса МГУ-нь Культурань и искусствань дворецть залса пуромфнень приветствондазень Саранскяй и Мордовскяй митрополитсь Зиновий.
Конференциянь участникнень приветствондамста, Владимир Волков отмечазе, што республикати оцю честь васьфтемс авторитетнай ученайхнень и эксперттнень, конат кородозь ванфнесазь Федор Ушаковонь историческяй наследиянц.
«Конференциять етафтомац арась результатокс «Путь к знаниям» научно-просветительскяй центрать и минь ведущай вузоньконь сотрудничендамаснонды, - китькстазе МР-нь Оцюнясь. – Пуромксть сьмекаец-арьсиец и пуроптыец минь земляконьке, РАН-нь академиксь, авиационнай материалонь Всероссийскяй научно-исследовательскяй институтть генеральнай директороц Евгений Николаевич Каблов.
Сембе мирса-масторса содаф ученайсь, сон мзярдовок ашезь лядонда шири емла родинанц эряфонц эзда. Сяс минь пара мяльса кирдеськ сонь пара ушетксонц ширенц».
Кода поладозе Владимир Волков, Федор Ушаковонь тевонза и подвигонза фалу служасть и тячемс служайхть од ломаттнень патриотическяй воспитанияснонды. Нинге шиса улемстонза адмиралсь сатозе народть оцю кельгоманц.
«»Шкабавазть лезксонц вельде, кода корхнекшнесь Ушаков, нильгемоньда лама морской баталияса сон вестевок ашезь лядонда сяськфокс. Сонь командованиянц ала ашель юмафтф фкявок корабль, фкявок матрос ашезь пов пленц вракнень шири. Тяка пингть эсь васенце казненц Ушаков получазе аф военнай действиянкса, а чумань эпидемиять каршес тюреманкса и
матроснень колга заботендаманкса, - китькстазе Владимир Волков. – Ушаков арась мужествань, флотоньконь аф сяськовикс улеманцты символкс, праведностень примеркс. Стака максом оценка эсь пингонь внешнеполитическяй кизефкснень решандамаснонды сонь путксонцты. Сембе сонь эряфоц тонафты эсонк фкяти – нльне эста, мзярда аф кирдевомшка стака, главнайсь лядондомс ломанькс, улемс вернайкс Родинати и присягати».
Мордовиянь Оцюнять валонзон коряс, аф случайна, Ушаковонь орденоц, кона ладяфоль Великай Отечественнай войнать пингста, арась морякнень воинскяй эсь лацоньшиснон инь почетнай знакокс. Сонь получазь сембоц 200 малава ломань, конатнень еткса английскяй и американскяй флотонь офицерхт.
«Тейнек, Мордовиянь эряйхненди, Федор Федорович, башка мала. Именна мокшэрзянь масторть сон кочказе мекольдень кизонзон етафтоманкса. Эсь средстванзон лангс панчсь Темниковаса госпиталь, тись лама пожертвования 1812 кизонь Отечественнай войнать пингста, - азозе В.Д.Волков. – Калмамс эсь прянц Ушаков мярьгсь Санаксарьса, мокшэрзянь масторса. Сяс минь гордостень марязь лемнесаськ Российскяй флотонь легендарнай адмиралть землякокс. Конешна, сембе пингс Мордовиянь эряйхнень мялямса лядыхть торжестватне, конат сотфт Адмиралть Ушаковонь канонизациянц мархта. 2001 кизонь августста Темников ошсь арась духовнай центракс марнек православнай мирти. Канонизациянь церемониять вятезе тячиень Московскяй и сембе Русень Патриархсь Кирилл».
Кода отмечазе республикань Оцюнясь, торжественнай церемониятнень эса примась участия 7 тежяньда лама ломань, конат пуромкшнесть странаньконь ламоц уженянзон эзда. Оцю инжихнень етксольхть Черноморскяй и Балтийскяй флотть мархта командующайсь, Украинань ВМФ-нь главнокомандующайсь, церковнай иерархне. «Кода мярьгсь эста Россиянь ВМФ-нь главнокомандующайсь Виктор Андреевич Кравченко :» Тняра адмирал вестевок ашезь пуромкшне Россиянь Военно-морской флотть Коллегияс», - поладозе сон. – Обществаса духовнай оцю эрекламась кошардомазь минь нинге фкя оцю тевс – строямс Саранскяйса Федор Ушаковонь лемс Кафедрадьнай Собор. Тя минь главнай достопримечательностеньке. 2006 кизоня собрть святиндазе Патриархсь Алексий II.
Стане жа Саранскяйса панчфоль Федор Ушаковонди памятник. Церемониять вятезе Россиянь Президентсь Владимир Владимирович Путин, кона отмечазе,
што «Мордовиясь арась Россиянь духовнай центратнень эзда фкякс, странань фкя инь лац касонды-вииякшни регионкс»».
Региононь вятись лятфтазе, што кафта кизода инголе республикаса етась несколька мероприятия, конат лемтьфтольхть Федор Ушаковонь лятфнемста 200 кизонь топодемати. Етафтфоль лама тематическяй конференция, выставка, презентация. Оцю событиякс арась Санаксарскяй монастырьста Санкт-Петербургу адмиралть Ушаковонь мощанзон етафтомасна. Кронштадса Никольскяй морской соборса, ВМФ-нь шиня, мощатненди сюконясь Россиянь Президентсь В.В.Путин и оборонань министрсь С.К.Шойгу.
«Тяда башка, Саранскяйса етась адмиралть Федор Ушаковонь колга документальнай фильмать премьерац, кона снимандафоль «Звезда» телеканалть мархта. Сонь анокламасонза примась участия асу актерсь Андрей Мерзликин, - отмечазе МР-нь Оцюнясь. – Минь етафтоме работат Санаксарскяй монастырть благоустроендаманц коряс, ушедоськ Ушаковка велеса флотоводецть усадьбанц петеманц. Мялезе отмечамс, што оцю лезкс тя кизефксса макси Евгений Николаевич Каблов. Сонь средстванзон лангс ремонтировандафоль памятнай стелась, благоустроендафоль перьфпяльдень территориясь. Тячи Санаксарскяй монастыри, Федор Ушаковонь калмонянц лангс сашенды тежятть поломник, штоба сюконямс святынятненди. Тячи минь путнетяма лама вий, штоба «ушаковскяй» васттне Мордовияса сувафтовольхть «Арзамас – Дивеево – Саров» туристическяй кластерти, конань шназе Россиянь Президентсь. Тя лезды шарфтомс туристтнень мяльснон Темниковскяй районть лангс, виияфтомс районть инфраструктуранц. Стане ж аминь арьсекшнетяма ладямс Темниковаса памятник Федор Ушаковонди, панжемс од залхт и экспозицият сонь лемсонза музейса, коса кочкафт козядонга козя экспонат, эсь лацонь рукописть».
Владимир Волков отмечазе, што од ломаттнень военно-патриотическяй воспитанияснон коряс работась поладови сяда товга. «Ушаков – афкуксонь герой. И именна тяфтама пример лангса эряви касфтомс од поколениясь, - китькстазе сон. – Республикась ладясь пара соткст Россиянь сембе флоттнень командованияснон мархта. Лама киза Мордовиясь максси шефскяй лезкс «Адмирал Ушаков» Севернай флотонь миноносецти. Минь инь цебярь цераньке етайхть тоса военнай служба».
Стане жа отмечафоль, што Мордовиянь несколька школатнень эса панчфт кадетскяй класст, конатненди максф адмиралть Ушаковонь лемоц. Эсост
тонафни тежянть малава шаба, ламотнень конатнень еткста сай пингть мяльсна сотомс эряфснон военнаень профессиять мархта.»Тячи минь фкя инь васенце задачаньке – великай русскяй флотоводецть примеронц лангса няфтемс, кода афкукс эряви кельгомс Родинать и народть, мезсь стамсь улемс патриотокс. Тя задачась афкукс государственнай важностень, - мярьгсь Владимир Волков. – Оцю надиямат тя ширеса минь путнетяма тячиень конференциять лангс».
Россиянь Федерациянь Советонь членць, международнай тефнень коряс ФС-нь Комитетть председателенц васенце заместителец Сергей Кисляк отмечазе, што Федор Ушаков занци башка васта Отечественнай историять эса. «Сонь эряфоц прась Российскяй Империянь пуроптомань аф теждя пингти», - китькстазе сон.
И.С. Кисляк поладозе, што Ушаковонь святойхнень лувксс тага весть кемокстазе адмиралть эсь лацоньшинц. «Аф кажнайти максф етамс войнань толу-качаму китнень эзга и аф кевонзофтомс седить, - поладозе сон. – Мордовияти правас коре ули кода марямс гордость, мес именна тяса адмиралсь и праведниксь няфтезе эсь прянц и благотворительностень тевса, максомок аф емла лезкс Санаксарскяй обительти, а стане жа путомок оцю путкс 1812 кизонь Отечественнай войнать пингста народнай ополчениять пуроптомаса. Тяса жа сон музе мекольце вастонц и сетьмошить».
«ВИАМ» РФ-нь ГНЦ-нь ФГУП-ть генеральнай директороц, РАН-нь академиксь, профессорсь Евгений Каблов китькстазе, што тядде отмечави Видо и Корфу острофнень воляс нолдамста 220 кизонь топодемась. Тя Ушаковонь оцюдонга оцю сяськомац, конань инкса теенза максфоль адмиралонь званиясь. «Адмиралть мархта пуроптф сисем островонь республикась – Константинопольть прамста Греческяй государственностень васенце формась и Балканскяй региононь васенце государствась, кона эвондась Россиять ширень кирдеманц вельде. Васенцекс Европаса Ушаков аноклазе од государствать Конституциянц. Шарфтса мялентень, што тя ульсь аньцек кемонь кизонь етазь Европейскяй Конституциять примамда меле. Ули кода мярьгомс, што минь содаф флотоводецоньке васенцекс вярьгак кеподезе Россиять авторитетонц Средиземноморскяй регионца и Южнай Европань странатнень эса, кона ванфневи и кемоксневи тячемс», - мярьгсь сон.
«Патриотизм и служение Отечеству в пространстве смыслов россиян времени Ф.Ф.Ушакова» лем ала доклад мархта выступандась РАН-нь член-корреспондентсь, профессорсь, Н.П.Огаревонь лемса МГУ-нь Историко-социологическяй институтонь директорсь Николай Арсентьев. Стане жа
«Адмирал Федор Ушаков в российской империи» доклад лувсь «Военная академия Генерального штаба Вооруженных Сил РФ» ВО-нь ФГКВОУ-нь ведущай научнай сотрудниксь Владимир Овчинников.
Пленарнай заседаниять шумордамда меле конференциять работац полатфоль школьно-патриотическяй и научно-историческяй секциятнень эса