Мордовиянь Оцюнять аф оцю пингс тевонзон тиендисна Владимир Волков 30 июльста ульсь рабочай поездка мархта Темниковскяй районца. Республикань лидерсь примась участия «Морская душа» патриотическяй моронь Межрегиональнай фестивальса, ванозе Темникав ошень Туристско-информационнай центрать «Туристические маршруты Темниковского района» выставканц, ульсь Вирень Цыбаева велеса Национальнай культурань центраса и содафтсь «Подсобное хозяйство» ООО-ть производстванц мархта, мольфтсь корхтама районть инголе путневи социально-экономическяй задачатнень колга.
Владимир Волковонь рабочай визитоц ушедсь Темниковскяй райононь Культурань и искусствань дворецса Туристско-информационнай центрать экспозициянзон ваномастост. Владимир Волков отмечазе, што Темниковскяй районца ули мезе няфтемс аф аньцек Россиянь, но и омба масторонь туристтненди. Районца улихть мялень салай памятникт, тяса эсь лацонне перьфпяльсь. Районца ащи республикать туристическяй «жемчужинац» - Смидовичень лемса Мордовскяй заповедниксь.
Районца работайхть ниле туристическяй маршрутт: пешеходнай экскурсия ошть историческяй пяльксонц эзга, экскурсия Итяковскяй городищав,
интерактивнай экскурсия Вирень Цыбаева вели, экскурсия Санаксарскяй монастыри. Аньцек тяддень кота ковста Мордовиянь и лия региононь 514 экскурсантсь нолдазь тевс районть туристскяй предложениянзон.
Районца кярьмодсть туристтнень ширде мялень шарфнемать касфнеманц коряс программать эряфс етафнеманцты. Тячи заповедниксь сувафтф Россиянь туроператорхнень сетьс и лисенди васенце вастти Мордовияса тяза сашенды туристтнень лувксснон коряс. Меля заповедникть ванозь 8 тежяньда лама ломанць, мезсь 20 процентта сяда лама 2015 кизоть коряс. А мекольдень 6 кизотнень заповедникса туристтнень лувкссна кассь 70-крда.
Выставкаса Владимир Волков корхтась «Заповедная Мордовия» ФГБУ-ть директоронц Александр Ручинонь мархта экотуризмань отрасляса тячиень тефнень колга, а стане жа районть и республикать туристическяй ресурсснон сяда товолдонь виияфнемаснон квалма. Заповедниконь инжихненди аноклафт колма од маршрутт. Меля «Заповедная Мордовия» турсь азф инь цебярькс «Маршрут года» всероссийскяй конкурсть итогонзон коряс. Инжихне оцю мяль шарфнихть «Пятнистай гострономическяй фестивальти». Сонь презинтацияц кармай сентябрьста. Пушта велеса няфтевихть аф фкя лацонь национальнай ярхцамбяльхне, промосне и ремеслатне. Фестивальса участияснон кемокстазь ни 10 заповедниконь представительхне, тяконь лувксса Марий Элста, Татарстанцта, Калмыкияста, Чувашияста. Владимир Волков арьси, што кизоть шумордамс республикав сай аф 10 тежяньда кржа эко-туризмань кельги.
«Тя тага фкя пример сянди, кода эсь тевти кельгомась лезни сатнемс оцю результатт. Темниковскяй районти пяк эрявикс виияфнемс туристическяй кластерть экологическяй ширеть и паломническяй туризмать вельде. Тиньцонт улихть пяк мазы вастт, конат эрявихть няфнемс, тиендемс синь келиста содавикс, няфнемс Мордовиять перьфпяленц мазышинц, минь коеньконь-обуцяньконь, культураньконь. Главнайсь, штоба туристскяй продуктась улель мяльс коре сембонди – и оцюфненди, и емлатненди», - отмечазе Владимир Волков.
Меле республикань лидерсь ульсь «Морская душа» патриотическяй моронь Межрегиональнай фестивальса, коза пуромсть тежятть райононь эряй. Владимир Волков поздравляндазень пуромфнень Военно-морской флотонь шить мархта. Сон отмечазе, што Темниковскяй районць – Мордовиянь инь «морской» районць, Темникавть историяц кемоста сотф адмиралть Ф.Ф.Ушаковонь – Российскяй флотонь главнай адмиралть эряфонц мархта», - Владимир Волковонь валонзон коряс. Ушаков – Черноморскяй флотть
пуроптыец и Россиянь прославленнай флотоводецнень эзда фкясь. Сон калмаф темниковскяй модать лангса.
«Тядде топоди 200 киза адмиралть Федор Ушаковонь эряфста тумстонза. Недяляда меле етафтовихть торжественнай мероприятиятне, конат лемтьфт канонизациястонза 16 кизонь топодемати. Тядде арьсетяма петемс Санаксарскяй монастырть, ушедомс работатнень Ушаковка велеса флотоводецть усадьбанц «эреклафтоманц» коряс. Планцонк путомс Темниковаса пямятник Федор Ушаковонди, панжемс од залхт и од экспозицият сонь лемсонза музейса», - киткстазе Владимир Волков.
«Морская душа» фестивальста Владимир Волков тусь Вирень Цыбаева вели, коса ульсь тостоконь культурно-досуговай центраса. Мордовиянь вятись васьфтьфоль велень самодеятельнай фольклорнай ансамбльть выступлениянц мархта, варжазень пачатнень, ванозе этнографическяй выставкать и корхнесь велеряйхнень мархта. Волковонь мяленц коряс, культурно-досуговай центраса няфтьф экспозициятне пяк малат музейнайхненди. Эсонза ули антикварнай паршихть, щапт-каряпт и лия мезе. Велеряйхне азозь, што тяса ульсть ни Москувонь, Нижегородскяй, Пензенскяй, Рязанскяй областень и странань лия региононь туристтне.
Рабочай поездкать шумордамста Мордовиянь вятись ульсь Урей велеса, коса содафтсь «Подсобное хозяйство» ООО-ть производстванц мархта. Предприятиять вятиец Григорий Самолькин азондсь, кода анневихть тяса жувататне, кода кирдевихть вазнятне, кода касфневи продукциять производствац и отвечась Владимир Волковонь кизефксонзон лангс. Мордовиянь Оцюнять аф оцю пингс тевонзон тиендисна китькстазе, што тяфтама ферматнень работасна эрявикс аф аньцек велетненди коса синь ащихть. Владимир Волковонь валонзон коряс тяфтама производстватнень сатомшка оцю путкссна регионть социально-экономическяй инфраструктуранц виияфнеманцты, мзярда панчсевихть од рабочай вастт, касфневи производствась и «эреклафневи» велесь.
Тиемок итокт Владимир Волков китькстазе, што районць целайнек ащи касомань-вииякшнемань ки лангса, а сонь территориясонза туристскяй кластерть пуропнемац максси дополнительнай возможностть.