Павел Давыдов, профессиональнай военнай, васенце шиста участвовандась специальнай военнай операцияса. Казьф лама боевой наградаса, конатнень ёткса орден Мужествась, Суворовонь медалец.
Тонафтыенза и одноклассниконза мяляфтсазь сонь валда и пшкяди ломанькс – сон лац тонафнесь, ашезень максе обжамс сятнень, кие сяда аф вии, эрязста примсесь участия школань эряфса. Павел шумордась Рязанскай гвардейскяй высшай воздушна-десантнай училища, военнай службань 10 кизоста арась гвардейскяй батальононь командиркс майоронь званияса, ульсь Сирияса боевой действиятнень пингста.
«Тячи минь кочкавоме тяса, штоба пяшкодемс священнай шумонеконь минь земляконеконь инголе - кемокстамс сонь колганза мялямть ся вастса, коса сон кассь кода ломань, кода аля, тисаськ тянь тядянзон-алянзон, мала ломанензон, сембонь, кие сонь содазе и кинди ульсь кельговикс. Монь мязеле, штоба валда мялямсь колганза лядоль минь седисонк», - мярьгсь, панжемок митингть, Мордовиянь Оцюнясь.
Артём Здунов сюконясь Павелонь тядянц мархта алянцты, Сергей Вильдановиченди и Ирина Васильевнанди, тяфтама церань касфтоманкса, афкуксонь героень. «Минь кирдттяма кенярдема земляконьконь инкса», - китькстазе республикань руководительсь.
Митингса азсть вал Саранскяй и Мордовскяй митрополитсь Зиновий, а тяфта жа Павелонь батяц – ФСИН-нь потмонь службань полковниксь Игорь Давыдов. «Мон содайне, што Павелонь эзда касы афкуксонь аля. Уледа достойнайхть сят цератнень мялямснонды, конат аралакшнесазь минь Родинанеконь», - мярьгсь сон кадеттненди и юнармейцненди. Воинть мялямонц почтиндазь кашт аф моли минутаса.
Лицейть актовай залса торжественнай обстановкаса ульсь панчф «Парта Героя», сон кармай улема ся класса, коса тонафнесь Павел Давыдов, ваксозонза кармайхть озсема эхянь цебярь ученикне.
«Россиясь кармай эряма, сяс мес улихть тяфтама геройхть», - китькстазе Артём Здунов. Республикань руководительсь максозе шавф воинтть алянц мархта тядянцты оцю государственнай наградать Российскяй Федерациянь Президентть Владимир Путинонь эзда – «За заслуги перед Отечеством» IV степенень мечь мархта (посмертно) ордентть.
Павел Давыдовонь мархта фкя класса тонафнихне няфтсть видеоролик, коса азондсть, кодамкс синь мялямсост лядсь ялгасна. Залса ваныхненди ашесть кирдев сельмоведьсна.
Тяфта жа «Парта Героя»-ть панжемста азсь вал боевой действиянь ветеранц, «Защитники Отечества» Фондть социальнай координатороц Иван Волков. «Тяниень пингть тейнек эряви кирдемс фкя фкянди. Улемс Великай Отечественнай войнань ветераттненди достойнай приемникокс», - мярьгсь сон.
Мордовия Республикань Оцюнять пресс-службац