Тяниень пингть Мордовияса сембе вийса мольфтеви 2018 кизонь Миронь чемпионатти анокламась: стройсевихть гостиницат, спортивнай сооруженият, кит, кутт, одкстопневи сонць ошсь – Саранскяйсь. Ня шитнень спортонь тя оцю илати анокламатнень рамкаса республиканьконь столицас пачфтьфоль 30 од троллейбус. Линияв синь лихтемасна ульсь 12 июньцта. Тянди лемтьф торжественнай пуромкссь етафтфоль святойхнень Кириллонь и Мефодиень храмснон маласта площадьса. Тясольхть Мордовия Республикань Оцюнять аф лама пингс тевонзон тиендисна В.Д.Волков, МР-нь Государственнай Собраниять Председателец В.В.Чибиркин, Саранск ошень округонь оцюнясь П.Н.Тултаев, Саранскяень эряйхне.
В.Д.Волков поздравляндазень пуромфнень Россиянь шить и ошть шинц мархта, а меле азозе:
- Сембось ся, мезе тиеви-строяви республикасонк футболть коряс миронь чемпионатти, кармай служама тястонь эряйхненди лама и лама киза. Тяддень февраль ковста Саранскяи пачфтьфоль ни 50 од автобус. Тячи нолнесаськ линияв од троллейбуснень. Тяшкава общественнай транспортсь республикаса ашезь одкстопнев нинге мзярдовок.
Кода азозе Мордовиянь Оцюнять аф лама пингс тевонзон тиендисна, фкя троллейбусть питнец – 10,7 миллион цалковай. 5 миллиотттне эздост нолдафт федеральнай бюджетста. Сембоц 30 троллейбусть рамаманкса федеральнай бюджетста получафоль 150 миллион цалковай, республиканскяй казнаста карьхцяфоль 170 миллион цалковай.
Од троллейбусне тяниень пингоннет. Синь сяда оцюфт, лиякс мярьгомс, эзост тяльги сяда лама ломань. Эсост ули ограниченнай возможность мархта ломаттненди троллейбусти суваманкса-лисеманкса специальнай оборудования. «Сюруть» вятеманкса системась педа-пес автоматизированнай. Транспортть эса ули видеорегистратор и вете камераста ащи видеонаблюдениянь, а стане жа ГЛОНАСС-нь система. Од троллейбусне отвечайхть безопасностень сембе вешфксненди.
Саранскяень транспортнай паркть од троллейбусса козякофтоманкса В.Д.Волковонди и ошень мэрти П.Н.Тултаевонди спасибамань валхт азсь троллейбусонь вятнись А.В.Паркина.
Тяда меле республикань вятись марса ошень эряйхнень мархта ардсь од троллейбуснень лангса несколька остановка, тияк корхнесь ломаттнень мархта.
Мордовия Республикань Оцюнять Пресс-службац