Мордовиянь Оцюнять аф оцю пингс тевонзон тиендисна Владимир Волков недляшиста, 13 августста, ульсь Дубенскяй и Атяшевскяй райоттнень эса.
Васенце объектокс, конань ванозе Мордовиянь лидерсь, арась 6400 фуражнай траксонди молочнай комплексть строительнай площадкац, кона строяви Дубенскяй райононь Ардатова велеса. Россияса фкя инь оцю инвестиционнай проектть эряфс етафнемац ушетфоль 2016 кизоня, сонь питнец 5,5 миллиартт цалковай.
Комплексть тевс сувафтомац лезды панжемс 136 рабочай васта, рабочайхне кармайхть получама 24,5 тежянь цалковай ковти.
«Сфера» ООО-ть генеральнай директороц Сергей Сиушов, комплексть строяманц колга азондомста, пачфтезе Владимир Волковонди, што тяниень пингть пачфтьф сембе инженернай инфраструктурась, подъездной китне. Мольфтеви санитарно-пропускной пунктть строямац. Тевс нолдаф 80 миллион цалковай.
Комплексть тевс сувафтомдонза меле лофцть производствац 2019 кизоня пачкоди 27771 тоннас, 2023 кизоти – 57993 тоннас.
«Тя объектсь арай Россияса фкя инь оцю молочнай комплексокс. Эрь шиня переработкас кармай прважсевома 200 тонна лофца, - азозе Владимир Волков. – Минь задачаньке – виияфтомс молочнай отраслять целайнек республикаса, штоба потямс фкя траксста 9 тежятть килограмма».
Сяда тов Мордовиянь лидерсь ульсь Дубенскяй райононь Ардатова велень социальнай центраса. «Устойчивое развитие сельских территорий» программать рамкаса 2017 кизоста сявомок велеса етафневи эряфс жилищнай застройкать комплекснай обустройствац. Проектть коряс социальнай центрада башка тяса кармай идень налхксемань спортивнай площадка, мемориальнай комплекс, од семьянди эряма кутт, Новая ульцять эзга инженернай инфраструктура и общеобразовательнай школать реконструкцияц.
Проектть сметнай питнец – 151,9 миллион цалковай, тяконь лувксса социальнай центрать строямац – 80,4 миллион цалковай, мезсь ушетфоль тяддень майста, а тевс сувафтомс сонь арьсекшневи 2017 кизонь ноябрьста.
Тяса кармай етка пингонь и творчествань кудсь, коза сувайхть кштимань и музыкальнай классне, велень администрациясь и ФАП-сь. Работникнень лувкссна- 15 ломань.
Од семьятненди эряма вастонь строяманкса нолдаф 40 модань участка.
Владимир Волков путсь поселениянь администрациять инголи задача тиемс населеннай пунктть мялень салайкс од ломаттненди, тяконь лувксса тиемс сембе условиятнень школьникнень лувксснон касфнеманкса.
Дубенскяй районть территорияса Владимир Волков ванозе, кода мольфтеви ульяновскяй кить строямац, конань оцю значенияц регионти. Объектсь арси участкакс, кона вяти уральскяй ширети. Владимир Волков китькстазе строяманц вишкоптоманц эрявиксшинц.
«Лемозон аф весть сашендсть трассать строяманц колга сермат. Тяда башка, футболть коряс миронь чемпионатть пингста минь арьсекшнетяма нолдамс тевс Ульяновскяй областень гостиничнай объекттнень», - азозе Владимир Волков.
В.Д.Волков азозе, што Дубенскяй районть экономиканц виияфнеманкса нолдафоль 120 миллион цалковайда лама. Ня средстватнень лангс строяфоль ФАП-сь, социальнай центратне, спортивнай и идень площадкатне, школатне, китне и ламось лиясь.
«Минь задачаньке – касфтомс эряфть кувалмонц и граждаттнень доходснон, тиемс цебярь условиять эряманкса и работаманкса», - мярьгсь Мордовиянь вятись.
Атяшева велеса Владимир Волков корхнесь эряйхнень мархта, конат пшкятькшнесть аф аньцек личнай эняльдема мархта, но и азсть благодарностень валхт эряма васттнень, китнень, социальнай и спортивнай инфраструктурань объекттнень строяманкса, а стане жа велень ломаттнень прябаласнон лангс мялень шарфнеманкса.
«Атяшевскяй районць сувси касыхнень-вииякшнихнень лувксс. Экономиканцты нолневихть аф емла средстват республиканскяй и федеральнай бюджеттнень эзда», - мярьгсь Владимир Волков.
Региононь лидерсь китькстазе, што районца сяда тов поладови китнень и эряма васттнень строямасна, тиеви реконструкция коммуникационнай сеттненди, а стане жа решандави кизефкссь ТБО-ть лихнеманц коряс, аф санкционированнай свалкатнень машфтомаснон коряс. «Республикань руководствась старандай тиендемс цебярь условият эряманкса и работаманкса. Минь сяда товга карматама виияфнема образованиять, касфнемонза медицинскяй услугатнень качестваснон», - азозе Владимир Волков.
МР-нь Оцюнять аф оцю пингс тевонзон тиендисна азозе, што Атяшевскяй больницяса панжеви диализнай центра, кона максы возможность райононь эряйхненди получамс высокотехнологичнай лезкс аф якамок тянкса Саранскяи. Стане жа Владимир Волков отмечазе, што 2017 кизоня ушедови лечебнай корпусть капитальнай ремонтоц.