8 майста Атяшевскяй району рабочай поездканц пингста МР-нь Оцюнять тевонзон тиендисна В.Д.Волков ванозе кода мольфтевихть тундань видемань тефне «Сабончеевское» и «Агро-Атяшево» велень хозяйстватнень эса. Владимир Волков азозе журналисттненди, што тячи видемань тефнень пялесна пяшкотьфт ни.
- Тундань сокамань-видемань тефне мольфтевихть эсь пингстонза: видеф ни зеронобобовай культуратнень 70 процентсна, кукурузать – 70 процентта ламоц. Сембе работатне вятевихть оцю уровеньца, паксятнень лангса работай аф кржа од оцю квалификациянь специалист, конат грамотнайста пяшкотькшнесазь эсь задачаснон. Паксятненди сувафтф 10 тоннада сяда лама удобрения мелянь кизоть коряс, - мярьгсь Владимир Волков.
Фкясь тячи таколфтсыне аграрийхнень – озимой культуратнень пяльксснон юмамасна, сядонга пяк Мордовиянь западнай райоттнень эса.
- Космосста съемкатнень вельде минь онлайн-режимса ваттама лисьфнень качестваснон мельге. Тядде озимой культурань лисьфне 30 процентта сяда кальдяфт мелянь кизоть коряс. Сянкса, штоба аф получамс фкя гектарста 15-18 центнер урожай, тейнек оду эрявихть видемс озимойхнень 12 тежянь гектар площадьса, - отмечазе региононь лидерсь.
Стане жа В.Д.Волков азондсь тяддень Ниле кофнень Мордовиять экономическяй вииякшнемань итогонзон колга.
- Тя пингста промышленнай производствась кассь 20 процентта, строительствань объемтне кассть 30 процентта, розничнай торговлясь кассь 4 процентта. Ниле ковста велень хозяйствань продукциять производствац касфтф 3,7 процентта: сивольть производствац кассь 8 процентта, лофцть – 3 процентта. Пяк важна, што Ниле кизот мельцек ни минь касфнесаськ лофцть производстванц, - отмечазе Владимир Дмитриевич.
Тага фкя оцю сатфкссь – 2017 кизонь васенце кварталть республикаса касфтф заработнай платась.
- 2017 кизоня минь арьсекшнетяма касфтомс зарплатать 10 процентта, - китькстазе Владимир Волков. – Инголенк ащи задача – ванфтомс сатфть и пяшкодемс задачатнень, конат путфт МР-нь Государственнай Собранияти Посланиять эса.
«Известия Мордовии»