Поздравительнай валхт илать участниконзонды видеообращения пачк азсь Российской Федерациянь гражданскяй оборонань тевнень коряс, чрезвычайнай ситуациятнеь и стихийнай бедствиянь последствиянь урядамань министрсь Александр Куренков. Сон китькстазе, што пожарнай тевть историяц тив поколениянь и династиянь подвихнень и энтузиазмать лангса.
«Толсь – аф ужяльди стихия. Сон мархтонза тюремаса сяськи аньцек аф пелемась и тевонь содамась. Ётамс стихиянь испытаниять маштыхть аньцек кеме вайме ломаттне. Кельгома ялгат, сюкпря теентть цебярь покодемакса и эсь прянь аф ужяльдеманкса! И койть коряс – коське ожат!»
Пожарнай охранань сотрудникнень илафтомста, Артём Здунов мярьгсь: «Пожарнай охранась – тя аф аньцек шинек-венек толонь стихиять каршес ащема. Тя ломанень историят, конат максфт эсь тевснонды. Республикань пожарнайхне оцю профессиональнай уровеньца ётафнихть тежятть инголдамань операцият, синь ётксост аномальнай пожархне и оцю шада ведттне».
2023 кизоня Мордовияса ульсь матф 2338 пожар, спасандаф 86 ламань, эвакуировандаф – тежяньда лама. Тяниень пингть регионса ули 100 лама подразделения пожарнай охранань сембе видонь и аварийна-спасательнай формированият 1600 лама ломань лувксса. Тя федеральнай противопожарнай службань сотрудникне, субъектоваень покодихне, муниципальнай, ведомственнай пожарнай охранань, а тяфта жа доброволецне. Синь вооружениясост – тяниень пингонь пожарнай техника.
Ульсь китькстаф, што мекольце пингть удалась лац одкстопфтомс пожарнай и спасательнай автомобилень парксь, рамаф 120 еденицада лама эхянь од, тяниень пингонь техника и пожарно-техническяй оборудования. Строяфт тяниень пингонь инфраструктурнай объектт, и тя работась мольфтеви сяда тов.
Артём Здунов китькстазе, што маластонь пингть эряви аделамс региональнай автоматизированнай населениянь оповещениять коряс системать тиеманц. Тянь мархта, мекольце кизотнень Мордовияса тиф пожарно-спасательнай спортть вииямас-касомс база странаса инь цебярьхне эзда фкясь. Сонь эсонза спортсметтненди-прикладникненди ули кода анокламс кизонек-тялонек и ётафнемс оцю уровенень пялькстомат. Тя эрявикс элемент од ломанень военно-патриотическяй воспитанияса.
Мордовиянь Оцюнясь китькстазе и профилактикать коряс покодемать эрявиксшинц – сон ащи ингольдень планца. Марнек удалси валхтомс пожаронь числать жилой секторса, велень хозяйствань объектса, производственнай зданияса и социальнай сферань объектса.
«Сюконямок эсь прянь аф ужяльдезь покодемати, тинь занцесасьть няквикс вастть Россиянь региононь противопожарнай часттнень ёткса и правань коряс суваде республикань эряйхнень верондомазост, - мярьгсь регионтть руководителец. - Противопожарнай службань коллективсь и Мордовиянь МЧС-сь может кенярдемс эсь сотрудниконзон, синь покодемань результатснон инкса. Эсь лацонь кирдемань валхт минь кучтама цератненди, конат тяниень пингть специальнай военнай операциянь зонасат».
Шумордамста Мордовиянь Оцюнясь китькстазе: минь седисонк фалу кармайхть сят, кие эсь эряфснон питнеса спасандазь лиятнень.
Торжественнай церемониять пингста лац прянь няфти сотрудникненди и службань ветераттненди ульсть максфт оцю наградат. Почетнай звания «Заслуженный работник пожарной охраны Республики Мордовия» максф МЧС Россиинь ветерантти Евгений Ляпинонди. Службанц пингста сон ётась ки Госпожнадзоронь инспекторть эзда РМ-нь гражданскяй оборонань тефнень и чрезвычайнай ситуациятнень коряс министерть васенце полафтыенцты. Почетнай званиясь тяфта жа максф Теньгушевскяй райононь №24 пожарнай частень караулть начальниконцты Владимир Буртасовонди и Большеигнатовскяй райононь №11 пожарнай частень водительти Николай Захаровонди. Мордовиянь Оцюнять эзда сембе службань ветераттненди ульсть казьфт панчфт.
Тя шиня профессиональнай илать и знаменательнай датать мархта пожарнай охранань сотрудникнень илафтозь РМ коряс главнай федеральнай инспекторсь Анатолий Гулин, и Мордовскяй и Саранскяй Митрополитсь Зиновий.
РМ-ть коряс МЧС Россиинь Прявкс управлениянь начальниксь Сергей Репин сюконясь республикань руководствати и вяти федеральнай ведомствати кирдеманкса и службань техническяй оснощенияса лезксонкса.
«Пожарнаень поколеният и поколеният сувсихть толть мархта аф фкя лаца вий мархта тюремати. Эрь эряфсь тейнек питни и эрявикс! Минь работанеке масторлангса инь цебярьсь – минь профессиянеке добрай, валда, ару! А службань кизотне структураса – питнефтома эрявонь кизот! Кажнайти эздонтт сюконяма валне!» - мярьгсь РМ коряс Россиянь МЧС-ть Прявкс управлениять руководителец.
Мордовия Республикань Оцюнять пресс-службац