Мазы салютса аделавсть Саранскяйса праздничнай мероприятиятне, конат лемтьфтольхть Россиянь шити и Ошть шинцты. Илядень концертнай программать аделавомда меле республикань эряйхнень и Саранскяень инжихнень, конат пуромкшнесть Советскяй площади, приветствовандазень Мордовиянь Оцюнять аф лама пингс тевонзон тиендисна Владимир Волков.
«Поздравляндатядязь тинь Россиянь шить мархта! Поздравляндатядязь кельгома ошеньконь – Саранскяйть – шачема шинц мархта!
Мезень колга тя корхтай – кельгомс Россиять? Тя няфнесы – тиендемс сонь сядовок виикс. Мялезе азомс благодарностень валхт сембонди теенть республикать панчфокс панжеманкса трудонтень инкса. Сембе отраслятнень эса миньцонк, Мордовияса тяниень пингть тиендевихть аськолкст инголи: промышленностсь кассь 10 процентта, строительствась – 15 процентта, велень хозяйствась – 5 процентта. Тя корхтай сянь колга, што минь касонттама-вииякшнетяма, сяда тов аськолятама инголи.
Тячи тяза пуромсь лама од ломаньда. Мялезе китькстамс: сембось, мезе тиенттяма, - тя теенть:стройсетяма од школат, предприятият, эряма вастт, кит. Шарьхкотькшнесаськ, што сай пингсь тинь кядьсонт. Арьсян теенть, штоба тя сай пингсь улель валда.
Фкя киза и ниле шит лядонды футболть коряс Миронь чемпионатти. 2018 кизонь 16 июньцта сембе мирсь кармай содама Саранскяйть колга. Штоба достойнайста примамс мировой футбольнай первенствать, тейнек сави нинге лама трудендамс. Но мон кеман: марса минь тисась семботь, штоба Саранскяйсь араль Чемпионатонь инжихнень примамаснон коряс инь цебярь ошкс!
Поздравляндатядязь тинь праздник мархта и арьсян шумбраши, паваз, благополучия, сембонь вельхксса ару менель!» - мярьгсь Владимир Волков.
Тяда меле Площадть вельхксста менельса сязевсь аф фкя тюсса салютсь.
Мордовия Республикань Оцюнять Пресс-службац