Илядь 26 июльста Мордовия Республикань Оцюнять аф оцю пингс тевонзон тиендисна Владимир Волков ванозе, кода мольфтеви Рузаевкаса Юрасовонь ульцяса 800 вастонди од школать строямац и етафтсь стройплощадкать эса рабочай совещания.
Школась строяви Рузаевкать вярьце пялькссонза. Тяниень пингть тя микрорайонць активнайста строяви. Тяза эряма етнихть ломаттне, конат
получасть возможность цебярьгофтомс эрямань условияснон сире и аварийнай эряма вастста етамань программать коряс, а стане жа од семьятне, конат сявсть ипотека. Маластонь пингть тяса тяниень пингонь квартиратнень эса кармайхть эряма кафта тежяньда лама ломанць. А од школась арай тя районти седи куцюнякс.
Рузаевецнень кунара ни эвондась од школаса вешфкссна. Уликс тонафнемань заведениятне пяшксет. Од микрорайонть эзда аф ичкоздень вастса ащи 8№ школаса шабатне тонафнихть кафта сменаса. Кочкамада ингольдень кампаниять пингста тястонь эряйхне аф весть эняльтькшнесть законодательнай оргаттненди строямс нинге фкя школа. И Владимир Волков сявозе тя кизефксть решандаманц личнай контроль алу. Тяфта, мекольдень 30 кизоста васенцеда Рузаевкаса ушетф школать строямац. Оцю лезкс макссь образованиянь федеральнай министерствась: сметать коряс школать питнец 548 миллион цалковай, средстватнень оцюшка пялькссна нолдаф федеральнай бюджетста.
Од тонафнемань заведениясь сембе инфраструктуранц мархта заняй 3,3 гектар мода. Колма этажт, тяниень пингонь класст, цебярь столовай, оцю актовай и спортивнай залхт. Начальнай школась ащи башка основнойть эзда. Тяса улихть эсь спортивнай объектт: искусственнай покрытия мархта стадион, баскетбольнай и волейбольнай площадкат, гимнастическяй зал, налхксемань зонат.
Райононь и школань руководствась арьсекшнихть панжемс школаса инженерно-технологическяй класст, школьнай телестудия, робототехникань башка кабинет, 3D-моделированиянь лаборатория и лият.
Объектсь должен улемс сувафт тевс 2017 кизонь декабрти. Тя пингти эряви строямс сонць зданиясь, етафтомс сембе инженернай коммуникациятнень и шумордамс потмоширдень отделкать.
Совещаниять пингста, кона етась строительнай площадкать лангса, Владимир Волков тердезень строительхнень виияфтомс работать и кирдемс графикти. Мордовиянь лидерсь китькстазе: «Сентябрьста ни кярьмодема территориять благоустройстванцты, а 1 октябрти нолдама отоплениясь, штоба косьфтамс стенатнень отделкада инголе.».
Пшкядемок строительхненди, Владимир Волков мярьгсь: «Теенть эряви шарьхкотькшнемс, што тяни тинь васендакиге работатада эсь сай пингонтень лангс, сембе отраслять сай пингонц лангс. Сяс мес тя объектть лац-ряц
строямдонза меле республикань строительхненди ули кода надиямс од заказонь получамать и федеральнай финансированиять лангс сай кизотьке.
Тяниень пингть стройкаса работайхть ниле субподряднай организацият, генеральнай подрядчикокс лисенди «Транссевер» ООО-сь. Тяни мольфтеви ниле блокнень строямасна, коса меле улихть начальнай школась и основной тонафнемань заведениясь, столоваень корпуссь и спортивнай залсь. Тяниень пингть путф фундаменць, шумордафт работатне коммуникациятнень коряс. Сембось анок стадионть строяманкса. Васенце ученикнень школась примасыне 2018 кизонь сентябрьста.
Тяниень пингть объектть эса кафта сменаса работай 60 ломань. Но ули прябала – аф сатнихть монолитчикне и бетонщикне. Подрядчикне анокт максомс работа нинге 50 специалистонди.
Совещанияса, конань етафтозе Владимир Волков, ульсть строительхть, проектировщикт, энергетикт, ламоц республиканскяй министерстватнень и ведомстватнень вятисна и представительсна. Объектть ваномста и инголе путневи задачатнень колга корхтамста стане жа ульсь МР-нь Правительствать Председателец Владимир Сушков.