Мордовия Республикань Оцюнять аф оцю пингс тевонзон тиендисна Владимир Волков етафтсь рабочай совещания «Нефтехимпром» ГК-ть управляющаенц Владимир Матыцынонь и «Сарансккабель» ООО-ть директоронц Владимир Логуновонь участияснон мархта. Корхтафоль Саранскяй кабельнай заводть мелянь и тяддеть васенце пялестонза работань итогонзон колга, инвестиционнай проектть рамкаса предприятиять видеса металлургическяй комплексонь панжемать квалма, а стане жа холдингть кабельнай производстванц келепнеманц колга (Мордовиять территорияса производственнай од площадкатнень тевс нолнезь).
Владимир Матыцын пачфтсь Владимир Волковонди сянь колга, што мекольдень колма кизотнень «Сарансккабельть» производственнай показателенза ламода цебярьгодсть, мезсь корхтай производствать вииякшнеманц колга. «Товарнай продукциять мишендемац кассь 1,7 миллиартт цалковайста сявомок 2014 кизоня 6,2 миллиартт цалковайс 2016 кизоня. Путнетяма инголенк задача пачфтемс тя показательть 10 миллиартт цалковайс. Производствать объемонзон касомасна аньцек тяддеть васенце пялестонза пачкодсь 20 процентс. Касфневи рабочайхнень лувкссна (2015 кизонь январьста ульсь 990 ломань, тяни – 1300), маластонь пингть од алюминиевай металлургическяй комплексть тевс нолдаманц мархта панчтама нинге 200 рабочай васта. Кассь и средняй заработнай платась – 33 тежянь цалковайс».
Владимир Волков китькстазе, што республикань фкя инь сире промышленнай предприятиять оду касондоманц-вииякшнеманц оцю значенияц регионть экономиканцты и тястонь эряйхненди: «Саранскяй кабельнай заводсь – Мордовияти знаковай предприятия, конань цебярь историяц, мархтонза сотфт экономиканьконь сатфксонза, несколька поколениятнень судьбасна. Сяс эреклафтомс «Сарансккабельть» , нльне кабельнай отрасляса экономическяй стакатнень-сталмотнень пингста, максомс предприятияти од вийхть, пяк эрявикс. Тяфтама задача путфоль од собственникть инголе колма кизода инголе, тя кизефксть коряс минь муме шарьхкодема и, пуроптомок виеньконь, сатоськ арьсефть».
2014-2016 кизонкса оборудованиять модернизациянц и капитальнай ремонтонц коряс инвестиционнай проектть рамкаса производствать виияфнеманкса нолдаф 630 миллион цалковайда лама, 2017 кизоть васенце пялестонза – нинге 106 миллион. Предприятияса ушедсь нолневома од инновационнай продукция.
Маластонь пингть «Сарансккабельса» тевс нолдави од металлургическяй производствась, аделавома лангса оборудованиять монтажец. Проектть эряфс етафнемац максы возможность нолнемс алюминиевай и серень литье аф аньцек предприятиять вешфксонзон пяшкотькшнеманкса, но и мишендеманкса. Серень катанкать коряс производствать объемоц – 5 тежятть тонна кизоти, алюминиевайть коряс –кафтонь-крда сяда лама.
Тячи «Сарансккабельсь» пачфнесы эсь продукциянц маластонь зарубежьянь 8 странав, тядде ни кемокстаф силовой кабельть пачфнеманц коряс оцю контракт Вьетнамть мархта. Владимир Волков китькстазе, што нолневи продукциять эса экспортть пяльксоц пачфтема 15 процентс: «Эряви нолнемс конкуренциянь кирни продукция, лисендемс омба масторонь лия рынкатненди – тяфтамот предприятиять задачанза сай пингонди. Главнайсь вииякшнемс, а республикась – лезды!»
Совещаниять пингста холдингть вятиец азондсь Владимир Волковонди од площадкатнень эса кабельнай производствать келепнеманц колга. «Касондомс-вииякшнемс минь мяленьке аньцек Мордовияса, - мярьгсь Владимир Матыцын. – Республикаса ладяф эсь лацонь инвестиционнай климат, тяса ули мяль работамс, сатнемс сатфкст.
«Сарансккабелень» коллективть лемста Владимир Матыцын азсь благодарностень валхт региононь лидерти предприятиять лангс мялень шарфнеманкса: «Тяса работайхне верондасть предприятиять эрекламанцты, путнесть оцю надиямат республикань руководствать ширде лезксть лангс. Сяс предприятияти удалась кирдемс стака пинкнень и кемокстамс эсь вастонц кабельнай продукциянь рынкаса».
Совещанияса примасть участия МР-нь Правительствать Председателенц заместителенза – экономикань министрсь Владимир Мазов и промышленностень, наукань и од технологиянь министрсь Александр Седов.
Мордовия Республикань Оцюнять Пресс-службац