Мордовиять вятиец Владимир Волков 10 августста примась участия торжественнай собранияса, кона лемтьфоль Строителень шити. Мероприятиясь етась И.М.Яушевонь лемса Музыкальнай театраса.
2016 кизоня республикаса строяфоль 328 тежянь квадратнай метра эряма васта. Тя сяда лама среднероссийскяй показательхнень коряс. 2017 кизонь сисем ковста строяф 122 тежянь квадратнай метра эряма васта, касомась – 118 процент мелянь кизоть коряс. Вете кизоста тевс сувафтф эряма васттнень объемсна кассь тянь нилеце пяльксонц, строяф 1,5 квадратнай метра. Саранскяйса строяф Музейно-архивнай комплекссь, аделавсь Рузонь драматическяй театрать реконструкцияц. Аф кунара Саранскяйса панчф Следственнай комитетть од зданияц. Строяф световой приборонь Саранскяй заводсь. 2020 кизоть самс арьсекшневи строямс нинге 2 миллиотт квадратнай метрать малава эряма васта. Тядде Саранскяйса поладови Республиканскяй онкологическяй диспансерть поликлиниканц и Химмашса 500 посещениянди идень поликлиникать строямасна. Тяддеть аделавомс тевс сувафтовихть Кочкуроваса и Ардатоваса культурань куттне.
Театрать залса озсефнень инголе корхтамста Владимир Волков мярьгсь: «Тяза тячи пуромсть сят, кие эрь шиня эсь кядьсонза одкстопнесы республикань ошнень и велетнень шамаликснон. Тоса, коса мольфтеви стройка, фалу лаказь лакай эряфсь. Эрь кизоня республикаса тевс сувафневихть производственнай и социальнай объектт, аноклакшневихть од технологият строямаса и строительнай материалхнень производствасост. Сяда сидеста минь мархтонт васетькшнетяма лия обстановкаса. Мекольдень пингть тейне сашендови сяда лама пинге етафнемс стройкаса, а аф рабочай кабинетсон. И тячи тяса, мархтонт марса мон стане жа маряса прязень строителькс!»
Вете кизоста Мордовияса строяф и тиф капитальнай ремонт 52 идень садти. Аньцек 2016 кизоня строяф 5 идень сатт Саранскяйса, Ардатовскяй, Ичалковскяй и Ковылкинскяй районца.
Лоткась Мордовиянь Оцюнять аф оцю пингс тевонзон тиендисна и школатнень строямаснон лангс. 1 сентябрьста ни панжеви од школа Саранскяйса «Юбилейный» микрорайонца. Тяса кармайхть тонафнема 1500 школьник.
«Эсонза кафта бассейнат, кафта спортивнай залхт, оцю стадион, несколька налхксема площадка. Тя объектсь арай Мордовиять столицанцты нинге фкя мазоптомбялькс», - мярьгсь Владимир Волков.
« 30 кизоста васенцеда строяви школа Рузаевкаса. Васенце тонафнихнень сон примасыне сай кизонь сентябрьста ни. Тяда башка, минь ушедоськ
Краснослободскяйса 450 тежянь вастонди школать строяманц», - азозе Владимир Волков.
Омбоце кизось республикаса етафневи эряфс 5 процент алу льготнай ипотекань программась. Сонь и федеральнай программатнень вельде Мордовияса удалась строямс лама эряма васта. Меля ипотекать вельде строяф 60 тежянь квадратнай метра эряма васта. Тя кафтонь-крда сяда лама тяда ингольдень кизоть коряс.
«Тя аф аньцек государствать ширень кирнемац, но и кризисста лисемать коряс мера, кона «эреклафтозе» эряма вастонь рынкать. Программань участникокс арасть ни 3тежяньда лама ломанць. Тяда ингольдень кизотнень коряс максф ипотечнай кредиттнень лувкссна кассь 1,5-крда. Кода результат республикань строительнай отрасляти дополнительна инвестировандаф 5 миллиартт цалковай. 2017 кизоть васенце пялестонза строительнай материалда нолдаф 7 миллиарт цалковайда ламонь питнеса, мезсь 132 процентта сяда лама мелянь кизоть коряс», - азозе Владимир Волков.
Мордовияста виияфневи и промышленнай строительствась. Тядде шумордавсь «Оптикэнерго» компаниянь группать 10 тежятть квадратнай метрань площадьса цехонц строямац. Тяни мольфтеви оборудованиять монтажец.
«Ули кода мярьгомс, што тя од завод, коса сентябрьста ни ушедови кабельнай продукциянь од виттнень нолнемасна», - мярьгсь Владимир Волков.
«Электровыпрямитель» заводть корпусонзон эзда фкясь реконструировандаф шинь электростанциятненди компоненттненьпроизводстваснон алу. Оцю цех строяви «Биохимик» заводса.
Республикань велетнень эса эряфс етафневихть оцю инвестиционнай проектт. Ковылкинскяй районца строяф «Мордовскяй племенной центрать» омбоце очередец, а стане жа строяфт од корпуст «Юбилейное» обществаса, штоба касфтомс предприятиять мощностенц 160 тежянь тонна нармонень сивольс кизоти. Дубенскяй районца ушетф Россияса инь оцю молочнай комплексть строямац, коса кармай кирдевома 6,5 тежянь тракс. Маластонь пингть ушедови Кадошкинаса и Рузаевкаса панчфнень касфнемаснон коряс теплицатнень строямасна.
Мордовияса оцю проектт етафневихть эряфс и кинь строямаса. Мяляфтови событиякс арась Саранскяйса «Светотехстрой – Юго-Запад» кить панжемац.
«Мелянь сентябрьста минь панжеськ тяниень пингонь транспортнай развязкать Севастопольскяй и Красная ульцятнень васедема вастсост. Од кись сотнесыне Химмашть и Юго-Западть. Мяльса-арьсемаса нинге фкя оцю проект – кить строямац, кона сотнесыне Светотехстройть и Химмашть. И минь обязательна сонь етафтсаськ эряфс», - мярьгсь Владимир Волков.
Тяниень пингть Мордовияса оцю работат мольфтевихть футболть коряс миронь чемпионатти анокламатнень рамкаса. Стадионць, аэропортсь, тренировочнай площадкатне, гостиницатне, китне, набережнайсь и ваймосемань васттне.
«Сембе минь шарьхкотькшнесаськ работать стакашинц и оцю ответственностть, кона тяниень пингть ащи республикать лангса. Но монь ули кемамазе сянди, што тейнек семботь удалай тиемс. Чемпионатть наследияц – од китне и гостиницатне, эрямань куттне и студенческяй общежитиятне, од скверхне и мазы набережнайхне – кармайхть служама Мордовиянь эряйхненди аф фкя кемотть киза», - китькстазе республикань вятись.
Мордовиянь Оцюнять аф оцю пингс тевонзон тиендисна азозондсь, кода мольфтеви лия объекттнень строямасна. « Аделавома лангса вельхкс ала футбольно-легкоатлетическяй манежть строямац, стаки мольфтевихть отделочнай работатне Тысячелетиянь площадьса Универсальнай залса. Тяддень март ковста объектса етафтфоль республикати эсь лацонь строительнай операция. Крупногабаритнай оборудованиясь пачфтьфоль вертолетса», - азозе Владимир Волков.
Владимир Волковонь мяленц коряс, строительствать виияфнеманцты лезни Мордовиять сембе федеральнай жилищнай программатнень эса участвондамац. «Молодая семья» программать вельде новосельясна ульсь 11 тежянь семьять. Тядде максови 700 сертификат. Республикась васенцетнень еткса «Жилье для российской семьи» программать эряфс етафнеманц коряс. Кизоть аделавомс строяви пцтай 55 тежянь квадратнай метра.
Владимир Волков башка лоткась сянь лангс, кодама лезкс Мордовиянь строительхненди максси государствань вятись.
«Сембе эрявикс объектоньконь строямаснон удалась пяшкодемс Россиянь Президентть ширень кирнеманц вельде. Тейнек пяк питни государствань вятить республиканьконь лангс мялень шарфнемац!» - отмечазе Владимир Волков.
«Мярьгода нинге весть азомс благодарностень валхт республикань строительнай комплексонь сембе работникненди. Спасиба теенть, кельгома строительхть, трудонтень инкса! Эрьда карматама верондама эсь прязонк, аськоляма инголи, марса стройсемс сай пингонь китнень – сатфксонь и панчфокс панжемань китнень! Марса строямс од Мордовиять – виить и благополучнайть!»
Торжественнай мероприятиянь участникнень поздравляндазь МР-нь Правительствать Председателец Владимир Сушков, МР-нь Государственнай Собраниять Председателенц заместителец Валерий Алехин, МР-нь профсоюзонь Федерациять председателец Мария Голиченко. Синь азсть строительхнень лемс лямбе валхт Мордовиять социально-экономическяй виияфнеманцты путксснон инкса и арьсесть кеме шумбраши, сатфкст и благополучия.