«Местнай самоуправлениясь фалу ульсь фундаментокс, конань лангса кирди марнек государственнай устройствась, - китькстазе регионтть руководителец. – Именна тяса путневихть инь таколфты кизефксне, конатнень эзда аф туват, аф кяшсайть сельмотнень. Сянь эзда, кода покоди инь «земной» управлениянь уровенць, лацьсеви и ломаттнень мяльсна».
Мордовиянь Оцюнясь китькстазе, што муниципальнай уровентть лангс прась и призывной комиссиянь организациятнень покодемаснон коряс мероприятиянь комплекссь, ломанень кочкамста контракт коряс военнай службав лездомась, специальнай военнай операциянь участниконь семьястненди кирдемась.
«Мялезе сюконямс эрьти эздонтт минь странеконь кирдеманц инкса: минь фкя мяльса няфтеськ сонь РФ-нь Президентонь кочкама шиста. Минь ащетяма фкакс, минь Президентоньконь инкса!» - мярьгсь республикань руководительсь.
Тяфта жа ульсь китькстаф, што касы задачань объепнень мархта касы и муниципальнай службать эрявиксшиц. Тяниень пингть республикань местнай самоуправлениянь органса покодихть 5 тежяньда лама ломань. Васенцеда тяниень пингонь Россиянь историяса муниципальнай сферань покодихнень появась эсь наградасна, Россиянь Президентть поручениянц коряс – почетнай звания «Заслуженный работник местного самоуправления». Васенцекснень эзда фкакс тя наградась ульсь максф Юрий Нечайкиноньди –Темниковскяй райононь Бабеевскяй велень поселениянь главати.
Сай кизоста странаса ушеды вете од национальнай проектонь эрявс этафтомась. Республикань Оцюнясь китькстазе, што ламоц задачатнень ярмак ширде пильге лангса ащемасна, конат путневихть муниципалитеттнень инголи, теест макссеви питне региональнай власть мархта. Сянкса Артём Здунов шарфтозе РМ-нь Госсобраниять мяленц местнай самоуправлениянь оргаттненди кирдемань максомать оцю эрявиксшить. Уликснень эзда фкясь – эрь кизоня ётни сяськомась «Лучший муниципальный служащий». Тяниень кизоть заявкань лувкссь эсонза кассь пцтай фкя пяледа ламос.
«Минь карматама кярьмоткшнема лангозонтт, а тинь надияда лангознок. Инь эрявикссь – местнай самоуправлениянь органса покодихть виде вайме, эсь прянь аф ужяльди ломатть. Поздравлядатядязь ила мархта!» - пшкядсь кочкафненди Артём Здунов.
Мордовиянь Оцюнясь казсь питни казнет. Синь ётксост, Россиянь Президентть почетнай грамотанц мархта казьфт Оцюберезниковскяй райононь Симкинскяй велень поселениянь главась Любовь Астайкина и Ичалковскяй райононь главась Валентина Дмитриева, РФ-нь Президентть Сюконяманц мархта - Ельниковскяй райононь Новоямскяй велень поселениянь главась Светлана Гришакина, Торбеевскяй райононь Красноармеецень велень поселениянь главать полафтыец Татьяна Давыдкина и Дубенскяй райононь Красинскяй велень поселениянь главать администрациянц полафтыец Вера Титяева.
Тяфта жа ульсть азонтфт «Лучший муниципальный служащий» республиканскяй эрь кизонь сяськомать итогонза. «Жилищно-коммунальное хозяйство, благоустройство населенных пунктов, системы жизнеобеспечения» номинациять эса сяськикс арась Лямбирскяй райононь главать полафтыец Алексей Цилин, «Социальное развитие» номинацияса - Сирешайговань райононь главать полафтыец Наталья Жевлакова, «Управление, экономика и финансы» номинациять эса - Дубенскяй райононь администрациянь имуществань и модань отношениятнень коряс управлениянь начальниксь Лариса Карпова, «Профилактика терроризма и экстремизма, организация мероприятий по территориальной и ГО, мобилизационной подготовке и ликвидации последствий ЧС» номинацияса сяськсь - начальник отдела по делам ГО и ЧС администрации Зубово-Полянскяй райононь администрациять ГО-нь и ЧС-нь тефнень коряс отделть начальникоц Маргарита Тюркина, «Правовое обеспечение» номинацияса - Ичалковскяй райононь Оброчинскяй велень поселениянь главась Татьяна Анохина, «Организационное и кадровое обеспечение» номинацияса - Саранск ошень Ленинскяй райононь администрациянь главать полафтыец Наталья Вадяева.
«Совет муниципальных образований Республики Мордовия» Ассоциациять председателец, Дубенскяй райононь главась Виктор Нефедов сюконясь республикань руководствати местнай самоуправлениянь сферать кирдеманц инкса, велень поселениянь и ошень вастонь касфтоманкса-виияфтоманкса. Сон тяфта жа китькстазе: «Местнай самоуправлениянь уровентть лангс путневи эхянь стака работась – тейнек фалу эряви улемс панжадокс минь ломаненьконди, участвовандамс республикань и федеральнай центрань сембе проекттнень эса, штоба ломаттнень эряфсна араль сяда цебярькс».
Мордовия Республикань Оцюнять пресс-службац