Шуваланяста, 27 сентябрьста, Саранскяйса «Мордовия» спорткомплексса панжевсь Приволжскяй федеральнай округонь судьятнень ёткса ёмла футболть коряс XI чемпионатсь. Торжественнай мероприятияса примась участия Мордовия Республикань Оцюнясь В.Д.Волков.
Чемпионатса пялькстыхть судьянь командатне, конат састь ПФО-нь сембе 14 региоттнень эзда, тяконь лувксса и Мордовиянь командась, конань вятьсы МР-нь Верховнай судть председателенц заместителец Ильдар Сюбаев.
Эсь корхтамасонза республикань Оцюнясь китькстазе, што Приволжскяй федеральнай округсь странань фкя и тяка административно-территориальнай единицась, коса лама киза ни ётафневихть судьятнень ёткса ёмла футболть коряс чемпионатт.
В.Д.Волков шарфтсь мяль сянди, што пялькстоматне ётафтовихть 2018 кизонь футболть коряс Миронь чемпионатть ётафтома кизоня, конань матчензон примазь ПФО-нь 4 ошне, тяконь лувксса и Саранскяйсь.
—Миньцонк тиф спортивнай пяк цебярь инфраструктура,—азозе региононь вятись. Строяфт спортивнай объектт аф аньцек Саранскяйса, но и республикань райоттнень эса.
Владимир Волков китькстазе, што тяниень пингть республикань руководствась кярьмодсь футболть коряс миронь чемпионатть наследиянц коряс Концепциять эряфс етафнеманцты. Тя лезды сяда товга виияфнемс Мордовияса спортть, тяконь лувксса и идень футболть.
В.Д.Волков стане жа азозе, што Мордовиясь аф весть лувонтфоль Россиянь субъекттнень ёткста инь спортивнайкс. Республикаса спортса фалу занцихть пря эряйхнень 39 процентсна.
МР-нь Оцюнясь арьсесь чемпионатонь участникненди няфтемс цебярь результатт, а Мордовиянь командати—сувамс пялькстомань призерхнень лувксс.
Меколи В.Д.Волков казсь лятфнембяленди казне Саратовскяй областной судть председателенц заместителенцты Олег Ляпинонди, конань тя шиня ульсь шачема шиц.
Эсь ширденза Мордовиянь Верховнай судть Председателец Сергей Штанов азсь благодарностень валхт региононь руководствати и лична Владимир Волковонди спортивнай турнирть пуроптоманкса и етафтоманкса, а стане жа судейскяй институтть ширенц кирнеманкса.
Командатнень стане жа приветствондазень МР-нь Судьянь советть Председателец, Арбитражнай судть Председателец Сергей Александров.