Республикань лидерсь 28 июльста ульсь Марьяновка велеса спиртзаводса, ванозе муниципальнай образованиять социално-экономическяй ширдень касоманц-ввиякшнеманц.
«Вл.Марьяновский» спиртзаводса, коста ушедсь Владимир Волковонь Большеберезниковскяй району рабочай поездкац, работай 130 ломань. «Мордовспирт» ООО-ть генеральнай директороц Евгений Сидоров азондсь республикань вятити бизнес-проекттнень, производствать модернизациянц, предприятиять работанц колга. Спиртзаводса арьсекшневи етафтомс эряфс од бизнес-проект спиртть и высокобелковай концентратть производстваснон коряс.
Тя лезды пяшкодемс «ЛВЗ «Саранский» ООО-ть качественнай спиртса вешфксонц и максы возможность дополнительна нолдамс 1 миилион деколитра продукция, тяка пингть аф рамсемок сырья лия регионцта поставщикнень кядьста. Тяда башка панжеви 135 рабочай васта. Сембе ня аськолксне кемокснесазь республикать экономиканц.
Бизнес-проектть эряфс етафнемац обеспечендасы 25 миллион цалковай налоговай пандомать аф фкя лацонь уровенень бюджеттненди. Од производствать вельде республиканскяй бюджетть доходонза касыхть 7 миллиотт цалковайда.
Од производствать тевс сувафтомста рамави технологическяй оборудования, тиевихть ремонтнай работат спиртть производстванц ушедоманкса. Тяда башка оцю мяль шарфтф природоохраннай мероприятиятненди. Тяфта, кармайхть строяфт очистной сооруженият, мезсь максы возможность панжемс производствань лятксфтома, экологическяй ширде ару технология.
Основной продукциять нолнемода башка «Вл.Марьяновский» спиртзаводсь тонаткшнесы од продуктать – высокобелковай концентратть нолнеманц. Животноводствань и птицеводствань предприятиятнень эса сонь тевс нолнемац лезды касфтомс кормотнень тевс нолнемаснон эффективностенц.
Владимир Волков отмечазе, што АПК-сь и велень хозяйствань продукциянь переработкань индустриясь – фкя инь цебярсь Россияса. Од производстватнень панчсемаснон оцю значенияц аф аньцек экономическяй, но и социальнай ширде (рабочай вастнень панчсемасна, велетнень эреклафнемасна, велень ломаттнень эряфснон цебярьгофнемац).
Оцю Березникаса Владимир Волков корхтась районть социально-экономическяй вииякшнеманц инголе путневи задачатнень колга. Республикань вятись китькстазе, што районць лац работай эряма вастонь строямать, розничнай торговлянь оборотть коряс, тяса касфневи заработанай платась. 2012-2016 кизотнень строяфоль 20 тежянь квадратнай метра эряма васта, эрь шиня тевс сувафневи 4 тежяньда лама квадратнай метра. Районца
нолневи 264 миллион цалковаень питнеса продукция. Вииякшни райнть социальнай ширец. Аньцек меля тифоль капитальнай ремонт Шугуровскяй средняй школать спортивнай залсонза и рамаф спортивнай оборудования, рамаф транспорт тяка и Судосевскяй средняй школати. Тяда ингольдень несколька кизоста тиф ремонт Искусствань идень школати, Строяфт спортплощадкат Большеберезниковскяй и Марьяновскяй средняй школатнень эса.
Виияфневи районца ки лангонь инфраструктурась. Мекольдень кизотнень Большеберезниковскяй районца строяф и тиф ремонт 27 вайгяльбень кувалмоса автомобильнай кинди.
Райононь эряйхнень мархта корхнемста Владимир Волков отмечазе, што сон лувондозе эстеенза пяк важнайкс решандамс прябалать, кона пяк пичефтезе райононь эряйхнень – оду панжемс круглосуточнай стационарть районнай поликлиникаса. И тя задачась решандаф. Тяниень пингть шинь стационарть видеса ули 15 васта шинек-венек стационарса ащеманкса. Тяда башка, райононь эряйхнень эняльдемаснон коряс ушетф стадионть строямац и курок кярьмодеви «Теремок» идень садть реконструкциянцты.
Райононь эряйхне спасибасть республикань вятити сянкса, кодама полафткст эвондакшнихть республикаса и районца, арьсесть теенза сатфкст и шумбраши. «Тиентяма сравнения шабра региоттнень мархта. Республикать сатфксонза кепсихть мяль. И ся, што эрь велети пачкодсь природнай газсь, стройсевихть кит, эряма вастт, кодамот кодамовок регионца аш», - отмечазь большеберезниковецне.