Пяденцяста, 2018 кизонь 28 сентябрьста, И.М.Яушевонь лемса Государственнай драматическяй театраса етась торжественнай собрания, кона лемтьфоль Россиянь Банкть Мордовскяй подразделениянц пуроптомста 100 кизонь топодемати. Пуромксса примась участия Мордовия Республикань Оцюнясь В.Д.Волков.
«Седи ваксста поздравляндатядязь тинь Народнай банкть Саранскяй уезднай отделениянц пуроптомста 100 кизонь топодемать мархта! Именна тянь эзда ушедсь тинь истроиянте – од республикать экономиканц ладявомац, банковскяй секторть, Мордовиянь кредитно-финансовай системать виияфнемац, - мярьгсь В.Д.Волков. – Тя кизотнень банковскяй сферась кирдсь аф кржа. Башка стакальхть 90-це кизотне – пефтома реформатне, дефолтсь, деноминациясь, финансовай кризисне».
Республикань вятись отмечазе, што сембе пинкнень Национальнай Банкть отделенияц путнесь и путни оцю путкс регионть социально-экономическяй виияфнеманцты, примась активнай участия од типонь банковскяй системать строямаса: советскяй образецонь ярмаконь знакнень полафтомаса, расчетонь электроннай технологиять тевс сувафтомаса, вкладонь страхованиянь системати банкнень сувамаса и стак тов.
«Ули кода азомс, што ламоц ня кизефкснень Мордовиянь Нацбанксь решандазень лац, няфтемок эсь виенц, ванфнемок эсь репутациянц и ломаттнень надиямаснон, - поладозе Владимир Волков. – Тячи тинь организацияфтома аф арьсеви республиканскяй банковскяй рынкась». Мекольдень вете кизотнень Россиянь Банксь ваны аф аньцек банкнень мельге, но марнек финансовай организациятнень мельге, арамок финансовай рынкань оцю регуляторкс. Ванови ярмаконь и кредитнай потокнень мельге.
«Мархтонтт марса минь решандакшнетяма задачат Мордовиять экономиканц виияфнеманц коряс. Фкя инь васенце национальнай и инвестиционнай проекттнень еткса башка мяль шарфневи банковскяй услугатнень сяда теждяста получамаснонды, - поладозе МР-нь Оцюнясь. – Отмечаса, што минь республиканьконь тяниень пингонь, вии банковскяй сектороц.
В.Д.Волков азозе, што мекольдень кизотнень республикаса кассь макссеви кредиттнень лувкссна. Тяфта, тяддень сисем ковста Мордовиянь эряйхненди максф 71 миллиард цалковайда лама кредит, мезсь 44 процентта сяда лама мелянь кизоть коряс. Ня средстватнень оцюшка пялькссна нолдаф Мордовияса эряфс етафневи инвестиционнай оцю проекттнень финансировандаманкса. Юридическяй лицатненди и предпринимательхненди максф кредиттнень пялесна нолдафт обрабатывающай производствань сферати, колмоцекс пялькссна—велень хозяйствати и торговляти.
Физическяй лицатненди максф кредиттнень талекасна—38 процент. Башка вастса ащи ипотечнай кредитованиясь. Кода азозе республикань Оцюнясь, Мордовияса лама тиендеви сянкса, штоба эряма вастонь рамамась улель зепс коре. Эряфс етафневи несколька федеральнай жилищнай программа. Колма кизода инголе республикаса тевс сувафтфоль Россияса инь уцез ипотекась—5 процент алу.
—Тяниень пингть ипотечнай кредиттнень коряс средняй ставкась республикаса 9,5 процент,—азозе региононь вятись.—Но ломаттне получсесазь синь 5 процент алу, лядыкс пяльксть компенсировандасы республиканскяй бюджетсь.
В.Д.Волков азозе, што Россиянь Президентть В.В.Путинонь Посланиясонза путф задачать мяльс сявондезь ипотекать коряс ставкась кармай кирьфневома сяда товга.
Корхтамок сай пингонди задачатнень колга, региононь Оцюнясь башка мяль шарфтсь инфляциять кирьфтаманцты. Мордовиянь банкть мархта тянь ширде вятеви оцю работа. Тиендеви анализ экономическяй ситуацияти, ванови питнетнень мельге. Мелянь ноябрь ковста Отделениять видеса пуроптфоль специальнай рабочай группа, коза сувасть минь министерстваньконь и ведомстваньконь представительсна, - отмечазе сон. - Тячиень шити инфляциясь Мордовияса фкя инь емлась странаса—2 процентт. Целайнек Россияса инфляциясь августста ульсь 3,1 процент.
Стане жа шарфтфоль мяль облигациянь рынкать виияфнеманцты. Тя пяк цебярь полафтома банковскяй кредитованияти. Нацбанкть видеса тядде пуроптфоль межведомственнай рабочай группа республикаса корпоративнай облигациянь рынкать виияфнеманц коряс.
Стане жа Владимир Волков шарфтсь мяль платежнай системать виияфнеманц лангс. Тячи башка васта занци безналичнай расчетсь.
«Республикаса средстватнень 25 процентсна нолневихть товархнень и услугатнень инкса безналичнай расчетонь тиеманкса. Тянди лезни тянь коряс инфраструктурать келепнемац, пандомань од сервиснень и технологиятнень тевс нолнемасна, «Мир» пандомань системать виияфнемац, азозе Владимир Волков. – Мордовиясь васенцетнень еткста фкякс поладсь тя проектти. Нинге кафта кизода инголе минь кемокстаме договор «НСПКть» мархта («Национальная система платежных карт») республикаса «Мир» системать видеса единай социальнай электроннай картать нолдаманц колга. Тяниень пингть сонь нолнесазь ни тевс студенттне и пенсионерхне.
Лятфтасаськ, што 1918 кизоня Пензенскяй губерниянь Саранскяй уездса пуроптфоль Народнай банкть уезднай отделенияц. Тячи сон лемневи Российскяй Федерациянь Центральнай банконь Волго-Вятскяй главнай управлениянь Отделениякс – Мордовия Республикать эзга Национальнай банкокс.
Пуроптомста васенце шиста ни сон ульсь регионть кассовай и расчетнай центракс, заняфоль экономикать кредитованияса. Гражданскяй войнада меле Отделениясь лезнесь срафтф-калафтф хозяйствать эреклафтомаса, индустриализациять етафтомаса. Великай Отечественнай войнанаь кизотнень, аф ваномок стака условиятнень лангс, СССР-нь Госбанконь учреждениятне пяшкотькшнезь экономикать и населениять наличнай ярмаксса вешфксснон, макссесть финансовай лезкс эвакуировандаф предприятиятненди, аф кржа тисть войнада мельдень кизотнень странать виияфнеманкса.
2013 кизоста сявомок5 Россиянь Банксь арась мегалегуряторкс и кармась пяшкотькшнема надзор аф аньцек кредитнай организациятнень, но и страховой компаниятнень, микрофинансовай организациятнень, кредитно-потребительскяй кооператифнень, аф государственнай пенсионнай фонттнень мельге…
«Россиянь Банкть территориальнай учрежденияц – пяк эрявикс пялькс, кона отвечай республикань финансовай системать виияфнеманкса. Отделениясь обеспечендакшнесы населениять банковскяй услугаса, участвондай регионть территорияса Россиянь Банкть платежнай системанц лац работаманц обеспечендамаса, заняф потребительскяй финансовай услугатнень интересснон араламаса, граждаттнень финансовай грамотностьснон касфнемаса», - отмечазе Отделениять – Мордовия Республикань Национальнай банкть управляющаец Алексей Колосков.