Понедельникста, 25 мартста, Мордовиянь Оцюнясь Владимир Волков примась участия совещанияса, конань видеоконференциянь форматса етафтозе Россиянь Правительствань вице-премьерсь Виталий Мутко. Сон лемтьфоль фкя инь оцю нацпроектть эряфс етафнеманцты, кона водендаф граждаттнень эрямань условияснон цебярьгофнеманкса.
«Жилье и городская среда» региональнай проектть фкя инь васенце целец – жилищнай строительствать объемонзон касфнемасна. Мордовияса 2024 кизоти тевс сувафневи од эряма васттнень объемсна должен арамс 500 тежянь квадратнай метра кизоти. Тяддень кафта ковста республикаса строяф ни 77,8 тежянь квадратнай метра эряма васта, мезсь 2,4-крда сяда лама мелянь тяка пингть коряс. Тядде Мордовияса арьсекшневи сувафтомс тевс 338 тежянь квадратнай метра эряма васта.
Совещаниять пингста корхтафоль долевой строительствать эзда атказамать коряс планть колга, кона тяни ни етафневи эряфс Российскяй Федерацияса. 2019 кизонь 1 июльста сявомок российскяй застройщикне кармайхть работама эскроу-счеттнень коряс, конатнень эса кармайхть «шарома» граждаттнень средствасна. Строительнай компаниятненди аф ули кода нолнемс тя средстватнень тевс мзярс аф шумордавихть работатне, синь кармайхть кредитовандамост банкатне. Виталий Мутко отмечазе: «1 июльста сявомок тейнек эряви етамс жилищнай строительствань финансированиянь ефси лия модельс, тиема тя саворне».
Оцю мяль шарфтфоль «Формирование комфортной городской среды» проектть эряфс етафтоманцты, кона водендаф общественнай васттнень и куд
пирьфнень благоустроендаманкса. Мордовияса 2017-2018 кизотнень 463 миллион цалковай нолдафоль Саранскяйса кафта общественнай территориятнень, Рузаевка и Ковылкина ошса кафта парковкатнень и 43 муниципальнай образованияса 407 куд пирьфнень благоустроендаманкса. 2024 кизоть самс проектть эряфс етафтоманкса республикась получай федеральнай бюджетста 1,2 миллиард цалковайда лама ярмаконь лезкс. 2019 кизоня республикаса 92 куд пирьфнень и 12 общественнай территориятнень благоустроендаманкса нолдави 258 миллион цалковай.
Тяда башка совещанияса корхтафоль «Обеспечение устойчивого сокращения непригодного для проживания жилищного фонда» проектть сяда тов эряфс етафнеманц колга. Программань мероприятиятнень эряфс етафнеманкса Мордовияса 2024 кизоть самс арьсеви карьхцямс 3,1 миллиард цалковай, арьсекшневи етафтомс ломаттнень эряманди аф кондясти 70 тежянь квадратнай метрань площадьста.
Владимир Волков китькстазе, што Мордовияти программатне, конат водендафт од эряма вастонь строяманкса, аварийнай и сире эряма вастста ломаттнень етафтоманкса, ошнень благоустроендаманкса, ащихть васенце вастса. «Сянь эзда, кодама условият минь тиеме ломаттненди ошса и велеса эряманкса, кодама кит, школат и идень сатт строятама, кармай ащема республиканьконь сай пингоц!»
Видеоконференциять аделамда меле Мордовиянь Оцюнясь етафтсь совещания, коса примасть участия МР-нь Правительствать Председателенц заместителец – строительствань, транспортонь и дорожнай хозяйствань министрсь Виктор Цыганов и республикань Правительствать Председателенц заместителец – жилищно-коммунальнай хозяйствань, энергетикань и населениять гражданскяй араламанц коряс министрсь Игорь Чадов. Совещаниять пингста крхкаста ванфтольхть ся кизефксне, конат сотфт республикаса эряма вастонь строямать и благоустроендамать мархта.
Мордовия Республикань Оцюнять пресс-службац