Илась ушедсь Пресвятой Богородицань Покровань Храмть эса илань литургияста. Мордовиянь Оцюнять Артём Здуновонь лемста инжихненди и участникненди шумбракстома мархта пшкядсь РМ-нь Правительствать Председателенц Васенце полафтыец Галина Лотванова. Сон китькстазе, што илась уже 20-да ётафневи Вадовскяй Селищаса. Сон лезды кемокстамс, виензафтомс минь коеньконь, культуранеконь, кяльнеконь.
«И тя шиня эрь кодама минь оцю Масторнеконь уженяста сашендыхть землякне, штоба васьфтемс, штоба азомс фкя-фкянди пара валхт и лятфтамс сят цебярь кизотнень, конат ётасть тяса, Зубуть моданц лангса. Кельгома ялгат, тячи мялезе азомс сюконяма валхт, цёратнень, конат аралакшнесазь минь Родинанеконь границанзон, мала ломаньснонды. Сюкпря и мода ваксс прянь нолдама теентть, тядят, алят, ават, идтть, мес кирнесаентть минь боеценеконь», - мярьгсь Галина Лотванова.
Панжемань церемонияда меле илань программатне ульсть няфтьфт мзярошка площадка лангса.
Илань «седикс» арась прявксс сценась ««Акша келусь» тердьсыне ялганзон» Сонь лангсонза ётась Зубово-Полянскяй муниципальнай райононь эряйхнень, предприятиянь труженникнень, лама идь мархта семьятнень, военнослужащаень семьятнень, од специалистонь, сембонь, кие сувафтсь оцю путфкс илать кочкамс, трудовой династиянь представителбхнень чевствованиясна. Ётась «Топ-5 лучших подворий» пялькстомань сяськихнень каземасна райононь поселениятнень ёткса.
Ваныхне няйсть вокальна-хореографическяй картинать «Из истории праздника «Акша келу»», «Умарина» Мокшэрзянь государственнай морамань и кштимань ансамбльть, Мокшэрзянь государственнай филармониять, Россиянь заслуженнай артисткать Нина Марковать, «Од вий» Республиканскяй тяниень пингонь национальнай моронь фестивальть лауреатонзон, «Поляне» Зубунь ансамбльть участияснон мархта оцю гала концертть.
Мокшэрзянь кудпирьфса «Паронь арси азорхт» ульсь кода содамс тястоконь художественнай промыслань и ремеслань произведениятнень мархта, варжамс национальнай ярхцамбяльхнень.
Народнай художественнай промыслань кельгихненди покодсь «Машты кядть» ремесленнай площадкась. Декоративно-прикладной искусствань мастерхне ётафнесть мастер-класст. Ульсь кода рамамс народнай промыслань и ремеслань паршихть.
Ашезь юкста путороптыхне и спортонь кельгихнень. «Тройцянь налхксемат» площадкаса ётасть мокшень традиционнай пялькстомат каркс лангса тюремать коряс Мордовиянь Оцюнять казненц лангс, спортсменонь няфтема выступленият универсальнай бойть коряс (самбо, дзюдо, бокс), гирянь кеподемать, армрестлингть, канатонь ускомать, интерактивнай национальнай спортивнай состязаният.
Инжихнень учезь мялень салай программат «Служить верой правдою», «Кунардонь пинге», «Кизонь таньф» - кизонь симмапялень чаень фестивальсь, «Пуромома» площадкатнень лангса.
«Акша Келу» Республиканскяй национально-фольклорнай илась тага весть няфтезе мокшэрзянь культурать козя и эсь лацонь шинц, а тяфта жа Мордовиянь эряйхнень инжиень кельгомаснон.
Мордовия Республикань Оцюнять пресс-службац