Мордовиянь Оцюнясь Владимир Волков 8 февральста примась участия прокуратурать коллегиянц расширеннай заседаниясонза, конань пингста тифтольхть итокт 2018 кизоня ведомствать работанцты, а стане жа путфтольхть задачат сяда товолдонди регионца законностть и правопорядкать кемокснеманц коряс.
МР-нь прокурорть Александр Филимоновонь валонзон коряс, правоохранительнай и контролирующай оргаттнень, властень и местнай самоуправлениянь оргаттнень мархта сотксонь кирнезь ведомствась вятсь оцю работа граждаттнень, обществать и государствать интереснон араламаснон коряс, эряфс етафтфт преступностти кить персеманкса од спосопне. Башка мяль шарфтфоль Мордовияса оцю событиятнень етафтомаснонды – Россиянь Президентонь кочкаматнень и футболть коряс миронь чемпионатть.
2018 кизонь событиятнень оцю значенияснон колга корхтась и МР-нь Оцюнясь, отмечамок, што республикань прокуратурась решандась пяк лама кизефкс, конат сотфт ня мероприятиятнень етафтомаснон мархта.
«Мялезе спасибамс прокуратурань сотрудникненди путф задачатнень решандамста оцю ответственностень и профессионализмань няфтеманкса», -- поладозе Владимир Волков.
МР-нь Оцюнясь, максомок оценка республикаса преступностти, отмечазе, што 2018 кизоня тага кемокстафоль сонь киремац (пцтай 3 процентта). Меля ламода кирсь салсематнень, грабаматнень, вымогательстватнень лувкссна. И тя ся пингть, мзярда республикаса етась оцюдонга оцю международнай мероприятия, коза сашендсь 200 тежяньда лама инжи.
«Касонды ораткшневи преступлениятнень лувкссна. Мольфтеви оцю работа ингольдень кизонь преступлениятнень расследованияснон коряс. Наказакшневихть ОПГ-нь ингольдень члеттне, преступникне, конат лама киза лувондозь пряснон аф наказафокс, Сембось тя сатф минь правоохранительнай системаньконь лац ладявоманц вельде, координаторкс коса арси республикань прокуратурась», - поладозе В.Д.Волков.
Тяка пингть сон шарфтсь мяль стака и башка стака преступлениятнень аф ламода касомаснон лангс, мезсь сотф экономическяй преступлениятнень и наркотикнень аф законц коре мишендемань случайхнень лувксснон касомаснон мархта.
«Кда васенце случайста тянь ули кода сотнемс правоохранительнай оргаттнень работаснон виияфнеманц мархта, то наркоманиять мархта сембось ащи лиякс, - шарфтсь мяль республикань вятись. – Ужяленди, аф легальнай рынкаса эвондакшни коль сяда лама уцез наркотическяй вещества. Тевсь сталгофневи мишендемань од китнень-яттнень эвондакшнемаснон мархта, тяконь лувксса Интернетть вельде. Наркотикне коль сяда кемоста сувсихть од ломаттнень, подросткатнень эряфс. Прянь шаракофты препараттнень примсемасна сидеста вятни лия преступлениянь тиемати (меля аф совершеннолетняйхнень мархта тиф преступлениятнень лувкссна кассь уликсть нилецекс пяльксонц). Сембось тя эвондафни пелькс, и тейнек марса арьсема, кода перямс тянди кить».
Тя темас корхтамать поладомста Владимир Волков лоткась шабатнень безопасностьснон обеспечендаманц мархта сотф прябалать лангс. Керчса, Пермьса и Улан-Удэса тонафнемань заведениятнень эса нападениятне тага весть лихтезь лангу уликс аф сатыкснень.
«Сяс тейнек марса эряви кемокстамс контрольть образовательнай учрежденияньконь эса, иттнень ваймосема вастса безопасностть обеспечендаманц коряс. Республикань Правительствась эсь ширденза кармай
вешендема дополнительнай средстват ня кизефкснень решандаманкса», - поладозе Мордовиянь Оцюнясь.
Стане жа шарфтфоль мяль иттнень пелькс информацияда араламаснонды. Аньцек республикань прокуратурать мархта меля Интернетса лихтьф 1300 материал, конатнень эса ули противоправнай контент. Оцюшка пялькссна тяни заблокировандафт.
В.Д.Волков шарфтсь мяль, што кафтонь-крда кассь преступлениятнень лувкссна, конатнень эса тевс нолневихть электроннай технологиятне. Тя преступлениятнень ораткшнемасна аф фалу удалси – аньцек 33 процентта.
«Тя нинге весть кемокснесы сянь, што правоохранительнай оргаттнень работаса тевс сувафнемат од технологиятне, - китькстазе МР-нь Оцюнясь. – Содаса, што тинь ведомствантень мархта тянь коряс работа вятеви. Меля марнек странать келес ушедсь прокуратурань оргаттнень цифровой трансформациясна. Сонь целец – тиемс правовой статистикать вятеманц, сонцень надзорнай работать и сонь результатонзон сяда эффективнайкс».
Марстонь вийхне васендакиге водендавихть трудовой и жилищнай законодательствать колсеманцты кить персеманкса, макссеви коммунальнай услугатнень качестваснон мельге ваноманкса.
«Башка мяль тейнек шарфтома населениянь социальнай ширде лафчста аралаф категориятнень – лама идень семьятнень, пенсионерхнень, уроз шабатнень, инвалиттнень праваснон ваномаснонды. Эрявихть лихнемс лангу медицинскяй услугатнень аф качественнайста макссемань случайхне, лекарстваса обеспечендамань сфераса колсематнень», - мярьгсь Владимир Волков.
Стане жа лоткафоль заработнай платать кирнеманцты кить персеманц лангс. Путф задача аруяфнемс теневой схематнень эзда производственнай и строительнай отраслятнень, государственнай и муниципальнай вешфксонкса закупкань сферать, банковскяй системать.
«Меля заработнай платать коряс мрдафтф 185 миллион цалковаень лувксса шумот, оду эреклафтфт 8 тежятть работникть трудовой правасна. Удалась кафтонь-крда кирьфтамс организациятнень-банкроттнень лувксснон, конатнень улихть шумосна зарплатать коряс. Налогонь аф паннихнень лангс срхкафтфт уголовнай тефт», - азозе МР-нь Оцюнясь.
Фкя инь васенце задачакс ащи коррупцияти, экономическяй и налоговай преступлениятненди каршек ащемась. Маластонь 6 кизотнень лама марстонь вий водендама «О национальных целях и стратегических задачах развития на период до 2024 года» Российскяй Федерациянь Президентть В.В.Путинонь Указонц эряфс етафнеманкса.
Башка Владимир Волков лоткась жилищно-коммунальнай хозяйствать лангс, тяконь лувксса ЖКХ-са и долевой строительстваса преступлениятненди каршек ащемати, а стане жа республикань сембе эряйхненди цебярь условиянь тиендемать лангс.
«Меля прокурорхнень вешфксснон коряс ЖКХ-нь организациянь шумода мрдафтф 480 миллион цалковаень лувксса. Прокуратурать мяленц коряс уголовнай тефт срхкафтфт «Юго-Западная» ГУК-нь должностной лицатнень, ошень фкя ТСЖ-нь председательть лангс, - азозе В.Д.Волков. – Тя работань результаттне корхтайхть сянь колга, што тефне тянь ширде нинге стакат. Ингольцекс ули васта тарифнень касфнемаснонды, бюджетнай средстватнень салсемаснонды и стак тов. И муцсихть тянь эзда, васендакиге, аф оцю доход мархта семьятне, пенсионерхне.
Сяс тядде тейнек марса поладома жилищно-коммунальнай пандоматнень мельге ваномась, тяконь лувксса аф максф услуганкса сонь путнемац, населениять кядьста кочкаф средстватнень целевой тевс нолнемаснон мельге».
Владимир Волков китькстазе, што эряма вастонь долевой строительствать коряс тефне целайнек кирдевихть контроль ала. Васькафтф дольщикт миньцонк аш, но тяка пингть 6 куттнень строямаснон коряс пингсь таргавсь.
Кафттне эздост сувафтфтольхть етай кизоть песта, лядыхнень анокшисна тяниень пингть 76 процентста сявомок 99 процентти молемс.
Правоохранительхненди сави решандамс прябалат аф законнай предпринимательствать коряс, оцюшка пяльксоц конань работай регистрацияфтома, аф легальнайста. Примеронди Владимир Волков азозень пассажирскяй перевозкатнень, таксить.
«BlaBlaCar “ электроннай сервиснень эвондамасна арси ешмокс лия региоттнень мархта автобуснай сообщенияти. Приметневи автовокзалхнень эса пассажирхнень лувксснон киремац. Автотранспортнай предприятиятне кирдихть карьхцть, селгондсазь маршруттнень, кой-конат ащихть банкротства лангса», - мярьгсь Мордовиянь Оцюнясь.
Стане жа заседаниять пингста тифтольхть итокт 2018 кизонкса МР-нь Прокуратурань органонь инь цебярь коллективонь лемть инкса конкурсти. Казнет сатсть Саранск ошень округонь Ленинскяй райононь, Ардатовскяй, Атяшевскяй, Дубенскяй райононь Прокуратурань коллектифне.